今日繼續Safari，天未光就出發，八月份的坦桑尼亞早上清涼，要著風褸。架車喺酒店駛出來轉個彎已見到獅子伉儷想交配，係想咋，等左一陣見無動靜我地就走了。沿路見到不同動物， 之後領隊收到風話附近發現一大群獅子，結果大家都蜂擁而至，最後亦不負眾望，一大堆獅子有老有嫩，遂一從灌木林中行出來，再去樹下休息，其中一隻仲喺車群中左穿右插，令我大開眼界。
午餐後再繼續喺大草原搵動物，今日收穫豐富，除左獅子伉儷、獅子一家，仲見埋獅子三兄弟，真係獅子看到飽。之後仲見到大象、長頸鹿、獵豹，滿載而歸。
太陽開始落山，應該係返酒店的時間，領隊話要同我地揾埋金錢豹，仲將架車駛上山，我心諗使唔使咁落力，因為真係幾攰，想番酒店休息，點知原來酒店喺山頂上準備左一個小小的營火會，大家喺火堆旁，望住山谷中的水牛群，一邊飲酒一邊食小食，好夢幻，就咁結束豐富精彩的一天。
天未光就起身食早餐，隻蛋即煎㗎
望住草原嘆埋杯咖啡就出發了。
酒店有好多雀
出發~
一出去就見到獅子伉儷，領隊話佢哋喺度交配，會搞足7日，不過唔知係咪多人望住，之後佢哋走咗入草叢
羚羊係基本會遇到的動物
澎澎一家喺水氹玩水
香腸樹 (sausage tree) 果實似一條條香腸掛喺樹上，未見過，好特別
領隊沿途會互相交換消息，大家分享動物的位置
好近的獅子！
一大堆獅子行哂出來喺樹下休息，領隊話好少見到咁多獅子喺埋一齊，我哋好幸運
其實我哋見到獅子遂隻行出來，似行cat walk，好得意，遲下片睇
之後愈來愈多車，無諗過非洲都會塞車，我哋好彩早到，揾到靚位
再上路
水牛的白骨
午餐時間，有特定用餐地點，設有餐枱椅及洗手間，似香港的郊野公園
酒店pack 的lunch
餐後又開始揾動物。其實有時都幾悶，始終呢度唔係動物園，唔會不停地見到不同動物，有時行成個鐘都無乜嘢睇。就係咁一片又一片乾草
傘形樹好靚
若你想知邊度有動物出沒，通常見到一大群車圍住就係一個指標。
又見獅子，今次係三兄弟瞓覺
原來係食飽左
呢隻食完去飲水，個肚勁漲
獅子出沒地帶，兩隻羚羊背對背站崗，構成一幅美麗的圖畫
遇到大象群
幾近㗎，仲貪得意伸腳玩下
點知愈行愈近，仲好似想噴我，驚驚。
長頸鹿後面係大象，不同動物喺埋一齊，咁先係大自然。
水牛
水牛的好朋友
safari 尾聲，唔知係咪領隊見到個個呆哂，佢突然將架車駛埋一隻獨自休息中的獅子旁，好快咁轉一個圈，要知道我哋駕車無遮無擋，突然同獅子咁近距離，即時醒晒😳
上天臨尾派埋個尾彩 ，居然睇到難得一見的獵豹，喺草叢中開餐，用望遠鏡睇，見到佢成口血
日落歸家了
以為番酒店，原來去營火會，雖然好攰，但一見到呢個setting 即時興奮番
喺荒山野嶺嘆美酒，感覺奢華
是日戰績 ： 成塊面黑色的
今日見到的動物
請先 登入 以發表留言。