Foodie 生活雜誌

1/2023光顧

太古城又係一個唔知食乜好的商場，好似外圍的餐廳比較吸引。行過見到呢間有哂排隊圍欄，雖然當時無人排隊，但感覺好似幾勁咁，喺我在門口睇緊餐牌時見後面開始有人等位，死唔蝕底入左去先。小菜同煲仔飯質素不俗，不過煲仔飯的餸就少左d囉。

 

套餐幾抵食，二人餐包例湯、點心拼盤、小菜及煲仔飯，質素居然唔錯喎，喺太古城來講算係咁。

准山杞子燉雞湯

湯頭濃郁，飲完唔口渴，睇到廚房將翻熱左的包湯剪開倒落個湯盅，連鎖店就係咁

點心拼盤

可愛公仔點心拼盤，喺凍肉公司凍櫃內揾到，唔難食，不過寧願佢比碟油菜我

魚香茄子煲

夠鑊氣，茨汁厚薄適中，唔會食到成口油，有咸魚香，唔錯喎

臘腸雞煲仔飯

呢度係我撩開左餸至記得影，所以賣相差左。雞肉滑溜有肉，臘腸半肥瘦，潤腸係追加，兩者都唔錯，咬落juicy無油益味。煲仔飯熱辣辣，有飯焦，火喉唔錯。

撈點豬油更香

小店茶記格局，但都裝修得幾有心思

廚房透明度高，太古城內的鋪頭，唔通真係用炭爐遂個煲仔飯煲比你食咩？加上流量大，無乜可能做到，除非你肯等到地老天荒。不過而家一切電子化，呢台煮煲仔飯機又唔錯喎，(睇落)操作簡單 : 量米、落水、較時間，最後喺炭爐慶個飯焦出來，計埋剪開包湯同蒸熱點心，呢部份只需三人就可搞掂。

我見呀姐量米、加水、搞匀，三個步驟就搞掂

呢台機幾厲害

真係有炭㗎，不過唔係由頭煲到尾