連埋轉機等侯時間，15小時後終於由香港到達冰島，難得太后仍精神奕奕，讚👍🏻。抵達後先去攞車，因為睇過網友分享話冰島的車損耗厲害，攞車時要check 清楚，避免還車時爭㘭，所以我地都睇得好認真。搞完一輪，出到市區已經係中午，先醫肚。介紹話冰島有開好出名的熱狗店，反正就在我地超市入貨的商場內，就以熱狗當午餐，好彩太后無嫌棄。今日無安排景點，因為知道長途機後大家都會攰，喺超市入完貨，行下附近的店鋪，又未夠鐘check in, 於是去埋Perlan就開車往今晚的住宿。
一落機當然係攞行李，見到呢排車，心想冰島果然與別不同，行李車居然同超市車係一樣！結果原來呢排真係超市車，因為行李帶旁就有間Dutyfree。真係若要人不知，唔多咁低b
Puffin 破頂而出
某些租車公司要坐shuttle bus 去攞車，例如我幫襯的sixt
基本上好多租車公司都要坐shuttle 至到，所以站頭好多人排隊
shuttle bus 係循環線，途經4個站，好彩sixt喺第一個站，唔使坐咁耐
資料詳盡的地圖
呢架車好大食。原本以為放唔哂行李，租車公司免費upgrade 架PAJERO 比我，但我怕比油錢比到破產，結果3個大喼，2件handcarry 同一個大背包都放得落，但沿途超市入貨要放後坐，後排都無鬆動位了
彩虹來相迎
先醫肚，羊肉腸熱狗。冰島興食羊多過食牛，條腸充滿羊肉味又唔膻，幾好。
PERLAN 網友話可以免費在瞭望台睇雷市全景。太后有門票恐懼症，一見到個門口就退後兩步，不停搖手叫「要比錢！我唔入！」我已經習慣佢的病態，只係冷冷地同佢講句「免費的，你唔入就企門口等」
傳說中免費內進的瞭望台已經要收費，我當然唔入，再上樓上餐廳睇睇，原來餐廳在圖頂內，food court 形式，我透過窗口望下雷市全景就算。
館內進行維修，無咩好睇，點知太后居然對地下的攝影展有興趣
太后要我影低呢張極光相，話若旅程睇唔到極光就睇呢張相，真係有備無患
PERLAN係遊客必到景點之一，有sight seeing bus 車站，亦有好多tour到來。呢架車好有趣，似水陸兩用車
離開城市，冰島自駕遊正式展開，雲好厚
恐嚇性地提你小心駕駛
途經沙灘，冰島大部份沙灘的沙都係黑色
附近有騎馬團可以參加
終於去到今晚住宿，由於只留一晚，想好好在小屋休息，打算在附近行下就算，順口問下屋主附近有咩好行，佢介紹左個揸車「好近」，落左車「行一陣」就到的野外hot spring比我，我呢個温泉控當然兩眼發光，即刻立毛巾起行。由於温泉衝昏頭腦，諗住個「好近」的温泉，用3小時來回應該好足夠，5點出發，8點日落前已經可以回來，煮個麵做晚餐就得，完全無仔細同G神(google) 溝通。
架車一路行，見行極未到(因為我心急)，至發覺原來要半小時車程，來回已經要用一小時！落車後再了解温泉位置，原來由停車場行去温泉要個幾鐘，仲要係行山徑，至今我明白到今日泡温泉的希望係零。就算夠時間，太后都無可能行得到，但一塲來到，點都要行一小段。點知一開始行無耐，已經有好多飛蠅，唔明點解咁涼的天氣都有咁多飛蠅，太后圍剿得極不耐煩，唔願意再行，留喺原地等，駕駛員陪佢，順便玩航拍，我就同美魔女行上山坡再回來，叫做到此一遊。其實一路行上去反而無飛蠅，去到半山見到著羽絨著到小露寶一樣的太后雙手舞動係咁拍飛蠅，好搞笑。駕駛員仲報告話好似有幾隻飛左入口，飛蠅嬲完A再入佢口......OMG !去hot spring 會經過小鎮Hveragerði，小鎮處於地熱地帶，有餐廳用地熱能量煮食作噱頭。小鎮好細，得一條街，街頭至街尾三分鐘車程，但幾骨子，有可愛的商店及温室。我因為趕時間，無停低影相，走的時候商店又關門了。只影到呢個設在餐廳後門的地熱蒸爐
泊好車後就見到地圖，千萬咪以為呢度係咩秘景，我下午五點到來都仲泊滿車，好多遊人。
景點介紹牌，地方唔錯㗎
好多景點都有道閘，用來阻擋馬牛羊進入
過左河就起步
沿途流落嚟的溪水都係熱的
條路鋪好哂，唔難行。係上山可能攰少少
從山腰往下望
泉眼好熱㗎
冰島天氣唔穩定，遇到咁好天氣，唔行對唔住自己，所以點都要行......行上少少
同美魔女留影，叫做來過
回到住處，到海邊欣賞日落晚霞
負責廚部的美魔女開工了，豐富晚餐。好長的一天，餐後太后同駕駛員倦極入睡，我同美魔女決定守夜等極光
好喜歡的海邊小屋，晚上點上蠟燭，好有氣氛 （其實點完我關左燈，好有氣氛好好feel，不過太黑影唔到) 屋主的朋友住隔離屋，佢好好，喺晚上十點幾特登過來通知我今晚可能有極光，叫我地等。太后同駕駛員都瞓左，得我同美魔女守夜，最後雖然等唔到，但可以喺美麗的星空下享受寧靜的晚上，一樣開心。
留言列表
香港食食食 (25)
