太后因為腳痛，今日獨留家中，感謝駕駛員漏夜揾左一整套韓劇比佢做精神食糧，我地喺出城前帶佢去一次超市，等佢認下路，再萬分叮嚀後 （大家別忘記佢有過度活躍症，會自己行落街），我地三個甩繩馬騮終於可鬆一口氣，輕鬆出發，原本打算個腦休息一天，比呀笨與呀占 （駕駛員及美魔女）帶路，結果都係頂唔住，自己做番領隊。先去design museum，展品豐富，行足一日都唔悶，我當然無咁殘忍要呀笨呀占陪我，所以行左兩個鐘左右就離開。之後去最把鬼景點 little mermaid，到此一遊後，打算去shopping，要知道丹麥的家品設計好正，買唔起都睇下，點知因爲星期日，好多商店無開，唯有行大百貨公司。當我喺頂樓hea住食午餐時，亦係天鴿訪港時，人生就是如此，我地三人今朝有酒今朝醉。飯後行埋round tower 就返歸了。最後一日因為係Airbnb check out 後無得寄存行李，唯有去附近的商場fields打發時間，太后喺呢個時候發揮左佢的才幹 : 看守行李，行完就直去機場返香港，旅程結束，總算還我一個帶太后去冰島的心願。
停留Copenhagen 4日3夜，扣左頭尾坐飛機時間，實際係得兩日行，今日坐metro 出城行街，點知出師不利，買唔到metro 票，仲要被開罰單，原本DKK24一程車變成DKK720，肉赤到頭皮發麻(詳情請看相內caption)，太后仲要一副死老豆嘅樣對住我，為左唔想影響遊興，我決定快速止蝕，整理心情，再鄭重同太后講 : 我唔要再聽到車票同罰款兩個字！往後的時間佢就轉移去煩駕駛員。丹麥的市容整潔，舊城區大部分景點距離都在步程之內，係一個非常適合散步的城市，更可以租單車四處遊玩，不過我同太后一齊，雖則景點全部係可以行去，但加加埋埋就行得好甘，太后雖然盡力配合，但老人家唔行得咁多，我只好簡單地行左幾個地標(新港、圖書館、皇宮)，食埋飯就返歸了。
來到快樂國度，又咁欣賞佢地的建築設計，當然要入住有型公寓感受下。公寓位於新社區，好多地方仍在建設中，但生活機能性無受影響，超市、餐廳、商場都在步程20分鐘內。有metro 、火車、巴士到市中心，坐的士從舊城回來約DKK二百幾，往機場DKK140左右，4個人些牙唔算貴。
三房公寓位於離市區15分鐘車程的山坡上，單位在多層住宅大樓的地下，連後園。室內裝修跟之前的住宿一樣，北歐簡約風，全屋IKEA家品，提供基本廚具，有洗衣乾衣機，步程10分鐘到大型超市，好方便。不過廚房zinc盤去水位甩左，搞到周地水，抹左一餐。不過幸運地從窗外睇到極光，離補哂一切的缺點。
最後一日在冰島，輕鬆市內遊。去左昨日經過又感覺吸引的餐廳午餐後，往藍湖出發。冰島其中一個重中之重的景點對於我毫不吸引，去之前已經無想過要浸溫泉，去到更加堅定我的想法，一個似九龍公園室外泳池般的温泉，熱鬧非常，唔係我杯茶，選擇喺旁邊的步行徑行下就算，可幸當日天氣好，見到tiffany blue 的湖水襯藍天白雲，都算心曠神怡。 之後去The Icelandic opera 參觀，好喜歡的一座建築物。晚上就精彩了，喺Grótta Island Lighthouse 睇左一塲極光盛宴，記得當晚好興奮，極光在180度的天空上亂竄，睇都睇唔切。我對住美魔女係咁叫 : 粉紅色呀！我睇到粉紅色呀！同太后興奮地大叫大笑，係咁叫駕駛員唔好影相，用肉眼睇好了，此情此景，永留心中。極光為冰島之旅劃下完美的句號，感謝上天。
早餐後離開草帽山往旅程的最後一個城市- 雷市（Reykjavík）進發。先往景點Gerðuberg Cliffs ，去到又係見到一大幅六角柱崖，無乜興趣，正想離開之際，見有人在崖頂爬落嚟，我當然爬上去一看究竟，結果原來別有洞天。之後喺電影’The Secret Life of Walter Mitty’場景之一的加油站餐廳食個午餐就直駛雷市。到達後參觀教堂Hallgrímskirkja，行下街就去住宿check in。晚上就精彩了，居然夢想成真，喺屋入面望出窗就見到極光！幾個智障喺停車場忍唔住叫左出來，失禮哂，詳情就睇相內caption 啦。
繼續斯奈山半島Snæfellsjökull之旅，其實整個半島圍圈行，除左已定的景點以外，見到有人停車的景點又死唔蝕底去睇下，加埋夜晚睇極光，全日行程超額完成，斯奈山半島Snæfellsjökull都算係一個不錯的旅遊點呢。
