2018冰島丹麥遊遊記篇 Day 2 黃金圈-版塊裂縫Thingvellir National Park-水簾瀑布Seljalandsfoss－Foodie 生活雜誌

今日正式踏上自駕旅程，食完自家製早餐後，依依不捨的離開小屋，友善鄰居請我食朱古力同我say goodbye，so sweet。起程直駛黃金圈，應該超過90%來冰島的人都會去的超級熱門旅遊點，俗人如我，當然會去啦。先去版塊裂縫Thingvellir National Park，差不多到達時經過P3 停車場，落車睇下，發現行入去都係裂縫，唔蝕底行左先，行到盡處有瀑布，風景一般。行完後去官方景點，好熱鬧，我望下就走左。黃金圈係超級旅遊點，非常多人，建議早點到，否則無車位。離開版塊裂縫Thingvellir National Park，開車去黃金圈第二站 ： 間歇泉Geysir 。景點位於温泉地帶，地熱區就似日本的温泉地獄谷，最特別係個間歇泉，每幾分鐘會噴發一次，力度猛，有幾層樓高，都幾壯觀，不過亮點只得一個，基本上睇完就可以走。中午時分，原本想喺觀光店的cafe草草食個午餐，但實在太多人，團員唔太肚餓，決定去埋黃金瀑布先。去到黃金瀑布，照舊人頭湧湧，但呢度終於令我有到左冰島的感覺。瀑布面積大，水量足，氣勢磅礴，總算不枉此行。之後在路上揾餐廳，可惜附近無啖好食，結果食左餐又貴又唔好食的午餐。

早餐幾豐富呀

在路上

今日天陰陰，不過唔落雨已經要還神

在P3停車場泊低車，行入去又係有個閘

太后初來報到，因為跟開團，習慣落車行兩步就到景點，睇完上車走，所以貴重物品無隨身，仲要大支嘢話人影都唔多個，比人爆左架車就抵死。我就係討厭佢呢類性格

行過左一小段山谷石頭路就見到鋪得好靚的棧道，好易行，太后慢慢行都應付到

終點的瀑布，我在冰島見到的第一條瀑布，講真有點失望

行完就取車，見太后急急腳行，問佢做咩，佢話 ：怕個袋無左，佢唔知要行咁耐，我懶得理佢，感謝美魔女伴住佢，否則我一定一路行一路曉以大義，結果又會鬧交。我就繼續影相。

去到觀方景點，紀念品店、觀景台唔少得，記念品店旁有免費洗手間，由於駕駛員一路等唔到位泊車，加上開始落雨，我落車影左幾張相就走

觀景台，望出去都係裂縫山谷，比我剛剛行的地勢再高少少。

觀景台步道在起點已鋪好

冰島間中會遇到封路，不過有G神就無有怕

旅客中心，cafe、餐廳、shopping 樣樣齊，好迫人，太后去洗手間，敏捷地消失於人群中，結果當然又係走失。話說太后每次去洗手間，美魔女都會好心相伴，點知太后以小人之心度美女之腹，以為係我派美魔女去監視佢，居然同美魔女講 : 「你放心，我唔會令你難做。」佢真係當左自己係犯，搞到美魔女唖口無言。

因為地熱關係，地上的流水都係冒煙的熱水

駕駛員最唔想見到的牌 ： 禁止航拍

園內四處都係高温泉眼

大家都圍住中間的噴泉

噴泉每隔幾分鐘會噴一次，好多拍友圍住等，拍到滿意為止

近年旅行見多左呢類牌，究竟咩人會成日掉coins呢？我成日自己對號入座，有點慚愧

離開間歇泉再上路，遇到肥羊落車打招呼。冰島的羊好肥，行動敏捷，所以只比影到個pat

黃金瀑布，從停車場位置俯瞰，瀑布跨度大，氣勢磅礴

可憐的駕駛員

瀑布有兩個停車塲，一上一下，旅客中心、洗手間設於高處的停車場，沿住鋪好的棧道同樓梯行落瀑布，若唔想行，可以俯瞰瀑布後再揸車去下面另一個停車場，咁就唔使好似我咁行番上去。行完瀑布後叫太后在下面的停車場等，我同駕駛員揸車落嚟，等佢唔使行，但佢吵住話要一齊行，但自己又腳痛，吹漲！結果我比條車匙佢，話我喺度等，叫佢揸落嚟，佢至死死氣喺度等，真係唔明點解有福唔享？

沿住山腳行去最接近瀑布的地方

四圍的路都濕滑，太后唔比人扶，差點滑倒，嚇到我心都離埋，佢自己定神後至肯比人扶，激死我

瀑布的開端，瀑布水勢猛。

近看瀑布，山谷峽窄，水花因未能散開而向上升，好有趣。

午餐喺呢間以自家種植磨菇的工塲附設餐廳用餐，喜歡菇菇的我諗住無死，點知好失望

有簡單buffet提供，沙律加麵包，主角蘑菇湯唔好飲，二百蚊一位，好貴

羊肉wrap 冰島的羊肉好味，呢個wrap 都唔錯，起碼係熱的。

食完午餐去到Seljalandsfoss都差不多黃昏，若果太陽伯伯出來就剛剛好可以在水簾洞內欣賞夕陽美景，可惜這樣的幸運並不屬於我。太后落車後用眼尾瞟一下個瀑布，不屑地講句 ： 菲律賓百勝灘個瀑布咪咁囉，有咩好睇？ 世界各地遊客讚嘆不已的冰島著名瀑布，在太后眼中就係如此不外如是，我只去過香港公園的水簾洞，無去過30年前的菲律賓百勝灘，唔敢同佢㘭，但一場來到，點都要佢喺瀑布前留影，初初太后死都唔肯，之後我同佢講 ：唔係個個好似你咁見多識廣，影番張到此一遊相，喺老友記面前威下嘛。膚淺的太后在虛榮心作祟下，立時充滿動力......影張相，之後就返回后坐繼續煲劇。我地三個行入瀑布前千叮萬囑太后咪亂行，又要佢袋好車匙，皆因太后有過度活躍症，怕佢四圍走😫三人帶著忐忑不安之心走入大瀑布，好彩回來後仍上到車。遊覽瀑布後，直駛去離瀑布不遠的住宿，今日一共行左四個景點，夠皮了。