3/2020光顧
台式創作料理火鍋，即係整得靚d又擺得靚d，埋單收得貴d。餐廳環境好，餐具精緻，食物擺盤靚靚，但食材質素只係一般，而且份量少，因為有6折，所以來試下，若果收原價我就真係肉赤。適合打咭多於食的餐廳，試過就算。
無九宮格調味架，只得一碟洋蔥醬，甜甜地又夠洋蔥香香，好味
胡椒豬肚湯底 胡椒味香，湯內有豬肚、雞件及配菜，材料幾豐富，湯底味道濃郁，食得耐都唔變淡，又唔口渴，讚
今次主攻特色創作料理火鍋湯料，出品造型精緻，每款菜式都由幾種食材組合而成，不過用來打邊爐好似浪費左，因為湯底濃，好難細味組合的味道。完全係睇賣相。本menu都印到似catalogue 一樣。
枝仔冰 以蝦肉、豬肉、花枝滑卷成，造到一枝冰棒咁，插喺雪花冰上，附上漏斗計時，提你唔好煮太耐，搞到咁大笨象，但食味就係一條海鮮肉丸。
手握壽司 「飯團」係蝦滑，墨魚滑及牛肉滑，上面分別鋪上牛肉、鮑魚、蝦及豚肉，整得好有心機，賣相一流，但食落又係一舊肉滑，咪以為會似食壽司，因為鋪有上面的材料滾完會同肉滑分開，得啖笑，不過都幾欣賞廚師的心思。
菠菠糖 豆皮、白芝麻、菠菜卷成，似腐皮壽司卷。索滿湯汁，咬落有口感，幾好味。
鳳梨酥 豆腐、蝦、豬肉、花枝滑包埋一齊，炸到似鳳梨酥一樣，至於味道，即係將肉丸變左四方形
牛肉拼盤，牛肩脊 肉切得好薄，另一部分做成花型，好靚，牛肉質素一般但價錢唔一般，好多食店提供的牛肉質素都好過佢。CP值極低。
羊肉片
白菜豬肉餃，好味
手工麵煙靭有咬口，不俗
薯粉
山渣紅果汁，似酸梅湯，味道天然，幾好飲
無敵維港景，張單一半價錢喺呢度，所以若訂位記得指明要大廳位
坐入面感覺蝕左
文章標籤
全站熱搜
香港食食食 (25)