原本想睇綉球花，但昆明市昨晚已開始落豪雨，因為市內的去水基建不足，所以好多地方水浸，師傅話今日未必可以出車，唯有等消息。因為水浸，連酒店的電梯都壞左，死好命剩番貨𨋢頂住，順利落樓下食早餐，之後師傅話可以出車，但去唔得遠，所以去左書店。食完晏後，雨停了，道路似乎通順了，於是把握時間怱怱睇完綉球花田就去斗南花市。
昆明斗南花市係全亜洲最大的鮮花交易市場，規模極大，內有大廣場及多幢樓房，成個小區咁，行幾日都行唔哂，我只行左一小部分已腳軟，見到各式各類不同品種植物，人來人往，電單車及小貨車不停穿插，非常熱鬧，睇得好開心，絶對係大開眼界！食過晚飯後就回酒店休息了。
我實在厭倦左當地食物，麥當勞成為左我的救生圈。不同地方的麥當當有不同食物供應，呢度有粥食，我點左個健康卷早餐，當然係好唔健康啦
一路浸哂，龜速行車
好不容易去到書店
國內的大型書店總係好舒服，唔捨得走
好驚喜地原來我喜歡的作家吉竹伸介做緊展覽會❤️
點可以失手勢？買番幾本先
遠在昆明的書店居然有免費送貨回香港！深圳都無的服務！團友更加搏老命買，呢度只係一小部份。
團友行到唔捨得走，我去飲咖啡好了，而家國內的咖啡店大大細細都好靚
求其喺商場內食午餐，都係嗰d，殘念～
團友終於睇到堅持要睇的綉球花田，幾靚，個落雨濕濕又四處泥濘，偏偏我著左條裙及白色鞋，行到忌住忌住，搞到無心機影相
昆明斗南花市，入到場內，乖乖不得了，規模大得令我倒抽了一口涼氣！好似睇唔到盡頭的花檔，以花種分開，玫瑰一堆、百合一堆，品種多樣化，目不暇給，最重要係超級平！若住喺度真係可以日日買花戴了。
真係買花戴㗎，有花環賣，團友買左，叫我一齊買，我未夠仙氣，留番比佢
附近的巴士站都以花裝飾
晚餐，上天彷彿聽到我的許願，終於可以唔使食重口味的當地菜，涮羊肉清淡得來又有大量蔬菜，好開心
晚上經過商場，見到呢間賣牛奶的店，年票要萬幾銀！原來牛奶店於郊外自設牧場，引入英國種乳牛搾取牛奶，每日新鮮運到店內，國內人真係有錢又講究，我等港燦飲北海道3.6都負擔不起。
香港食食食 (25)