Foodie 生活雜誌

路線： 元朗西鐵站->錦上路->南生圍->元朗西鐵站 (單車遊)

景點: 跳蚤市場，大草原，荷塘，濕地，横水渡，爛屋

從未去過元朗踏單車，南生圍亦只去過一次，仲係揸車去到隨便行個圈就算，好多人地照片上睇到的美景都無見過。今次朋友帶我踩單車遊，感覺實在好多，為免路程太短唔夠喉，先去由元朗出發往錦上路跳蚤市場，再折返博愛醫院路段踩入南生圍，終於親眼睇哂所有美景。

元朗西至錦上路的單車徑並不好踩，凹凸不平之餘又好多路阻，初學者有點危險

過左博愛醫院不久會有間古董車cafe，入口在路邊，一間平房入面陳列住幾架古董車，又有衫賣，但就唔多吸引我。

沿路行過左迴旋處後見燈位過馬路踩入錦田村，出村後轉右，跟住個鐵路指示牌再踩一段路就到

跳蚤市場在錦上路西鐵站前，賣的貨物唔太特別，食個朱古力醬豆腐花當休息補給就可以繼續。

推薦兩日一夜遊可住賓館？😝😝😝

原路折返博愛醫院，轉右向前會見到小商新村。一條小小的村似以前的徙置區，今時今日我反而覺得有豪宅feel， 環境清幽卻又交通方便，個別屋主仲好有心機裝飾門口。可能都你睇我好我睇你好啦。

若唔入村就轉左沿小路入南生圍，一條臭河大煞風景，好多死魚，又想起環保的重要，但在現今社會談何容易？自己都係咪懶偉大，做好自己，做得幾多得幾多就算了。

一轉入小馬路，右面係河，左面有好多小食店，朋友帶我去呢間敬輝農塲。 小休。小農莊形式，可以餵下小動物，食豆腐花飲涼茶，好在地。最特別係店後有個浮萍池塘，好多浮萍植物鋪滿池塘，仲有浮橋可以在池上行，橋用鐵做，好安全。朋友話以前係木橋，仲有風味，可能因為人多，怕生意外已改用鐵了。

食完從再踩入南生圍，元朗的後花園，好熱鬧，放狗，放風箏，小朋友四圍跑，又有人野餐，我地四圍踩，在樹間穿梭，有點點上次荷蘭羊角村踩單車的感覺。當然，人少d會更好啦。

之後睇的都係婚紗相景。破石屋，木橋

終於再離開，坐傳說中的橫水道，$6一位，連單車上加一蚊，即$7蚊，其實可以有路踩出去，因為排隊耐過踩。不過又係貪過癮囉，結束愉快的一天。

雁回家