Foodie 生活雜誌

2019丹麥遊簡報 : 

十五日十四夜的丹麥之旅 (包含德國Flensburg及瑞典Malmö邊境城市半天遊)，自駕遊路線為 : Copenhagen  - Aarhus - Vejie  (+Flensburg）-Copenhagen （+Malmö）

丹麥地方唔算大，行程集中在南部，每段車程最長都係三小時，唔算長途，就算我地得一位司機都唔算辛苦，加上每間住宿留四晚，有足夠時間休息，唔使成日pack 行李，搬來搬去，relax 好多

今次係親子遊，全部節目以小朋友興趣行先，丹麥好適合親子遊，今次我地去左博物館、藝術館、圖書館、科學館、LEGOLAND 同LEGOHOUSE ，大部份塲館18歲以下免入場費，其中小朋友只有科學館，LEGOLAND 同LEGOHOUSE 要付費(大人當然全部館都要付費) 。丹麥的展館地方大，設計有型，內裡玩意大人細路都啱玩，簡直係合家歡。三個小朋友對丹麥高度讚賞，唔捨得走。

天氣 : 7月尾8月頭的丹麥天氣原本應該如香港的初秋，十多二十度，可惜今年歐洲熱浪來襲，丹麥亦未能幸免，午間氣溫可高至二十八度，好彩天氣乾燥，唔似香港又濕又熱。早晚又降回十幾度，太陽極猛，曬到儍，印象中外國人好喜歡曬太陽，好少用遮擋太陽，不過連當地人都提我去LEGOLAND要擔遮。

衣著 : 大部分時間在市區，一般短袖T恤牛仔褲，加件風褸就得。

食 : 全程行到邊食到邊，亦有自家煮，今次帶住幾個小朋友，fine dinning 免問。餐廳質素一般，菜色選擇少，來來去去都係pasta 同扒，見到都悶，意外地見到有頗多壽司店，我都忍唔住食左一餐，結果係除左德國的一杯好啤酒，無遇到特別有印象的一餐。超市買的食材質素一般，最出色係丹麥豬，我地食左好多。丹麥位處寒冷地帶，好多餐廳無冷氣，就算有都好弱。

住 : 每次住屋安排都係行程重點之一，今次住宿全部經由Airbnb租，有大屋有apartment ，住過鄉郊、純住宅區、步行街上的apartment ，全部都好滿意。小朋友可以四圍走，好開心。

交通 ： 全程自駕，機場攞車還車，選中型MPV Volkswagen Caravlle 7 Seats  車型，非常濶落，成駕貨van一樣，載住四大三小乘客，三大一中兩小行李箱加六袋37L行李袋都游刃有餘，坐得舒服，高度推薦。油價同香港差不多，公路上有休息站，簡單cafe小食店都有，亦有油站，跟一般大城市的高速休息站差不多。丹麥係單車之國，自駕時要特別留意行車線與單車線並排，千萬唔好太壓右線，否則好易傷及單車駕駛者，我地有兩次差點撞親人。

電話卡 : 我用3電話卡，除左郊區公路上接收唔太穩定，其他地方都無問題，高登有售，約$160