Foodie 生活雜誌

4/2021光顧

餐廳開業時由日藉chef主理，主打西日料理，當時想試但又唔捨得，始終千八蚊一個set，睇相又似食唔飽。時移世易，餐廳已改為日本餐廳，網上風評不俗，加上有foodie友介紹，所以遠到西貢都來試下。餐廳環境好好，食材高質，食物味道唔錯，師傅之前做開懷石料理的廚部，睇佢握壽司的手勢都知唔係師傅級，若以鮨店標準去食會失望。今次我食Omakase set，有壽司、刺身，雖然只得一項炸物，但做得幾出色，師傅都話佢做料理比較好，有機會再去的話，我會叫師傅自由發揮，我有乜食乜，睇下會唔會有驚喜。

前菜 ： 螢光魷魚、菜花、蝦、牛蒡、蕯摩蕃薯、麻醬拌菜、糖漬合桃。食物味道好，呢個時候食的螢光魷魚好多膏。

刺身5點 擺到靚靚咁，按次序食 : 長哨八爪魚、深海池魚、牡丹蝦、生蠔、拖羅。

估唔到呢度的刺身質素幾高，比出面好多中價鮨店都好，生蠔配蕃茄蒜蓉汁，加點魚子，西日feel，幾欣賞個處理手法，蕃茄sauce輕身帶少少酸，魚子咬開的卜卜口感，夾落生蠔一齊食，無搶到蠔味之餘反而可以提升鮮味，唔錯。拖羅輕輕火灸，配白味噌，甜甜地的味噌加肥美toro，口感豐腴，唔似食刺身但又有鮮味，配搭唔錯。

天婦羅 太刀魚本菇柚子味噌卷、鮑魚 原本想將炸物換燒物，但燒物係A5和牛，興趣不大，唔改了。點知炸物有驚喜，鮑魚質感非常柔軟軟糯，口感好好。肉質肥厚的太刀魚係我喜愛的魚類之一，師傅用魚肉卷住香菇及柚子味噌做天婦羅，肥美得來毫不油膩，好好味。因為呢度菜，令我想來再試師傅其他心思菜式。

壽司五點 （另送5點）白蝦、活北寄貝、左口魚加左口魚邊、帶子，海膽真鯛、拖羅x2、和牛、白蝦海膽，吞拿魚卷

壽司幾好食，但唔好set太就標準，見到件北寄貝濕淋淋就明，若唔睇師傅握壽司會更好，食第一件時，見師傅要握好多手至得，我心諗實死梗，點知食落口又ok，可能我對壽司要求唔高。

話說幫襯當日師傅好忙，有幾個客人遲到，但又要趕住走，搞到師傅節奏亂哂，我怕師傅趕得滯影響我的壽司水準，叫佢做好其他人的至專心做我的食物。可能佢見我等左好耐，結果做多五款比我，我的等待係值得的，覺得扺哂。

大蜆清湯 介紹話用石神山水煮，唔知係咪心理作用，覺得水質滑d😜清湯鮮甜，大蜆肥美，又一次覺得熟食有料到。

甜品 什果清酒啫喱 原本得杯啫喱，因為提佢未上湯比我，結果之後加多粒馬卡龍，我貪小便宜就梗㗎啦，其實我係好欣賞師傅知道自己有失誤，除左道歉外仲會用行動表示歉意，令我做客人的覺得舒服。

呢個係晚餐menu，但若提前預訂，午餐都可提供，我今次食set A，若照原本份量，我覺得係有點貴，但諗起平時喺銅鑼灣食lunch 要個半鐘還枱，呢度任坐唔嬲，環境舒適，又覺得可以(發揮自我認同感)

餐廳喺白沙灣碼頭 The pier 酒店旁，係獨立餐廳，唔附屬於酒店，幫襯餐廳可享兩小時免費泊車，但之後$60一個鐘😱餐廳外亦有錶位。

餐廳環境舒適，對住個海，雖然好多船，但都幾舒服。

食完飯後，我移師到外面吹吹海風，經理主動送我咖啡，等我可以有道具影相🤣結果睇下書，hea足一個下午，旁晚至走，當日飽到晚餐都唔使食，全日只食一餐，好慳家😜

餐廳後面係水上電單車租車塲，難怪見到咁多人玩。