Foodie 生活雜誌

今次一行五人，若住酒店要分三間房，住民宿相對平點，所以團長訂左呢間民宿。地點喺JR上野站行十五分鐘的民居内，附近有食店及便利店，生活機能唔錯。若坐skyliner從機場來就喺上野站出，其實去完街應該喺JR鶯谷站或地鐵入谷更近。

 民宿裝修簡約，地方清潔，分兩層，有兩間房，但間格特別，介紹聲稱可住八人，若真係住足八人，一定崩潰。當然好似我地咁住五個人係可以接受，但其中一啤要瞓廳，其他人去厠所出出入入好騷擾，我住過就有點保留了。

住宿link 👇🏼

https://abnb.me/e/SlaVR8DW2Gb

民宿喺橫街内，但始終係鬧市，路口有燒烤店，唔算太靜，治安良好，夜晚回來仲見到亮燈後的晴空塔

右手邊的石材建築就係民宿，咪以為好大，間屋係劏屋，一開二，我地住右邊

一開門就見到呢條又窄又直的樓梯，仲要搬行李上去，五條友喺門口排排企等上樓，呢個情況喺外國試過，無想過日本都有機會試到

行完長樓梯，第一層係兩間房，走廊無乜位，一上去就係房門。兩房相連，由一度門出入，呢間係第一間房，可住二人。另一間房就喺箭嘴位行入去。中間有倘門相隔

第二間房，介紹講的室內投影機無見到。呢間房有兩張雙人床，可住四人，但你可想像，若呢兩間房瞓六個人係咩狀況，如果一家人有大有細或者可以

再上一層就係介紹所講的另一間房，其實係張床喺客廳，廚房厠所都喺呢層

房間似兩口子住的公寓，但我地住樓下，要梳洗或上厠所就出出入入，好騷擾對方，而且上上落落都好煩

床尾對住洗手間及浴室

最喜歡日本乾濕分離的衞浴，呢次更可舒緩人流

皀液，洗頭水，牙膏牙刷，毛巾，洗手液都有供應。沖涼間內唔見介紹講的按摩浴缸。不過沖涼水力猛，熱水源源不絕，讚👍🏻