Foodie 生活雜誌

2026 雲南滇南遊 遊記篇Day 8

行程：哀牢山 - 昆明

旅程進入尾聲，返回城市昆明。今個旅程主要係想賞花，可惜去到邊都話我來遲了，點知去到昆明就係不早不遲 的剛剛無花的日子，早一星期有櫻花，晚一星期有藍楹花，唔該哂🙄既然上天無安排，咁就自己揾花園啦。比我揾到撫仙湖有個花海，預左係照騙，去到都叫做有一幅花田，我都做個騙子，努力揾角度影騙照，自娛一番😝影完去酒店check in，晚上入鄉隨俗食個野菌火鍋，咁就一日。

離開哀牢山

再見橙田山

2026 雲南滇南遊 遊記篇Day 7

行程：哀牢山

民宿位於哀牢山內，附近都係新開發的景區，比較適合自駕。原本打算去五門峽、南恩瀑布、金山原始森林，午餐食羊肉，行程好豐富㗎……結果又係唔夠時間，只去咗睇瀑布、行森林，之後就返民宿hea。入住喜歡的住宿就係有呢個麻煩，因為唔捨得出去🤪

一早喺咁優美的環境望住花園食早餐，舒服

出發，先往南恩瀑布，瀑布好細，而且水量不足，無乜睇頭

2026 雲南滇南遊 住宿篇

樹幾山舍（雲海日出觀景台店）@哀牢山

民宿位於哀牢山景區的村莊內，自駕前往時地圖指示一直往山裡的小路走，完全想像唔到會去左邊。民宿風格似法國鄉郊別墅，環境清幽，木製傢具，磚牆水泥地，以天然建材裝修，加入花藝及小物佈置，樸素清雅，燃點住淡淡的香薰，整個氛圍好舒服。

房間以暖色佈置，温馨舒適，員工有禮，招呼周到。民宿的賣點係觀賞雲海，初初以為喺房間已睇到雲海，原來要行15分鐘左右去觀景台睇，不過入住的時候旺季已過，無雲海，民宿亦會關閉維修，我哋係當季最後一組客人，所以好似包楝咁，自由自在。今次住左三日兩夜，早午晚餐都喺民宿食埋，仲有臭臭同合桃兩位可愛的寵物公關，入住體驗非常滿意。同一老闆將於昆明再開店，希望到時候能入住。

先經過花園，可惜三月仍未開花，開滿花一定好靚

2026 雲南滇南遊 遊記篇Day 6

行程：元陽- 玉溪戛灑 （全程4小時）

懶洋洋地喺民宿食完早餐至起程。今日又係移動日，去一個連名都唔識讀嘅地方 :戛灑。又係一個為住宿而去的地方。結果停左喺一個類似東南亞的街頭飲杯嘢，然後上咗山頂買橙，最後入左山入面條村就到目的地，全日都唔知自己去咗邊，沿途停下影下，最美的風景都在路上。

行高速公路期間一路上見到山坡有好多鱗片一樣的太陽板，連綿不絕，喺一片荒蕪的山坡上建造咁大型工程，一路睇一路讚嘆工程的偉大。

後來同朋友傾開，原來係中國在荒漠化治理上的智慧結晶。能源板除左採集能源，仲改善左生態環境，因為原本光禿禿的山，起咗能源板之後，太陽板下面居然長出咗綠草，供附近的牛羊食用，解決左生蓄的糧食問題，牛羊食草又解決左雜草遮擋面板的難題，做成牧光互補，好厲害👍🏻

2026 雲南滇南遊 遊記篇Day 5 (下篇)

行程 : 元陽哈尼梯田

遊覽完多依樹梯田後就去阿者科古村落，古村內裡仍有當地人住，要收入場費，入場費係居民收入之一，又可以保育，對於貧困的農村來講係一件好事。黃昏時返回藍色梯田旁的餐廳食住火鍋睇日落，今日真真正正由日出睇到日落。雖然景區內有好多不同觀景台睇日出日落，可以影到好靚嘅相，但我一見到人潮就驚，呢個行程舒舒服服至啱我。

