Foodie 生活雜誌

2/2018 光顧

餐廳之前在元朗，後來因為租約問題，輾轉落户渣甸山居民協會。餐廳裝修有如雪山下的小木屋，好温馨舒適。晚餐係套餐形式，餐湯、頭盤、主菜、甜品各選一，包飲品。廚師係法國人，15歲開始做廚，所煮的都係傳統西餐，菜式唔花巧，食材新鮮，廚功扎實，一頓好實在的晚餐。

餐廳坐落於堅係豪宅的白建時道渣甸山居民協會，四圍係獨立屋，揸車方便d，門口泊車一晚$10。

入到去都係好普通的裝修

點知入面別有洞天，似開左隨意門去另一個國度。木屋小火爐，感覺温馨

樓底高，掛埋野獸標本毛皮，就似歐洲雪山下的小木屋

套餐價錢高低視乎你點的主菜。

餐包，熱辣辣。不過侍應小姐似乎唔多想為我添包

龍蝦湯 味道香濃，不過無龍蝦肉

洋蔥湯 傳統的做法，有芝士麵包，個湯好香好甜

頭盤田螺批 酥皮鬆化，入面田螺啖啖肉，好少食呢個菜，幾有新意

頭盤焦糖鵝肝 以cream brulee 食法上，太后大失所望，我就覺得唔錯，口感幼滑酒味重，好濃郁的鵝肝味

頭盤烤法國芝士 Raclette 香軟，配薯仔cold cut，令我想起那年在mont blanc 山下的小屋餐廳食同一個菜式的味道

主菜 烤法國鴨腿 外皮酥脆，鴨肉juicy，有咸香，可惜太后唔多欣賞，食剩半隻。

香煎鵝肝牛柳 終於係太后心目中的鵝肝。牛柳同鵝肝都好rich，牛柳火喉剛好，中間夾住酥皮，好耐無見過呢種食法

紐西蘭羊架 好耐無食過煮得咁好的羊架，我只係無話要幾多成熟，只係要求唔太生就可以，出來係皮香肉嫩，肉質好柔軟，配菜的小蕃茄都香甜

好欣賞呢度的甜品唔太甜 (好似有點矛盾😅）蛋白梳乎厘配雲呢嗱汁，輕飄飄，完全無負擔，無罪咎感

朱古力 cream brûlée 濃濃的朱古力味，好幼滑

杏仁酥皮批 酥皮鬆化包住不同口感的杏仁，杏仁味香又唔太甜，不俗。

甜品配上香濃咖啡，為晚餐劃上完滿句號