Foodie 生活雜誌

好怕喺氹仔的酒店內食飯，貴的就好貴，平的通常係連鎖店，好悶。今次呢間餐廳喺賭場入面，真係成人限定。幾十蚊碗麵，有好多款麵條選擇，見師傅即場手拉，好有嚼勁，餃子皮厚，充滿北方風味，不俗。
 

(餐廳在AIA商業大厦21樓)

(小店門外圍滿人，行人都習以為常，行出馬路)
check out 後坐車回澳門散步，始終係喜歡舊區風情。行入下環，經過見到特別有間麵鋪要排隊，其他店唔使排。排隊的人又無攞住旅遊書，似當地人，望下見到係普通肉碎粉麵，應該唔會差得去邊，又跟住排。原來小店係食豬雜同豬肉丸粉，另外有越南牛河，可以選棵條（即貴刁）及河粉。湯底鮮甜，肉丸有咬口，總算無跟錯。老闆娘好有台型，悪形悪相，反而老闆好友善，知我地由香港過來，係咁向我地介紹小店。佢話奶茶係幾十前喺中環學，小店曾經於荃灣開業，後來因為太辛苦唔做。現在小店營業時間為8:30至2:00，3:00至6:00，星期日休息。老闆話師傅六十幾歲，唔想佢太辛苦，星期日太多人，所以唔開。另一個堅定我排隊的原因係排隊時見到一位揸住法拉利車匙的美女排隊買外賣，以我愚見，咁有錢都排，應該係好嘢​​​
 
資料:
南洋粿條麵食店@下環
下環下環街77號A
細細間，食完就走
香港學沖的奶茶，朋友話凍奶茶好淡，唔好味。但飲熱的朋友就話唔錯
我飲話梅梳打，甜甜酸酸夠醒冑
青辣椒醋 青辣椒爽口，完全唔辣，醋加左糖，酸酸甜甜，加入湯粉內有化學作用
豬肉丸粿條 內丸手打有咬口，無加粉所以好易散，就當肉碎粉食吧。所有粉的湯底都係豬骨洋蔥湯，應該係落左大量洋蔥，好鮮甜，唔覺油膩。
豬肉丸豬什棵條 豬什爽，洗得乾淨無怪味，棵條好滑，連湯滑落喉嚨，過癮
越南牛河 用鮮牛肉，湯底加左牛肉，味道又有變奏。不過河粉有點厚，鮮牛肉味濃但有點靱，都係點出名的豬肉丸豬什棵條好d
 
 
 

老字號酒家，見到四圍掛住鮑魚、魚翅的海報，心諗若我唔食呢d貴價嘢，會唔會遭受白眼？結果係無。由於中午已經食左大餐，晚上只想清清地炒幾個小菜。小茶味道不俗，不過稍嫌油膩。地方整潔光猛，價錢合理，好過喺酒店區捱貴餐。鄰近官也街，可以順便買埋手信。由於難截的士，可以在對面坐50號巴士返永利皇宮酒店。
 
資訊 :
六棉酒家
澳門花城區杭州街60號地下海怡花園六棉酒家
 

 
呢間餐廳，由佢開喺舊葡京的時候已經想食，可惜得個諗字，至今搬左去新葡京，夾好哂天時地利人和，終於食得成。食之前無乜點睇介紹，總之見到個價錢負擔得起就算，結果無令我失望，環境好，服務好，可能係午餐關係，加上經過強國人的洗禮，就算係fine dining 的都唔太拘謹 (我見到隔離枱的大款食到最後起身伸展筋骨)三小時的豐富午餐色香味俱全，非常滿意，可惜過澳門皮費太重，否則好有興趣再光顧。

一切由碼頭開始......無去氹仔一排，原來氹仔碼頭已經完工。地方大，好整潔，但係亦等如行多左路，落船出關後要行段路至到酒店接駁 車站。碼頭大樓內有food court 可以醫肚，又有手信禮品店，其他設施唔多見。因為地方大，若扶老攜幼的朋友記得預多點時間。

 

Day 1 

🍱午餐

天巢法國餐廳Robuchon au Dome@新葡京酒店

👫氹仔酒店免費遊 （參觀美獅美高梅/巴黎人酒店巴黎鐵塔/永利皇宮纜車）

🍱晚餐

六棉酒家

澳門花城區杭州街60號地下海怡花園六棉酒家

🏠住宿

美獅美高梅@氹仔

Day 2

🍱早餐

酒店自助早餐（$500 coupon 使用)

👫澳門市內散步，買手信

🍱午餐

南洋粿條麵食店@下環

下環下環街77號A

🍱下午茶

Sky 21

澳門澳門商業大馬路251-309

🍱晚餐

北方麵棧@新濠天地娛樂場內