傳統建築，屋頂以草蓋建，似藍精靈的小村落。

2026 雲南滇南遊 遊記篇Day 5 (上篇)

行程 : 元陽哈尼梯田

上次去桂林龍脊見到梯田好靚，可惜無灌水，今次plan雲南之旅的時候想起元陽梯田正值灌水季節，決定過來睇下。元陽梯田係全中國最大的梯田之一，每年11月至三月灌水，一級級的梯田灌滿水後，倒影着天上的顏色，天藍時梯田係藍色，黃昏時變成金色，不同時間有不同的美。我今日所有節目都係由上天安排，一早起身睇日出，感謝上天賜我雲海日出梯田美景，睇完後再補眠，瞓醒至出動。先去cafe 食lunch，再遊覽

多依樹梯田景區

天未光就起身等日出，估唔到咁好彩有齊雲海梯田同日出，實在太幸福，感謝上天🙏🏻其實雲海下面都係梯田，睇吓d雲就知

2026 雲南滇南遊 住宿篇

生田·漫山來｜多依樹梯田雲海日出觀景民宿@元陽

民宿完全無辜負佢個名，住喺度，梯田雲海日出觀景睇哂。民宿分三幢，每間房景觀一樣，只係高低及角度不同。民宿就喺梯田旁邊，可以行落梯田，近距離欣賞，但變相睇唔到整個山勢。房間包早餐，晚餐另點，食物OK，我冇要求。服務非常之好，小哥們服務殷勤，前台微信秒覆，早上有車接載往觀景台睇日出，入住經驗滿意。

民宿分三棟，景觀一樣，但係座向唔一樣，角度點都有少少唔同，我冇特別研究，揀啱自己住的房就得。

大床房。一般民宿的setting，房間清潔整齊光猛，我為左個景，其他細節嘢冇研究。

2026 雲南滇南遊 遊記篇 Day 4

行程：彌勒 - 建水 - 元陽哈尼梯田

今日係移動日，全日行車五小時，行吓停吓，冇景點。本身已經要行五個鐘車，點知入錯GPS行錯路，差點去左下一間民宿，行左成個鐘至發覺，我都一額汗，好彩早發現，若去左下一間民宿至發覺，當日應該要揸八個鐘車，完全係低級錯誤，苦了駕駛員。喺高速公路休息站碰到一家幾口經營咖啡車及小食店，裝飾用心，氣氛悠閑，傾談之下，又係一個暫停開始過的故事，雖然話無景點，但沿途遇到的人和事都係一道風景。

由於一路行高速，沿途無餐廳，個肚開始打鼓，決定落去建水古城食午餐，因為要趕路，食完碗雞湯飯就匆匆離開，其實古城係一個好出名的景點，可惜今次有緣無份。再上路，日落前進入哈尼梯田，行下影下，到達民宿稍事休息已經係晚餐時間，今日長途跋涉，喺民宿食埋晚餐就休息了。

離開酒店後開車，嘆住昨日買的藍莓，原本係他條mode

2026 雲南滇南遊 住宿篇彌勒東風韻美憬閣精選酒店@彌勒

我係因為呢間酒店而來彌勒，之前彌勒呢個地方聽都未聽過。酒店喺東風韻景區內，外型設計特別，分開幾楝樓，主樓係一個圍繞式建築，似福建土樓，另外幾個建築外形肥嘟嘟，帶點童話感，整間酒店本身已經係一個景點。紅土外牆跟對面東風韻景區的建築互相呼應，酒店空間感大，佔地廣，早餐豐富。房間裝修使用天然建材，感覺舒適。員工服務非常好，主動幫忙解決問題，酒店內的golf cart隨傳隨到，小哥們服務細心有禮，下雨天時，駕駛員泊車後，小哥已無聲無息企响車旁為駕駛員撐傘，遮佢返回只係幾步路的酒店大門，好耐無享受過如此貼心的服務。

