Foodie 生活雜誌

一早出發，酒店check out後從高松坐火車往岡山，到步後去酒店放低行李就開始一日行程，今日只有兩個景點 : 栗林公園及仏生山温泉。從高松築港站出發，先去栗林公園，原本天氣報告話今日落雨，雖然天陰陰，但好彩最後只灑左一陣雨，後來仲放晴。公園又大又靚，係一個放大左的日本庭園，好有意境，我地只行南邊都行左兩個鐘，北邊要等下次再會了。 喺公園入面飲茶期間遇到一位從德國來，已退休的獨行旅遊人，一位女士，可能佢見我同太后同行，有點好奇，同我傾偈，傾偈唔出奇，最奇係太后居然大約知我地講乜，之後喺我行開影相時居然自己同人傾偈，而德國人又聽得明😱我check 過，無用紙筆無用google，雖然最後要我翻譯，但都覺得佢勇氣可嘉👍🏻

一早坐火車往高松

早餐，我最愛的飯團，呢間連鎖店好多車站都有，counter後係廚房，現做飯團，感覺新鮮

太后一聽到要坐成個鐘車，車上又無洗手間，立即出現panic 狀況，好彩有電子奶咀分散注意力

火車經過瀨戶內海大橋，對上一次係自駕經過，感覺不同

麵包超人便當，幾年前來好想買，今日再來，無興趣了，童真消逝。

去到高松車站，打算去碼頭買定明日往小島的船飛，去到至知原來只售即日票。其實今個旅程好大原因係想參予三年一度的瀨戶內海藝術祭，原本今日安排去豐島，點知plan行程時至知豐島的接駁巴士疏落，以單車代步為主，太后無可能踩單車，唯有放棄，改喺高松市內遊。點知原來當日往豐島的船因大風停航，真係天意。

於高松築港站出發，因為晏d會去埋仏生山温泉同去瓦町晚餐，所以買琴電溫泉乘車入浴券就最抵，票價包括1天內琴電由高松築港至仏生山站區間任坐、仏生山溫泉的入浴費，仲包一條仏生山溫泉的小毛巾。套票唔算慳得好多。

張車票係一把扇，好可愛。

小電車

太后的腦部結構奇特，從電車站行去栗林公園步程約7分鐘，太后心急，喺相中場景行行下居然問我 : 我地係咪已經喺公園入面？我只能驚訝地問佢係咪有病。

栗林公園

園內有好多松樹，好大棵，修剪得好整齊

松網

進園時遇上陰天，行得舒服但影相唔靚，離開時終於放晴，影相靚，但又曬又熱，要影靚相真係唔容易

小小的湖中島

茶屋小休。太后其實想入去，但知道要錢唔肯入，我唔理佢，照買兩份，佢唔想蝕錢就要入，呢招幾有用

小茶點

受環境影響，太后即時連坐姿都優雅左。

食完茶點後可進入屋內賞湖景

心型花圃

另一角度看茶屋

建築內有攝影展

太后有鋪癮，喜歡如此盗取版權