Foodie 生活雜誌

2026 雲南滇南遊 遊記篇 Day 1

行程：香港 →  深圳→ 昆明

今次喺深圳上機，機票平啲， 班次選擇多啲 。唔想早起身，揀下午機，book架中港七人車，接埋幾位團友，由香港直上深圳機場，公司職員服務好好，之前溝通好日期時間地點，出發前一日發送接車的資料，包括車的型號，司機電話號碼等等，好詳細，落車付款。職員明白我有旅遊焦慮症，幫我預埋時間，好細心。舒舒服服，非常方便。之後飛兩個半鐘就到昆明。機場攞車後直去市區酒店check-in，搞完一輪已經係晚飯時候，飯後喺附近行個圈就返回酒店休息。

深圳機場，乾淨、先進、現代化。過air security  檢查較嚴格，建議預多少少時間。

禁區外的餐廳冇乜好食，禁區內的餐廳好啲。

兩個半鐘機都有飛機餐，時間過得更快，感覺櫈都未坐暖就落機了。

機塲取車，駕駛員今次幫襯一嗨，話唔使比咁多按金，取車程序快捷方便，當日我哋比預訂時間晏左攞車，店員話我哋踏入取車優惠時段，主動幫我減費，慳左二百幾蚊。

最緊要舒服，四個人坐七人車，放完四件大行李仲有大把空間。

機場往市區行高速，道路又濶又靚

先到酒店，我係朵粉，去國內旅行，市區酒店通常揀亚朵。今晚入住昆明南屏步行街老街亞朶酒店，樓下就係食街及商場，背後係老街，超級熱鬧方便。酒店提供免費泊車，泊去對面停車場。

間間亚朵設施一式一樣，夠穩定，住得安心。

見到樓下牛肉餅檔排隊，死唔蝕底買返個，都係九龍城清真牛肉館好食d

晚餐去酒店小姐介紹的老店，老宅改裝，地方係唔錯，不過雲南菜式口味偏重又辣又油膩，之前兩次雲南之旅都唔啱食，打定輸數，近年可能遊客多左，覺得調味輕手左。

有夜櫻，係真花呀😜

飯後行老街及步行街，整個範圍好大，有歷史區又有文創區，同其他國內大城市差不多，我懶得影。

云南白药係名物，陀地更有生活館，入面補品藥妝一應俱全，原本想買盒mask，精明團友上淘佬一搜平一半，所以shopping的終點就在淘寶。

而家去國內喜歡行超市，貨品種類多，有咁細支啤酒，幾得意

口痕，買包馬蹄做消