(外賣店，我就企喺右手邊個角落食，老闆攞開個煲就成為飯枱)
10/2017光顧
荃灣明星小食店之一，出名餃子，不過無堂食，真係幾呢hea，我又唔鐘意食外賣，所以一直無試。今晚喺附近，諗住買完快快回家食，點知老闆誠意邀請即場食，話咁至係最好食，仲即時清開鋪面一角比我，我受佢感動，就同食友企喺檔口開餐。餃子係自家制，餃皮自己搓，饀料多菜少肉，菜係白菜椰菜韮菜混合，豬肉以瘦肉為主，近乎無油，同中式有肉汁的餃子唔同，點解我可以咁清楚？因為喺我等食到食緊期間，老闆不停地講左起碼10次。小店誠意可加，味道唔錯，但餃子無油太健康，唔係我杯茶。不過湯底確實唔錯，自家煲的健康飲品都幾足料。
雞湯底餃子烏冬 餃子饀料充足，蔬菜切得好碎，不過老闆最自豪的健康無汁饀料我就普通，太乾，就算老闆話加左秘制汁來撈饀我都唔覺，我都係喜歡唔健康的肥豬肉汁。可幸餃皮薄得來有咬口，湯餃更能突出味道。
湯餃我選清雞湯底，老闆話煲左3日，又確係雞肉都散哂，湯底香濃，一滴油都無，唔錯。
煎餃四國魚湯烏冬 對於煎餃子我一向普通，餃子王將的半煎煮就列外。煎餃的餃皮已經乾，再配埋無肉汁的餃子，乾上加乾，不過點汁食都問題不大，個辣醬唔錯。
四國魚湯即係鰹魚湯 老闆認為凍食更能突出鮮味。 湯底味道清甜濃郁，不過食完有點口渴。小店唔係賣米線，係賣烏冬，仲係759隻韓國烏冬，正👍🏻
老闆對自己的出品好自豪，好有信心
仲有健康飲品
飲落都幾濃，幾足料，唔太甜，好過自己煲
有生水餃，可以買回家煮
小巷仲有幾間小鋪，都係年青人主理，行過就支持下吖
全站熱搜
留言列表
香港食食食 (25)
