離開藥研温泉,又要趕車往大間町。大間町以吞拿出名,每年捕獲不少吞拿,來大間町只有一個目的,就係食著名的大間町黑鮪魚,原本打算去出名的浜壽司,可惜去到大間町已經兩點半,壽司店關三點,無謂阻人收工,所以直接去大間崎。印象中有間海峽莊民宿好出名,一見到入面座滿人就立即衝入去,因為三點鐘午市就完結 (其實附近重有幾間餐廳選擇)。飽餐一頓之後,喺呢個本州最北部,影相留念後就離開,大間崎彼岸就係北海道函館市 。可惜是日天氣欠佳,睇唔到對岸。
從大間崎離開時天已開始黑,唯有放棄去尻屋崎。五點左右天已全黑,而且偏遠地方無路燈,駕駛員幾辛苦。加上呢兩日颱風迫近,大風大雨,好不容易至到達八户,去酒店放低行李已經八點幾。立即到附近屋台晚餐,見到其中一間賣燒魚的幾有趣,就入內光顧。當時店內已有4位日本客,佢地非常友善,同我地傾偈又送我地小食,雖然雞同鴨講,但大家用手機又寫又google,居然可以溝通到。原來幾位係來自北海道的漁民,到八户做生意,最好笑是我地想禮尚往來,請佢食燒魚,佢地立即耍手擰頭,話自己係漁民,已經每日食魚食到夠,笑死我🤣🤣🤣 今餐能夠喺地道餐廳同當地人有講有笑,感覺日常,愉快的晚餐。
先醫肚,咁晏都點到個限量20份的黑鮪魚丼,其實我對吞拿唔係咁大興趣,但一場來到下北半島無理由唔去大間,一塲去到大間又無理由唔食黑鮪魚。可能因為係一般食堂,呢餐我食唔到入口即溶的拖羅,但質素都好好,不過能夠以咁平的價錢食到不俗的質素,好抵。
門口賣的燒魚頭都好吸引,要邊個位就指,即指即切,可惜最靚的魚鮫已經賣光,但魚肉都充滿油香
莫非剛剛個頭就係呢條132kg?
門口的石雕係米奇
喂,好貓唔欄路喎
再去影幾張到此一遊相
游過去吖,對面就係北海道了,聽講好近
諗住一腳伸駕駛員過去,可惜功力未夠
離開大間崎往八户,沿海而行,大風大浪
若果天氣好,我想我會行落去
但今日,若你行落去,結果會係......被水淹
又出現GPS 同google差一倍時間的指示,我當然信G神,但佢專帶我行小路,若果唔係喺日本,呢d環境我會幾心慌
行左咁耐都只係行得一半
去到酒店睇新聞,見到其他地方受颱風影響得都幾嚴重下,我地算好彩
落雨都要食飯
呢類橫丁好多地方都有,但我未試過坐入去食,今次係第一次
選左呢間,因為得呢間有位。
完全無睇餐牌,見到就指
漁夫先生食的海菠蘿,其實喺韓國已見過,但無試過。初初佢見我眼望望,笑笑口話係地道食物,我唔會鐘意食,後來又忍唔住遞比我試,一個充滿海水味又押押地的食物,唔太難接受,(點都唔會難頂得過魔鬼魚)不過試一次就夠。
最後大家合照留念
留言列表