一早喺旅館check out後，去「熱乃湯」睇湯揉表演，以前點都唔會睇，唔知點解而家成日都做一啲好遊客嘅事🤪睇完後喺附近行個圈就返旅館攞行李坐車去四万溫泉。
群馬県有好多温泉，去過好幾個，今次去完草津想揾多個附近的温泉，結果揀左四万。以為好近，原來由草津溫泉去四万温泉的交通好煩，無直車，要坐巴士轉火車再轉巴士，又要就班次時間，唔想煩，call的士就算，都要坐成個鐘㗎。去到温泉旅館check in後行去温泉街，重頭戲當然係去吉卜力動畫「千與千尋」的著名場景「積善館」，講真無乜feel，喺隔離餐廳食午餐，之後諗住行下温泉街，可能係平日，温泉街好靜，好多店舖都無開，而且温泉街有點年紀，店舖幾舊，好多更加執左，所以好快行完就番旅館hea了。
反正有時間，去睇表演
以為早場無乜人，點知都係排長龍，草津的熱鬧真係名不虛傳
兩層看台坐滿人
睇片介紹完草津温泉就開始表演，幾位女將老中青年紀都有，最老的應該超過七十歲，不過慶幸有年輕人入行。
咪以為幾位只係跳舞唱歌反下塊板，原來呢個深蹲翻湯的功架好勁，我喺之後間溫泉酒店試過，根本連水都撥唔起。
睇完表演出去行個圈，見到自家種擺檔的士多啤梨，買來食下，清甜好味
仲諗住睇櫻花，點知原來雪都未溶。
原本想住呢間酒店，以為好遠，原來就係喺煬田後面，之前無行過呢邊，見到呢一區的神社同埋建築都係新的，應該係新開發區。
小山坡上有Cafe同埋小商店，而家啲旅遊區似乎全世界都一樣。
小山坡上網返落去草津的景色
最後行多轉湯畑
草津始終有當地人住，所以仍然民生店，我幾鍾意呢啲舊式百貨店，好多得意嘢睇，我買左支洗潔精🤣
起程了，從草津坐的士去四万溫泉大概20,000円左右，好過轉來轉去，叫酒店幫忙叫車就得。
先到旅館check-in
喺旅館行十零分鐘就會去到溫泉街，沿途都好靜，冇乜人。
呢間咖啡店好似幾好，當然又係無開，第二日就買到😁
成個四万温泉，我見到最靚的就係呢個景。
河邊有個公眾溫泉「河源之湯」，我冇浸不過要八卦下
積善館。除咗因為千與千尋出名之外，其實佢都係一間好有歷史價值的溫泉旅館，保存得好好，依山而建，佔地幾大。不過我冇入住，冇乜感想。
沿途一間餐廳都冇開，好彩去到積善館旁有間餐廳，即時開餐先，因為三點又關門。每次去親比較少人的温泉鄉揾食都係困難的。
食完飯喺附近行吓，又係靜英英，感覺好淒清咁
呢間係法國餐廳，感覺好蕉，咁佢當然係冇開啦。
香港食食食 (25)