Foodie 生活雜誌

2016九州一圈遊 遊記篇 Day  14 & 15
最後兩餐。晚餐因為又撞正happy friday，大部份地方滿坐，就選左呢間經過左好多次的西餐廳。室內燈光昏暗，適合情侶約會多d，同少爺仔來就唔多啱，只得四人枱，我地五個人，坐得迫，而且出菜慢，(人地約會係慢慢食)，加上燈光昏黃，令大家都懨懨欲睡。食物味道全部都好食，可惜我地配合唔到氣氛，打左折扣。
最後一日的早餐居然揾到我最愛的班尼迪同法蘭西多，在寧靜的餐廳對住公園嘆早餐，為旅程畫下完美句號。
晚餐餐廳

 
(區內以小街為主)
上次去福崗主要集中逛天神大名及赤坂，大部份係大型商場及連鎖店，雖然某些店面設計有型，但都唔係我杯茶，反而今次住的酒店背後今泉區就深得我心。今泉區以民居為主，區內夾雜住好多型格小店、咖啡店及餐廳等。之前介紹過的意大利餐廳及早餐小店都喺呢區，四周悠閒憇靜，四圍貢，食個pancake 試下朱古力就過左一個下午。

(餐廳在海中)
餐廳位於海中，設計特別，有如香港的珍寶海鮮舫。整間餐廳就在一艘大船內，用餐地點在下層，玻璃窗望出去見到魚兒游來游去，好有趣。不過食物質素一般，可能係視覺為先，味覺次之？

(呼子港)
一早出發去呼子朝市，10點左右去到，小漁村靜靜的，無我想像的熱鬧。行入朝市通，似大澳海味街，好多老人守住攤檔，與其他檔主閒話家常，靜靜地過一天。有時想，老人的一生可能就在漁村中渡過，日出而作，日入而息，結婚生子，老去時仍守住家業，簡單人生。我在年輕時，喜歡將自己的想法套在別人身上，總覺得一生無離開過村子，未見過世界，好可憐。但現在熟齡了，開始會站在他人角度想，可能，村子就係老人的全世界，因為佢最寶貴的家人，朋友，回憶都在村子裡，不假外求，外面的世界，未睇過又如何？廢話多了，想多無謂，食個即開海膽最實際

甚少食鐵板燒，一直以來鐵板燒比我的印象係好貴，食物要撚好耐先有得食，而且細細件，食完唔夠飽，唔係比我呢d幹粗活的人食。但近年睇多左雜誌先至知道鐵板燒有套餐，好多嘢食，食得飽，加上去旅行會有豁出去的精神，所以今次跟雜誌介紹試下。
餐廳位於運河畔，兩張鐵板燒大枱望正河景。主理師傅英文流利，清楚介紹餐牌，二話不說土豪般點哂d龍蝦鮑魚高級和牛。對鐵板燒毫無認識，食完只覺牛有牛味，唔係只得油香，龍蝦剛熟，夠鮮嫩，鮑魚柔軟，其他前菜，中塲甜品等食物精緻美味。餐具雅緻。餐廳服務一流，免費比少爺仔湯、一小塊well done 和牛，仲有甜品，一開始時仲細心地怕少爺仔肚餓(你知所有食物要撚一大餐)，問要唔要先炒個飯比少爺仔。食完仲比我地出露台同鐵板燒台廚師位影相。餐廳食物未必係頂級，但在我心目中服務滿分，好窩心。
對住河景枱

(餐廳在民居，細細間好低調)
呢間餐廳係打書釘時睇一本介紹福崗隱世餐廳的雜誌介紹。鋪仔細細，排隊時見到餐牌上肥嘟嘟的烏冬已好期待。烏冬係自家製，非常煙靭好咬口，白雪雪肥嘟嘟，冷烏冬配上清澈的醬油，唔係死鹹。天婦羅全部即點即炸，薄薄的炸漿包住，絶不油膩，店員熱情有禮，幹勁十足，最重要係最平一碗係700yen, 套餐最貴都係1500yen左右，一間有熱誠的小店，令我感動。喜歡烏冬的可以一試

