Foodie 生活雜誌

離開旅館，向下一間温泉酒店出發。一路四野荒涼，鬼影都無隻，間中經過幾間唔明點做到生意的精緻小店，不經不覺到左和牛產地白老町。行過經過唔好錯過，雖然駕駛員唔食牛，我唔理，照樣一人前，不過都分左半份比隔離枱一對中國人夫婦，人地又禮尚往來請我地食沙律，大家傾下偈，自由行的樂趣。下午開始落雨了，天氣又濕又凍，唔想四圍行，飯後直接去温泉酒店了。呢間酒店規模比較大，好多嘢做，好似去左迪迪尼咁，四圍貢下，好忙碌地又一日。

呢間牧場旁的小店純粹係被線條簡潔的店牌吸引，原來想買枝新鮮牛奶，可惜全部大枝裝，飲唔晒，無買。

呢間喺登山口的店，望落平平無奇，原來入面好型，不過只賣咖啡豆，飲咖啡要喺門口坐

我問左G神，個牌大概係話  : 入面無食物賣，只賣咖啡，你諗清楚至入來，唔好阻我做生意，真有型

天氣又濕又冷，食烤牛肉暖，肚餐廳幾大，樓底高，抽風做得好好

炭火燒烤，好正

一碟牛有五塊，我只食到兩塊。見隔離枱夫婦似華人，即管搭訕，原來佢地來自內蒙古，好斯文，佢好愕然點解我對家唔食，但我一個人都坐低食，我話佢望住我食就得，笑死兩位。

不過佢地知道我係香港人之後，問左我一個好特別的問題，佢地問我係大陸去香港的香港人，定係土生土長的香港人，又話覺得香港已經無左自己的特色，變得跟中國其他城市差不多。聽完之後我好唏噓，唔使等五十年不變，其實自回歸起已不斷變。時間巨輪就係不斷向前行，無話好唔好，唯有自己適應環境。

兩位上左年紀又識日交的内蒙古夫婦好有禮，送番碟沙律比可憐的駕駛員食。話我知佢地而家住喺烟台，話係好地方，叫我有時間去玩呢

去到温泉酒店，落住雨浸溫泉，爽！

晚上食埋甜品就休息了