食完早餐，參加酒店辦的小手工活動，跟住就開始旅拍（酒店套餐包埋）。攝影師好Hea，影完後包左架車出發，先去食農家菜，上菜速度奇慢，司機揸車又慢，結果唔夠時間去遠的景點。附近又冇咩好睇。好彩最後俾我睇到路邊有個岩洞咖啡室，居然好好玩，我同少爺仔行左兩轉，好正。行完之後返回市區，求其食餐餃子就返歸。
一早做小手工，聖誕節整棵聖誕樹
夠鐘去旅拍，攝影師流水作業，趕收工咁
套餐包10張相，若要再揀就加錢，加錢的套餐好貴，而且大陸好興執相，執到我自己都唔認得自己，最後我叫佢原裝俾返我就得，佢幾無癮。
影完返房嘆杯咖啡至出發
午餐的餐廳喺山谷內，有點隱世feel，諗住會有好嘢食，結果係我諗多左
農家菜，雞、魚、菜及豆腐。呢邊的雞興放湯煮，好靭
飯後去興坪古鎮睇$20紙幣圖，因為紙幣上的畫就係呢個景，所以出左名，個鎮好商業化，無乜興趣，行兩行就走
下一站去月亮山，司機dum 波鐘，瞓醒一覺都未到，一睇原來開40咪，慢到嚇親，行左大半日，來到月亮山，團長的評語係 : 咁遠嚟睇個窿。
睇完月亮山後無所事事，想起我途中見到路邊有間cafe，諗住去飲杯咖啡，點知原來有個溶洞
先去咖啡店買咖啡及比入場費
喺外面hea下先
入溶洞前要戴頭盔，諗住店家扮哂嘢，做戲做全套，入去至知個頭盔實在太有用
溶洞入面有座位，打哂燈，標準景況
入去之前侍應無話可以行，以為只能夠坐低飲嘢，我一向喜歡四圍八卦，一直向前行，睇下有乜。
點知愈行愈入，開始無燈，要開頭燈，沿路高低起伏，有啲地方更要彎低半身至行到，仲要成日撞頭，似愛的迫降玄彬由北韓去南韓咁，幾過癮，頭盔真係好重要。
人多時要單向行，可能要行下停下，我哋當日無人，行得好舒服，我同少爺仔仲倒轉頭行多次
熄咗頭燈係全黑的
終於到左洞口，其實全程15分鐘左右，但因為係探險mode，感覺好似行左一段時間咁
出洞口後再沿山邊回咖啡店
食左幾餐炆雞煮魚，有點悶，今晚簡單食餃子算了
當晚適逢聖誕節，商場內的土泡聖誕老人拖住個喇叭，有中國特色的公仔跟住聖誕老人一路行一路跳，場面好滑稽
回到酒店，去酒吧飲杯嘢，晚上要來酒精的。
再來糖水做宵夜
香港食食食 (25)