剛完成意大利之旅, 跟大家分享一下。原本今次旅程係打算去法國Brittany 品嚐美食,可惜今年法國局勢不太穩定,唯有改地點。結果選擇重遊意大利,四大城市N年前做背包客時走馬看花去過,想睇風景,熱門的Tuscany 地區、五漁村似乎唔適合秋天去,上網見到北部山區Dolomiti風景好靚,決定一遊。全個行程只係plan左Dolomiti 的景點,其他城市的資料大概睇過就算,沿途隨心隨意,結果都去左唔少地方,好開心。

{行程 } 由香港飛米蘭 ,米蘭(住1晚) - 山區Dolomiti (住6晚) - 威尼斯(住3晚) - 佛羅倫斯 (住4晚) - 米蘭(住1晚) - 返港。

整個行程以山區Dolomiti 為主,睇山睇湖泊,有興趣的可以安排行山,山區風景好靚。之後往威尼斯感受水鄉風情,其中一日由威尼斯往斯洛文尼亞即日來回,然後往佛羅倫斯周邊遊:hea遊古城、參觀酒廠,Parma火腿廠、outlet 購物,最後返回米蘭搭機回港。

(旅程會有遊記分享)

{住宿 } 今次6個住宿地點的其中5個係通過Airbnb預訂,只有一間經booking.com預訂。全程有不同住宿體驗 : 城市民居、山區豪華木屋、湖畔小屋及古老田園大宅。除左最後一間住宿衛生環境稍差以外,其餘的都好滿意,會獨立開篇與大家分享。

由於威尼斯,米蘭,佛羅倫斯的旅遊區都設有車輛禁區(ZTL),所以我全部住宿選擇住古城外圍,米蘭同威尼斯泊車在住宿處再坐公共交通工具入城,佛羅倫斯就泊車在城外停車塲再進城遊覽。

 

{食 } 今次旅行比較懶,事前無刻意尋找餐廳,去到邊食到邊,間中由屋主推薦餐廳,但主要係自己煮。西洋食物對於我始終覺得較單調,來來去去据扒Pizza Pasta (我唔係富貴美食團),食到口都乾,反而supermarket 食材豐富,有時在apartment 煲啖湯煮個麵更好食,我呢個港燦就係咁。

 

{交通 }今次旅程乘坐QATAR往多哈轉機往米蘭,中間轉機停留三個多小時,多哈機場又大又靚,設備完善,大鄉里如我,左行右行都差不多無哂時間, 不過機倉又無傳說中講得咁舒服,普普通通,但起碼唔辛苦,除左飛機餐以外仲有薯片朱古力小食,以$5300一張機票來講,我就好滿意了。

 

{治安} 出發前無論身邊朋友定網上討論區都講到意大利好恐怖,治安差,又有難民問題,搞到自己都好忐忑,覺得下錯決定,好在結果一切順利。全程只有坐米蘭地鐵時遇到醉酒佬,大教堂前有餵白鴿黨,佛羅倫斯有簽名黨,喺城市都係提高警覺好d。當地人都提我,若自駕就最好盡量將行李放喺住宿處先好去玩,唔好留底物品在車內。離開城市在山區就更加安全,可以放心遊玩。

 

{通訊} 現今外遊最重要物品之一當然係一張有效的電話卡,今次用的係英國的3網絡電話卡 (Three.com.UK) 12G可用365日,$330 ,iPhone 一插即用。全程接收大概良好,山區、公路就慢d,意大利、奧地利、斯洛文尼亞都收到,但重點係Florence 的 the mall outlet 收得勁差,要幫人買嘢的就留意了。我16日全程機不離手(病態)間中客串做埋導航都用唔哂數據,上次去挪威都係用佢,真係用得安心又放心。

 

    文章標籤

    2016 秋色意大利

    全站熱搜

    Hearoom 發表在 痞客邦 留言(0) 人氣()