是日為斯奈山半島Snæfellsjökull環島遊，一早食完早餐就出發，先到草帽山Kirkjufell Mountain ，沿途見到冰島馬又落車影下。草帽山Kirkjufell Mountain又叫教堂山， 係觀賞極光熱點，草帽山造型奇特，真係好似一頂草帽蓋在平原上。行個圈影幾張標準相就走。又到午飯時，經過小鎮Hellissandur見到有間幾精緻的小屋餐廳，坐底開餐，店主話鎮入面有好多牆壁畫，餐後行入去睇下，又真係幾靚。
太后欽點為全程最舒適的住宿，比之前的洋房更高分，因為實在舒適。住宿設備齊全，服務貼心。應該係agent管理，同之前所有住宿一樣，我從訂房到check out從無見到任何人，但住宿負責人喺入住前一星期，入住前兩天到入住的一天，離開的一天都會比email通知或查詢我有乜需要，雖然住宿處所有設施及附近環境已有詳細指示及説明，我已無需再提出任何要求，但受到關注仍然係感覺良好。
來到冰島北部，其實無乜概念，因為一路參考別人的遊記都係沿路睇瀑布同石頭，呢邊有海獅睇，諗住睇完海獅就走，原來睇海獅係喺Vatnsnes半島，景點散落在半島沿岸，繞一圈車程要一個鐘，包埋遊覽時間，最好預半天。
Guesthouse位置偏僻，處身荒野中，就似旅途中的一個驛站。佈置簡單，温暖的小木屋，雖然有餐廳，但只提供早餐，晚餐只於夏天提供。入住的朋友要注意，因為方圓十里都應該無嘢食，我租住apartment，有廚房就無問題，若入住公共浴室房間的朋友就要注意。
離開Hjalteyri再繼續行程，沿海邊行，穿過幾個山(隧道)到達Siglufjörður，一個寧靜小漁港，鎮上雖然冷清清，但有捕魚博物館，又有酒店及旅館，夏天應該係旅遊勝地。我地來到嘆個午餐，再行個圈就離開，一直往今晚的旅館。
離開Akureyri 市繼續往北走，plan行程時呢兩日係留白的，因為網上資料唔多，我要環島遊，反正一定要經過，所以打算來到再揾當地人介紹，幸運地昨日在觀鯨小鎮旅遊中心的小姐介紹我來Hjalteyri，給我一個難忘經歷。剛進入小鎮時見到一片荒涼，失望不已，不過反正有時間，即管行個圈，走入小鎮至發現海邊有個hot tube bath ，問問當地人，原來係供公眾使用，當地人仲好友善地叫我地試下，又介紹我地使用設施，好好人。我同美魔女立即二話不說去車尾箱開喼攞泳衣，駕駛員當然無興趣，繼續航拍，太后照舊煲劇。當日天氣好好，我地一路浸住熱水，仲遠距離睇到鯨魚噴水，爽YY，今次旅程其中的一個美好回憶。
今日去觀鯨，聽講在觀鯨季節（5-9月）喺Husavik睇到鯨的機會率有90%，一於參加。太后怕暈船浪，加上喺紐西蘭睇過「咪睇隻嘢突個頭上來再落番水，有咩好睇？」所以佢送完我地船就返上車煲劇，我懷疑若有人問佢冰島有咩好做，佢會答 ：煲劇😓。
當日天陰陰，但好彩海面平靜，無暈船浪，我睇blog有d人遇到大浪，嘔到九彩。我地亦都幸運地睇到鯨 ，好開心。
呢間經Airbnb 租的屋在半山，對岸就係Akureyri市中心，景緻迷人，呢兩日一於做個上等人。太后對大屋一見傾心，好開心，未入屋已經要影相，全屋好乾淨，有洗衣機(無乾衣機)，廚具齊全，雖然無見到屋主，但屋主已經詳細寫低屋內所有設施的使用方法及要注意事項，非常貼心。Apartment無改錯名，堅係’Great 3 bedroom apartment with amazing view’ 美中不足係我地住下層，美景無左半截，唯有用對腳行出少少，企喺山坡上欣賞美景。
繼續行程，到達米湖温泉，當初心想避開藍湖人潮，來米湖泡温泉會較清靜，但來到後睇到個温泉似游泳池的感覺，實在提不起勁浸，望下就走。再去熔岩黑色城堡Dimmuborgir ，感覺似迪迪尼樂園的魔怪城堡花園真實版，興趣不大，行個圈就走。趁日落前去到Goðafoss，瀑布雖然唔高，但逞弧型，好闊，水量澎湃，好壯觀，駕駛員可以玩航拍，滿足哂(航拍片段在留言)。之後去今晚的住宿，在美麗的日落晚霞下結束忙碌的一天。
米湖一帶位於地熱火山區，區內有好幾個景點，串埋一齊統稱鑽石圈，景點全部相隔不遠，可以安排一日去哂，若你想浸埋米湖温泉，建議住一晚，唔使咁趕。其實除左兩個瀑布，其他景點都唔太吸引，所以我好快行完。
香港食食食 (25) 遊世界 (0) 漫步香港 (3) 小書架 (1) 私影院 (1)
