麵道@荃灣千色匯 @ Foodie 生活雜誌

8/2017光顧

對拉麵興趣不大，只會於間中口痕時試下。朋友話呢間餐廳的特色湯底好快賣哂，試過平日中午一點去到沙田分店已經無哂，要關門。講到咁勁，死唔蝕底心態又燃起。我去荃灣店，試過兩款拉麵，出品唔錯，細節位做得用心，店員服務好，不收加一，幾喜歡個湯底，向店員八卦下，佢話餐廳由日本師傅主理，湯底喺日本揾人另外做，來港後再加工，此麵店在日本無分店，經過不妨一試。

(先旨聲明，我口味較淡，因為我知好多人愛食濃味拉麵）

點菜紙，同一般拉麵店一樣，選湯的濃度、麵質、配料等

叉燒溏心蛋伊勢海老豚骨湯拉麵拉麵用幼麵，麵質選適中，但結果有點稔。叉燒無圖片介紹咁厚，但又未至於好薄，肉質柔軟，肥瘦均勻，我比較愛厚叉燒，所以覺得咬落口感稍遜。湯底香濃，真係有龍蝦味，我好衰咁諗梗係加味精，因為要餚個咁濃嘅湯要用好多料，成本唔輕，但食完又唔算口渴，自己又唔識，都係「不要問，只要信」就算。蛋未夠溏心，麵內仲有兩粒雲吞，好少見，總括嚟講成碗麵係唔錯的。

雞叉燒溏心蛋雞白湯拉麵由於上次喺龍蝦湯同雞湯之間苦苦掙扎，加上個麵選的硬度不對，決定再來。侍應特別提醒雞拉麵係配笋，唔係木耳，以為木耳無貨，原來師傅話配笋比較適合，好認真，個笋味道唔錯，無押味又軟硬適中。雞叉燒即係雞塊（仲以為又有雞又有叉燒咁爽YY)，雞塊用煙燻，無咁油膩，但雞肉唔夠滑，今次選硬麵，啱啱好，湯底有濃濃雞味，但唔會杰撻撻，又比我有個「係真唔係咁足料？」的感覺，今次隻蛋夠溏心。