非常好的住宿體驗。整間酒店無論房間內的用品、環境、擺設、庭園設計、全酒店的佈局，皆為精品，連牆的角位都批成圓邊，無起角，睇得出主理人對所有事情有要求，有一種「我覺得好的要跟客人分享」的感覺。房價唔平，但絶對物有所值。酒店只開業一年左右，所有設備都新淨，希望酒店能繼續保持水準👍🏻
房型 : 竹影雅居大床房
地點及交通 ：距離宜興火車站五分鐘車程，門口有巴士站。酒店附設停車場，免費泊車。
附近環境 ： 酒店外面係大馬路，但一行入酒店係另一個世界，附近好靜，要買要食就要坐車出市區。
房間設施 : 酒店只有17間房，房間佈置簡約優雅舒服，所有傢俬、家品、洗漱用品全部高質，我好鍾意。
酒店環境 : 酒店內有竹林、茶室、藝術館，用大量石材及綠色植物佈置，似日本京都的氛圍。通往房間的走廊有氣派，仲有户外沏茶地方，好有休閑感。
餐飲 : 餐廳菜式以當地食材入饌，有心思。自助早餐豐富，晚餐(自費)美味，下午茶精緻。
服務 : 24小時管家秒速回覆，服務殷勤有禮，熱度恰到好處。見酒店所有角落一塵不染，所有擺設裝飾一絲不苟，所有細節加起來就令人感到團隊出左好多力去維持。
一室米白，床單係純棉，梳化套及窗簾係麻棉，觸感舒適
帶粗獷感的木系傢俬點綴房間，對應窗外一片竹林，有天然感。燈光柔和温暖。
露台只有竹椅及枱燈
貓管家來同房客打招呼
衞浴以石材為主，法國南部鄉村小屋的感覺
茶花香的洗護用品、香氛都係法國品牌，一次性洗漱用品都唔馬虎，剃刀係木柄，毛巾柔軟，我就係喜歡呢啲細節位。
拖鞋及浴袍質量都好好
零食飲品都有質素（旁邊兩支酒要錢）
杯具用超薄玻璃系列，茶匙都好靚。沏茶的茶具有藝術感，like
晚上開床服務，放好拖鞋耳塞眼罩，已成為高級民宿的基本服務
酒店房間集中在獨立樓房內的兩層，設計似博物館，氣氛寧靜，環境優美。
離開時送的記念品
餐點亦見心思。歡迎小點，只有清茶加幾粒生果，但擺盤精緻，加分
早餐係自助餐，食物豐富，好多當地食材，餐枱上的食具及擺設都有高級感
晚餐色香味俱全，不過好飽
請先 登入 以發表留言。