Foodie 生活雜誌

星星餐廳，上年來bangkok時已想試，奈何聽講一餐要食三粒鐘，曼谷實在太多美食，我花唔起呢個時間。今次book酒店時package 包個午餐，有藉口試下。餐廳以傳統泰國佈置，兩個水池以蓮花點綴，襯上一室沉色柚木，加上一個泰式涼亭，配合燈光，感覺華麗優雅。有兩款set lunch 選，泰式fusion，擺碟同食物配合都好有心思，比之前同樣係食泰菜fusion 的OSHA更細緻。食材高質素，味道好，整體用餐感覺良好，若果包多杯茶會更圓滿。不過窮風流有coupon，食完過對面餐廳飲埋杯free drink再call taxi 去機場，偽貴婦的半天。

曼谷文青潮流食店。餐廳除左售賣高質素食物，亦講生活態度，好有小確幸的感覺。本menu 成本magazine 咁，睇到都知認真。餐廳出名係brunch，我最喜歡的egg benedict、french toast ，可惜只供應至4點，我晏左來食唔到。不過其他食物都好好味，簡單得來有驚喜，睇得又食得。餐廳在the common 頂樓，氣氛悠閒，若白天來，坐在灑滿一室陽光的餐廳用餐，會更好feel。
 
ice tea 上面果幾粒係荔枝

(簡約水泥建築。夜晚，影得唔太清楚)
雖然話全球經濟不景氣，但無可否認人民生活係富裕左，中產階級多左，講究生活品味，講質素，好多性格小店同咖啡室因此應運而生。Thonglor 同Ekkamai 係日本人聚居的地方，我喜歡的小區 (你懂的），好多年前嚟親Bangkok 都會去四處逛。不過近年因為實在太熱，已經少過來，只肯在大型商場內流漣(原因你亦都懂的）。見新開的 the commons thonglor 幾有feel，又有想試的餐廳ROAST，所以過來行下。建築以天井式設計，空間及穿透感強，各層與各層都可以有聯繫，就如其名，似小區。內裡主要係餐廳加活動室，小朋友興趣班，成人yoga班，另有品味生活用品，係一個有型的商業化社區會堂。

以前好鍾意嘆豪華spa，不過隨住荷包大縮水，近年都少做，齋按摩就算，但見到有好介紹都會試下。好似呢間，開在日本人區，做日本人生意多，以我「日本C都香d」 的理論，點都唔會死錯。果然上年試完，大家都好滿意，今年翻尋味。spa設於平實小屋內，佈置清簡。在網上預訂有promotion，選左個rain forest package， 15mins steam + 30 mins body scrub + 90 mins oil massage，盛惠1800 泰銀。
- steam 烤箱設喺露台，我地兩個人坐入去似坐監，好在有條冰涼香茅味毛巾敷面，無咁難捱
- body scrub 的磨砂纖細，技師手勢温柔，好享受

自從有左社交網站之後，食物除左味道以外，造型都好重要，近年更有本末倒置的趨勢，若果只得綽頭無實力，餐廳會好快玩完。呢個店主就好有計，浮誇與實在並重。餐牌由60至1200泰銀的選擇都有，份量簡單至大堆頭，豐儉由人。遊客出得門就唔多計，點個浮誇麵，影張相呃個like，皆大歡喜。街坊又可以點街坊價，一網打盡，聰明！
 
講番呢餐，麵店在民居，店內貼滿哂訪問同名人(？)相，應該好多介紹，我唔知，朋友睇完blog 話要來。小店都叫整齊企理，不過冷氣不足，好多蒼蠅，要有心理準備，咪坐落至嫌三嫌四。一場來到，梗係要點碗土豪麵，用個淺口大盤做湯碗，方便display材料，海鮮乜都有 : 吸晴龍蝦，青口，魷魚，釀蟹蓋，半熟蛋，三文魚，大堆頭塞滿個碗，粉麵任選，我地選左金邊粉，麵條軟糯有咬口，不過係成個麵餅原個浸在湯內，要自己用筷子了鬆，求其得很，冬蔭公湯底味道徧甜酸辣度低，講真，成碗麵我興趣不大，見佢放舊三文魚落去都打個折，我真係未食過三文魚冬蔭公，其他配料亦麻麻。土豪麵內無我至愛的大頭蝦，於是加碟油爆蝦，都叫香，但比相中的蝦細。若果係為左呢碗麵，我覺得來一次都嫌多。不過用餐期間見鄰枱的街坊個個點街坊價食物又好吸引，例如蝦膏蛋包飯，大頭蝦冬蔭公湯即食麵，怕辣的可以選清湯底。有機會我會再來試街坊麵，畢竟central food court 果間大頭蝦麵退步左好多。

近兩次來曼谷都有食餐fusion 菜，無他，一來時興，二來價錢比香港平一截，而且好的fusion 菜就似去經歷一個美食之旅，用餐期間，對每道菜都會有期待有驚喜，好開心。今次的餐廳睇個門口都知浮誇，入到去直頭似坐在夜總會，金碧輝煌，天花幻燈片不停轉換影像，配合氣氛。
 
咁主角當然係食物，唔知頭唔知路的時候，我會點set，起碼係廚師最耍家的簽名菜，應該唔會死錯人。結果呢餐大家都好滿意，西泰合一，西餐材料加入泰式醬汁與配菜，味道有新意，加上別緻的擺碟同整個餐廳氣氛配合，不俗的一餐。侍應帶我參觀餐廳，離開時幫你call 埋的士，服務一流

每次去Bangkok 必食意大利菜，水準其實同香港差不多，但頭盤main course 連飲品埋單只係香港一個main 的價錢，仲要招呼一流唔使限時限刻催你走，去到唔食都對唔住自己。首選當然係zannoti，但今次試新嘢。餐廳在Silom 街尾，如同大部份餐廳一樣，藏身於橫街內。室內裝修高雅舒服，氣氛casual。分別點左三個頭盆三個main course 已經飽到甜品都食唔落，食物唔錯但無驚喜。
 
晚餐梗係整杯酒

(幾有規模)
對於按摩店的選擇，環境方面，當然係一分錢一分貨，但按摩師的手勢就唔係咁計，有時就算去到高級按摩店都未必享受到高品質素的手藝，自身經驗係靠運氣。今次打游擊，睇到邊間ok就入，結果都滿意。呢間位於Siam Paragon 對面的橫街內，見門面乾淨，入面又頗多人，又試下。店內有三層，走街坊路線，樓下按腳，樓上兩層係按摩室，我選泰式按摩，房間簡潔，無一絲多餘裝飾，只有一個掛夜架。替換衣物用膠袋裝住，當然知道唔會比件新比你，但感覺衛生。因為價錢平，近我地間酒店，所以幫襯左兩日，今次我好彩，兩日的按摩師都手勢不俗，兩位朋友選精油按摩，一位評語不俗，另一位則非常不滿意，所以都話係睇彩數。

 
睇blog 介紹話餐廳的椰子蛋糕好好味，就選擇在到步後揼骨前來個小食。餐廳樓底高，裝修帶點工業風，坐在窗邊可以睇到繁忙的SIAM BTS站。食物方面，分別點左椰子蛋糕，曲奇crepe cake ，椰子蛋糕唔太甜，頗鬆軟，但又唔係blogger 所講的咁美味，曲奇crepe cake 較甜，無特別。另外點左泰式雞翼，同greyhound 一樣的單骨雞翼，辣辣地的泰式風味，夠香口。再加三杯飲品。一間唔會中伏的普通餐廳，但唔需要特別來。
 

 

 
(premier room, 五百幾尺，standard 佈置，不過好隔聲)