Foodie 生活雜誌

8/2022光顧

餐廳之前係韓國菜HANSIK KOO，難怪咁熟面口。意大利餐廳，頗多內臟菜式供應，幾特別。食物味道好，由頭盤到甜品都幾喜歡，仲有好幾樣菜式想試，可以再來。除左正式餐牌外，仲有today special menu，記得問下侍應。

sourdough 、麵包條、蕃茄包。蕃茄包好味

靚靚橄欖油樽，橄欖油厚身，點麵包有質感。

chicken liver parfait

雞肝醬配Panettone包。雞肝醬好滑，入面加左桃乾及葵花籽加添口感，saba汁似甜醋味，酸酸甜甜，配上似蛋糕質感的panettone提子聖誕包，好味。

前幾日喺另一間日本串燒店都係食雞肝醬搽麵包，當晚食的都唔錯，但同呢個一比，無論質感及香氣都差好遠，真係有比較有傷害。

lingua tonnata

薄牛脷配沙律醬。牛脷柔軟，沙律醬以吞拿魚、亞枝竹等製成，味道清新creamy，再繞上牛脷汁，牛味更濃。好味

Smoked sardines

時令之選，魚肉肥美，有點似刺身，配上醬汁同食，美味

Tagliatelle with Duck Ragu

鴨肉醬扁寬麵。濃濃的鴨肉醬係我所愛，每一條麵都掛上肉醬，感覺好滿足

Pappardelle with chicken offal

雞內臟扁麵。是日精選，將多款雞內臟撈埋打成醬，除左必有的肝潤之外，仲有雞冠同雞子，好有趣。咪睇佢同鴨肉醬嗰碟差不多，其實味道同質感都好唔，前都粗獷d，後者細滑d，兩樣都好味。

Testina Pig’s head

豬頭肉，餐廳的簽名菜。上枱時見到係四件方正的燒肉，肥肉及豬肉各半，烤很得口，油而不膩，配上菠菜及菠菜打成的醬汁，似食鬼佬東坡肉。

Cherry tart

飽得要命，但都想食個甜品至叫完滿，意大利餐廳居然無提拉米蘇，點左侍應推薦的櫻桃撻，我對櫻桃撻一般，好怕櫻桃漬完有藥水味，好彩呢件無，味道仲好清甜，下面係Mascarpone Cheese，餅底酥鬆，幾有水準👍🏻

小酒館氣氛