請進房

房間寬敞，有露台，燈光配置唔錯，床褥舒適

衞浴面積大，浴缸夠大夠深，浸得舒服

2026 雲南滇南遊 遊記篇Day 3

行程 : 摘藍莓 - 太平湖森林公園 -東風韻

近年香港多咗雲南出產的藍莓賣，我未食過，但團友剛剛食左話好清甜，心心念念要去原產地即摘即食。早餐後出發去藍莓田，唔覺唔覺都玩左兩粒鐘。之後去太平湖森林公園睇花，當然櫻花又唱「走先啦係咁先」。不過冇櫻花都有一大片小黃花，唔理乜嘢花，總之一大片就係靚。公園好大，整潔乾淨，規劃得好好，裝飾簡單可愛，唔似以前整隻老翻米老鼠或閃燈，整件事居然有高級感。離開公園後回酒店對面的東方韻景區行吓，再返酒店稍事休息就去食晚餐。嚟到雲南梗係要食羊肉，同朋友仔去食湯羊肉鍋，佢哋未食過，覺得唔錯，食完飯返酒店途中經過大型夜市，至知道昨晚自己去錯咗。不過都唔行了，間酒店咁靚，要返去嘆吓。

彌勒有葡萄酒莊園，我無興趣，不過往藍莓田途中經過葡萄大道，兩旁都係葡萄園，唔飲得都睇得。

原本去酒店姐姐幫我搵的藍莓田，諗住店主未覆都去咗至算。點知原來沿路已經好多農場，合眼緣就入去。

2026 雲南滇南遊 遊記篇Day 2

行程 : 昆明 -宜良櫻花谷- 彌勒

早上喺老街食早餐後出發往宜良櫻花谷，點知櫻花因為昨晚的 hi大風雨吹掉了，售票員好風趣，話櫻花等左我好耐都唔來，等到昨日終於走了，令到失望的我都覺得窩心。不過一塲來到，照入去好了，結果又唔錯喎，見到月季花同白藤。櫻花雖然唔係滿開，但都叫有。午餐喺宜良市食烤鴨，新鮮出爐，一隻收32人仔，平到我比錢時都窒左一窒。之後直接去彌勒的酒店check in，酒店喺景區內，設計特別，只係參觀酒店都用左一段時間。晚餐去夜市，點知去錯左個小型夜市，揾唔到食，唯有掃街，草草食完一餐好了，團友話同我去咁多次旅行都未試過掃街，真失敗，不過駕駛員好開心，因為佢係味精人，啱哂。今日行到好攰，早點返歸休息好了。

酒店樓下就有車仔賣早點，當地居民的日常，但我實在唔習慣一早食得咁heavy，無法做到入鄉隨俗

作為一個西(衰)人，梗係要來杯啡，食個三文治。呢間cafe昨晚已把中，但只有咖啡蛋糕，無簡餐。好彩今時唔同往日，我知道可以去其他餐廳點餐，所以去隔離點三文治，叫佢問使pack，成碟上👍🏻

2026 雲南滇南遊 遊記篇 Day 1

行程：香港 →  深圳→ 昆明

今次喺深圳上機，機票平啲， 班次選擇多啲 。唔想早起身，揀下午機，book架中港七人車，接埋幾位團友，由香港直上深圳機場，公司職員服務好好，之前溝通好日期時間地點，出發前一日發送接車的資料，包括車的型號，司機電話號碼等等，好詳細，落車付款。職員明白我有旅遊焦慮症，幫我預埋時間，好細心。舒舒服服，非常方便。之後飛兩個半鐘就到昆明。機場攞車後直去市區酒店check-in，搞完一輪已經係晚飯時候，飯後喺附近行個圈就返回酒店休息。

深圳機場，乾淨、先進、現代化。過air security檢查較嚴格，建議預多少少時間。

禁區外的餐廳冇乜好食，禁區內的餐廳好啲。