Foodie 生活雜誌

今次北海道之旅，住宿都係旅遊點之一。之前去親美瑛都係住pension，今次想試下住屋仔。但要揾全間屋又啱budget的唔容易，結果揾左呢間同屋主一家同一屋簷下，佢住樓下我住樓上的小木屋。小木屋高兩層，樓上全層俾哂我，有兩房，浴厠，樓下客廳跟屋主共用，包早餐，不可煮食，但可用微波爐翻熱食物，不過我唔想搞到佢廚房，都係出外搞掂。屋主一家住木屋的後半部，基本上唔會影響到大家，但始終係木屋，幾應聲，我怕嘈到佢，成日要就住就住，有點不自在。

屋主一家友善又樂於助人，幫我訂餐廳又介紹地方我去玩。佢好健談，去旅行我最喜歡同當地人傾偈，因為可以多點了解當地人的生活，話說屋主係韓國人，廿歲出頭已離開韓國去不同國家旅居 : 南美、北歐、西歐、澳洲都有佢的足跡，最後認識左如今的日藉太太，決定定居美瑛，因為覺得好適合佢對子女成長。但之後可能會再去其他地方，係一個世界人。

我喺度住左三日兩夜，全程自出自入，只需喺回去之前通知聲屋主就得。最欣賞係通去田野的後花園，我喺度攤唞，好好feel 。總括來講，整個住宿經驗好好，住呢類同屋主share 的住宿，最緊要自重及尊重對方，溝通得好就大家開心了。所以屋主喺airbnb度都比左好高評價我，第時租其他住宿都會好d😆

來到小屋

樓下係客廳，廚房後面係屋主一家四口住的地方

我間房喺樓上

兩房加小起居，浴室及洗面枱，仲有晾衫架提供。護膚品、牙膏、洗頭水護髮素、風筒都有供應

房間的書係屋主住過的地方

喺北海道，温暖的火爐是必須的

好喜歡日本人的小木屋，精緻又多小裝飾

呢度話你知何謂風光如畫，窗框變畫框。

屋主喜歡木工，有自己的工作角落，另有小屋做工房

早餐喺度食，窗外風光明媚

簡單早餐。大少想瞓多陣唔食早餐，屋主自動自覺整個三文治外賣比佢，真窩心。

木屋面對田野

經過樺樹林通往後花園。

屋主喜歡喺度睇書、陪仔女玩平衡帶、盪鞦韆

再行出去就係花田，土地由私人擁有，外人不準內進，因為我住喺度，可以進入。之前都係喺外圍睇，今次可以進入腹地，感覺好local 😁