Foodie 生活雜誌

因為朋友post的一張照片，我決定要入住呢間旅館。旅館在佐賀太良町，面向有明海，海灣內恬靜安謐，一幅幅落地大窗，將海灣美景帶入室內，室內佈置時尚簡潔，以多款designer chair 點綴，增添藝術感。旅館分別有兩個大浴場及7個貸切露天風呂，感覺一般，好彩所訂房間內的私人風呂好舒服，以補不足。

為左唔辜負好天氣及燦爛的櫻花，今日決定繼續賞花，是日賞花點 : 御船山樂園。樂園原本係從前將軍的私人庭園，後來開放比平民賞花，樂園佔地廣，今時今日，當日的府邸已變成旅館，仲有茶室，小賣店，花季的晚上仲會打燈，有興趣的朋友可以喺旅館住一晚，慢慢欣賞。我地今次只係賞櫻，原本打算在園內午餐，不過團友突然話要食燒海鮮，當然立即改行程。燒完海鮮再去旅館嘆温泉，眨下眼，已經係旅程的最後一晚了......

訂此住宿，係被晚餐的評價所吸引，小屋提供法色晚餐，色香味俱全，等二朝的早餐都唔馬虎，果然有名有實。

plan行程時，睇來睇去都揾唔到有興趣的景點，決定選間民宿住下，呢間山小屋的晚餐好出名，加上好耐無住過民宿，再體驗下。民宿位於南阿蘇的山上，並唔偏遠，就在馬路旁，不過鄉下地方好少人，仍能保持寧靜。小屋兩旁都係民宿，又有咖啡店及小商店，似一條小村落。民宿包一泊兩食，餐點精美可口，製作用心 (下篇分享)，共用衛浴，地方清潔，贈送附近温泉中心入場券，民宿主人英語流利，好滿意的入住經驗。入住呢類民宿最重要係自律，保持安靜及清潔。當晚除左我地四人，仲有兩個家庭入住，難得小朋友都能夠保持安靜，好感謝。

依依不捨地離開夢幻温泉旅館後，再繼續旅程。先照原定行程去久住花公園睇花，不過昨晚天氣係零度，原本想睇的花氈當然無得睇，園內的花零零落落，好彩叫做有個小小的温室同一d記念品小店，無無聊聊居然行左兩粒鐘。睇唔到花氈，但又好彩遇著櫻花滿開的日子，跟住網絡上推介去熊本県野外劇場アスペクタ賞櫻，劇場係室外表演塲地，今日無表演，好靜。塲內有好多櫻花，開得燦爛，可惜天陰陰，而且櫻花比較分散，唔夠澎湃。影完一輪相就出發去今晚住宿。晚飯前去左當地的福祉温泉泡湯，類似老人中心，仲試左森美旅行團介紹過的電氣風呂，好搞笑。之後喺旅館小屋食個精緻晚餐就結束一天旅程。

旅館提供美麗的環境，舒適的房間，當然少不了美味的餐點。食材唔算高級，但製作認真，擺盤精美，味覺與視覺的享受，環境舒適，服務一流，令整個住宿體驗更完美。

旅館只有11間客房，全部在獨幢小屋內，分佈於旅館竹林四周，環境幽靜，每間房的面積及設計都不同，所有房間都附設風呂。房間為傳統日式風格，高雅大器，亮點係屋內的品味小家電、慷慨的飲品提供及貼心的房間設計，舒適自在。入住過後，覺得室雅何需大，適量地加入精緻的小家電及家品，會令生活更添樂趣。

旅館內每個房間都附設風呂，所以旅館不設大浴場，只有兩個貸切風呂 : 竹林之湯及洞窟風呂，可於入住前預訂時間享受。其中竹林之湯我在網上睇相已心生嚮往，到身處其中時，感覺比相片更有過之而無不及。至於洞窟風呂我無去，留比朋友夫妻享受，感請佢地有影相比我做記錄，不過佢地話一般，竹林之湯正得多。

近年愛上泡温泉，去過好幾個温泉鄉，最喜歡憇靜隱秘的九州黑川溫泉。之前到過黑川温泉鄉，遊人不多，好清靜，今次到訪旁邊的白川温泉，無温泉街，只入住一間旅館 : 山荘 竹ふえ。一間連温泉旅館達人都要一而再，再而三入住，實在好奇可以好到咩程度。旅館位於深山竹林內，依山而建，佔地廣，但只有十一個房間，被滿有禪意的氣氛包圍，非常幽靜，令人身心放鬆，好relax，絶對值得入住​🏻

早餐後出發往九重夢大吊橋，吊橋在深山，揸車要個幾鐘。落車後發覺幾凍，又大風，立即上車加番件衫，出發前睇過天氣預報，明明話旅行呢幾日係六度至十幾度，點知來到吊橋原來得四度！重要好大風，吊橋在山谷中，行到中間食正風，真係唔得佢死！不過作為一條人行的專用吊橋，又確實幾宏偉，吊橋架於深谷上，好有氣勢，最重要係感覺安全，行過對面，再上去展望台，我地幾條友左影右影，都玩左好耐。喺進入吊橋途中，見到有間賣河魚的小店，離開時就決定喺度食午餐，河魚肥美，師傅手勢好，無論燒同炸同樣美味，食完後就早早去温泉旅館check in,因為今日佢至係主角👍🏻