Foodie 生活雜誌

呢兩日無乜行程，主要留喺住宿內，所以夾埋兩日寫。

離開波波glamping後去洞爺湖，今晚租左山上一間小屋，要自煮，喺超市買埋餸去。去到小屋超鍾意，我玩煮飯仔，駕駛員玩航拍機。晚上仲可遠眺洞爺湖的烟花，再睇埋星星，賺哂🎉

第二朝依依不捨的離開小屋，出發去下一間温泉酒店，中間無plan任何景點，見到鍾意就停，駕駛員就哂我，好free。途中經G神介紹去左香草園食lunch，乾花田園小屋，開正我嗰範，之後行下影下。晚上入住好似博物館一樣的坐忘林温泉旅館。

一早離開富良野，呢個滑雪場，今年應該好多人去了

天陰陰

經過PA，見到呢包蒜頭咁靚，真係想買番香港，C9本色😅

之後仲落埋雨，好凍

去超市晚餐食材

午餐食湯咖喱，燒羊同湯咖哩都係北海道名物，但我嚟左咁多次都無食過，相信有排唔會再來北海道，一於試下，又幾好食。

來到山上小屋，北歐式設計，內裡的裝修及用品全部都係我心水，可以話係dream house，會另文介紹

天氣好番了，我地坐喺度欣賞湖景

駕駛員駕飛機

我煮飯，今晚整雞腎炒青椒及豚肉丼，日本的青椒真係幾好食，本地買更平靚正

呢餐飯煮左兩個鐘，因為唔識用個上等電飯煲

晚上仲有烟花睇

北海道必食蜜瓜

食完出外散步睇滿天星

青蛙來訪

第二朝望住個湖食早餐，心情舒暢

影埋張扮嘢睇書相就要走了。本來我想訂多晚，可惜小屋太受歡迎，滿哂。

去洞爺湖行下，好靜 。入面的温泉街似有點舊。