今日無四圍去，全日留在福崗市行下食下。作為盡責的港傭，一早就落樓下揾早餐食。酒店背後的今泉區有好多小店，好正好好行，揾到間小cafe，見個凍櫃內的食物都寫住自家醃、有機等字眼，感覺良好。點幾個套餐，包飲品最貴個餐都係800yen，當我諗到呢個價錢只能夠在香港的上市茶記食個醃製類食物早餐時，真係好唏噓。唏噓完出發去行街市，呢個旅程我真係行左好多土產店、超市、市場，雖然我鍾意食，但都未鍾意到呢個地步，不過奶奶喜歡就當然奉陪，去到奶奶繼續佢嘅熱情，我就四圍岳，無所事事，突然比我發現呢間型仔咖啡店，喺傳統市場中相當突出，奶奶亦喺呢個時候加入試咖啡，大家試得不亦樂乎，我當然又四圍影，咖啡店有閣樓仔，一個長窗對住條河，靜到似圖書館，幾舒服。後來睇某網站至知呢間咖啡店係福崗五十大必去之地，雖然間店幾型，但都不至於係景點卦，唔通福崗真係無嘢做成咁？搞完一輪又去下一個目的地，無錯！又係食！去食左餐平靚正的烏冬。之後去博多站行新開的KITTE，講真，近年旅行主力食同觀光，購物慾已大減，而且日本的百貨公司都係千篇一律，大家都行得幾悶，但購物聖手奶奶就有能本事牽起高潮，帶領我地揀遮都揀成個鐘，結果一眨眼又到晚餐時。今晚食左全個行程最滿意又最貴的一餐鐵板燒，懷住滿足的心情回酒店大覺瞓。
早餐小店

 
拉麵！又係拉麵！我真係未試過一個日本之旅食咁多次拉麵！話說去完女生迪迪尼後已經天黑，一路上都揾唔到啱心水的食店（主要係我的問題），番到福崗都未有定案，我唔可能要少爺仔陪我再四圍行，唯有投降又食拉麵，點知有意外驚喜。拉麵店在小街商厦的巷仔內，一不留神就會行過，拉麵以辣湯出名，全部湯底都帶辣，你可以自己揀辣度，基本上1至5度都唔辣。我點沾麵，麵條夠粗夠彈牙，掛湯度一流。特別要提隻雞皮餃子，以雞皮代替餃子皮，炸得香口但唔覺肥膩，內裡係雞肉同香葱，好好味，可惜好快賣哂，想點多碟都無。一間幾好味的拉麵店，團友們點名要我寫，當然要做嘢。
小插曲 ： 原本我係無食呢餐，安頓團友後自己死心不息再去揾食，因為我接受唔到食第三餐拉麵！可惜結果都無心水，諗住番轉頭提下團友們食完點行番酒店先再繼續揾，點知佢地食完個個讚好食，喺攰到死的情況下再等埋我食完，所以話，有時要講食緣之外，更加要配合好團友。我兩樣都有，何其幸運。

 
食鰻魚飯最重要係鰻魚夠肥美彈牙，要用炭燒，醬汁要鹹甜濃度適中，飯要粒粒分明，集齊以上的就好味了。本吉屋的鰻魚飯有齊以上優點，雖然價錢唔平，但絕對值得，比又乾又瘦的蓬萊軒好多了。非常滿足的一餐。
見到呢間古老草屋就知到左，不過就算見唔到，跟住炭燒香味都會揾到，平日去到已經好多人，人同車都要排隊等

(若遊柳川，一定要坐船仔遊河，否則好似無咩意思)
一早開車去柳川食鰻魚飯，miss 左個 IC 出口，點知錯有錯着，去左個特産品センター なんかん いきいき村。地方好大，有好多特色土產賣，比我沿途見到的店鋪都來得吸引，仲有兩間大餐廳，一間食buffet，全部食物以土產作食材，另一間食拉麵，有自製豆腐，好吸引，可惜我要留肚食鰻魚飯，唯有忍痛話別，各位愛逛土產店的朋友可以來睇下。繼續上路去柳川，先去著名的元祖本吉屋食鰻魚飯，估唔到平日都要等位，坐底又要等食，唔係誇張，你真係要小睡片刻瞓醒至有得食。食完就在附的行下，柳川在我心目中的印象應該係同倉敷差不多，可是實際去到就覺得好大出入，倉敷規劃公整得多，柳川較隨意，可能我來得不是時候，河提兩岸固然無花，四周的市容及店鋪都頗殘舊，遊人唔多，不過我估若坐船應該感覺好好多，不過我興趣不大。日本國內的旅遊點互相競爭都好大，如何吸引遊人到來都要大費心思，否則熱潮一過就完了。行左一陣決定離開，去女士的迪士尼樂園(outlet），結果大家都有收獲，開心回酒店附近食個拉麵，一天就此結束。