Foodie 生活雜誌

 
 總係對Pixar 的電影充滿期待，亦從未令我失望。今次電影以墨西哥亡靈節為背景，透過男孩一夜的經歷，講述追尋理想、家族傳統及生死觀念。全片色彩繽紛，熱鬧非常，帶住濃厚墨西哥色彩的極樂園塲景簡直係fantastic。全片令我最深刻的體會係遺忘。遺忘，可能係對一個人最大的懲罰，無論如何憎，如何恨，起碼仍記得你，選擇遺忘，就係將你拒於門外，我的世界再沒有你，那管你灰飛煙滅。原來一個神主牌係咁重要，代表你在家族中仍有一個位置，仍有後人記得，就算去到另一個世界，你仍然會永遠活在家人心中。但話分兩頭，若死後另一個世界同在生的世界係無分別，不就等如一直的「活」下去？咁又會唔會太攰？到時可能又會寧願灰飛煙滅了，我就係咁矛盾。
順帶一提，開塲前的一段frozen 「短片」足足有成二十分鐘，睇到我恰哂眼瞓，直接影響我對極樂園開塲時的投入感，有點煞風景。不過frozen 小粉絲應該會好開心。
  

  
一向好欣賞張艾嘉，名曲「愛的代價」係我的所愛，擅長拍女性電影，佢所有作品我都唔會錯過，從前的「莎莎嘉嘉站起來」「20、30、40」，到今次的「相愛相親」，不同年齡不同心境，每次描述女性心態都好到肉。今次故事以一次遷墳事件帶出三代女性的愛情觀，不同世代的價值觀及兩代相處的種種問題。從前老一輩對愛情專一，用一輩子守候一段已逝去的愛情，最後發現自己原來一直活在回憶中。中年女子為家庭為生活營營伇伇，早已忘卻生活的熱情，幸好有温柔的丈夫體量，默默支持，重拾愛情。年輕一代則自我中心，合則來不合則去。劇本完整，非常貼地，除了愛情，對傳媒生態、內地官僚主義、年青人夢想等題目都有觸及。故事細膩動人，角色生活化，細節位每每令我會心微笑，喜歡電影的英文名 「Love education」，愛情，係需要不斷經營，不斷學習，無須驚天動地，細水長流才是最難得。

藍精靈 : 迷失的村莊 
復活節開開心心睇電影，今次的smurfs the lost village 係四位smurfs team 成員的冒險故事，過程中仲發現美芝的秘密同第一次見到女版smurfs，個lost village 有如阿凡達，畫面豐富漂亮，內容正面，開心的電影。

 
 

  
先講Bjork的音樂宇宙 。認識Bjork，當然係來自當年王菲的複製菠蘿頭，覺得好型，對Bjork再認識深入點，明白到形象只係佢的一部份，當你接觸佢的音樂世界，就會發覺係好勁。我好少聽Bjork，因為聽唔明，承受唔到，每次聽完都好攰，因為佢的聲音充滿力量，而且每個專輯無論意念、形象、音樂風格、製作等，都係全新，需要好多時間去消化，自問聽唔掂。不過佢每次出碟都係音樂界的焦點，一定會知，我又每次都八卦地聽下。雖然咁多年來都係唔明，但我非常欣賞佢的創意，佢並非為創新而創新，亦非想突破自己，一切就係從心而發，透過自身的無限想像力，創作出一個又一個作品，從無重覆，就似一個千變萬化的精靈，最厲害係所有作品都係獨特的，唯一的，自成一格。今次呢個音樂電影，令我對佢了解多一點點，好喜歡睇呢類傳記式電影，可以濃縮快捷地讓我更認識我有興趣的人與事。不過呢套只得50分鐘，真係唔夠喉。
另一套漫漫回家路 。講述一名印度小孩與家人失散，之後被澳洲家庭領養，長大後再回家尋親的故事。改篇自真人真事，真係戲如人生。全片平鋪直敘，以男主角的心路歷程為主，但又描述得唔夠深入，成套戲普通左d。反而養母（Nicole Kidman)短短幾幕戲已演活一個無私的養母的心情。有時真係好佩服領養兒童的外國人，就如片中的澳洲養母，除左領養主角之外，亦領養左另一個有情緒問題的兒童，而佢本身並非不能生育，只係認為世界上人類已夠多，應該用自身能力去幫助有需要的人，實在令人敬佩！

  
三位黑人女性的成功故事，振奮人心的故事！60年代的美國社會，對有色人種極盡歧視，三位天才數學家除左受膚色歧視，更加上性別歧視，仲要在男性主導的太空總署工作，可想而知有多艱難，多屈辱。但三位憑住自身的天賦，遠大的目標，對自己的肯定，加上努力爭取，終於得到成功。成功係要天時地利人和，但毅力同堅持都非常重要。老生常談的 ：「成功係靠自己爭取」「機會係留比有準備的人」「世有百樂，然後有千里馬」，喺呢套戲內完全感受到，電影內加插三位女性的家庭生活，為嚴肅的題目加添温情，好正面的電影。

  
一個沉淪毒海的年輕人改過自身的故事，真人真事改編，亮點係與貓同行，故事內的貓呀bob自己親身演出。主角因爲一隻自來貓，為絕望的生命打開一線窗，最後更改變生命，活得精彩。要沉淪有好多藉口，要企番起身只需要一個條件 ： 意志。在康復途中好需要人支持，但人的意志畢竟係薄弱，面對一次又一次的失敗，身邊人會對你失望，選擇離開。但竉物就不一樣，單純地永遠伴在你身邊，默默支持。片中人與貓的互動好自然，導演間中會用貓的角度看世界，令觀眾更投入，緣份係好奇妙的事，故事裡人貓相遇，不只貓救贖了人，人亦救左貓，大家互相扶持，温馨簡單的一套戲。

  
好精彩的一套電影，編、導、演皆一流，故事講述三對夫妻加一個離婚男人，相識多年，以為大家已達到無所不談，毫無秘密的地步，直至一晚飯局，其中一人提議玩一個遊戲，將每人的電話放在枱上，當晚所接的電話及message 全部要公開，類似遊戲truth or dare。人到中年，感情、事業、家庭，問題一大籮，結果遊戲有如打開pandora box 一樣，一發不可收拾。整套戲有如舞台劇，一間屋，7個人，戲服造型無變一直落，搞掂！全靠對白精采，做戲就當然會較誇張，一晚內出現哂所有問題，而且係7個人的問題，聽落複雜，但高手就可以將複雜的關係有條不紊的表達，節奏明快流暢，毫不突兀，首尾呼應，故事完整。全片充滿黑色幽默，有反思有唏噓，若你熟齡如我，應該會睇得過癮。
真相永遠殘酷，總認為人與人之間無論如何親密，總要互留空間，保存一點私隱，並非隱瞞，而係「若要人似我，除非兩個我」。如何志趣相投的人都會有各自的觀點，好多事情係無絕對的對與錯，既然明知有衝突又何必坦蕩蕩？需知人與人的關係是脆弱的，千萬唔好試煉對方。我唔介意人瞞我，但我會怪對方瞞得我唔夠徹底，有時，知道真相未必係最好的結局。

  
又一個「總要失去才懂珍惜」的故事。好多人會因為日復日的忙碌生活而遺忘了內心感受，好多關係亦因爲習慣而變得麻木，直到失去後才醒覺。男主角本木雅弘繼上次電影departure之後再次演出與死亡相關的故事，今次角色更多層次，演出更細膩。故事以多角度思考死亡，每人面對死亡的反應都不一樣，沉默是否代表不傷心，呼天搶地又是否對整件事有幫助？小孩失去母親又如何自處？導演透過時間流逝，慢慢交待各人的心路歷程，當中誰幫助誰已說不清，結果最後最重要係如何面對自己，珍惜所有。小演員演出自然，喪母後的懂性更令我心痛。一部不錯的電影。

  對於X Japan的認知，係一隊打扮古靈精怪，鬼殺咁嘈的band。睇呢套戲係因為被樂隊的傳奇背景吸引 : 隊中的主音因為被邪教洗腦而退出樂隊 (十年後重組)，另外有兩位隊員先後自殺死亡。但入場睇完後，反而被樂隊靈魂人物YOSHIKI 吸引，一個外表如此柔弱温柔的人，一上台居然好似變左另一個人一樣，非常狂野，充滿力量，將背負住的忿怒盡全力發洩出來，令人驚訝，而且多才多藝，才華洋溢，面對樂隊解散、隊友逝世，一身傷患都一一撐過，傳奇人物應該就係咁？亦因爲電影，令我知道原來X Japan 的主音聲線嘹亮，唱歌好好聽。睇完套戲之後我無變成X Japan的歌迷，但好高興可以認識到一隊如此厲害的band (雖然遲左幾十年)