Foodie 生活雜誌

( 「FLOWERS by NAKED 2017 數碼花展」燈光投射做得超細緻，好靚)

原本想在銀座MERCER BRUNCH食個豐富早餐，點知居然遇著休館日(成個商場休息！)，超殘念。即時失去方向，唯有朝住下一個景點的方向一路行一路揾食，結果喺雞味座食左碗炭燒雞飯，總算唔錯。之後去睇「FLOWERS by NAKED 2017 數碼花展」，但幾個女子又點會咁順利可以直達會塲，經過重重的購物關卡，買到成手都係至行到會場（仲要係買米！喺銀座買米！問你死未？）

食燒雞飯一定要選用備長炭燒的店

呢度用軍雞，咁靚仔就比我食左了

雜錦，有免治，雞肶串等

究極親子丼，隻蛋睇見都正，反而雞就唔夠滑，莫非因為從軍，肌肉較實？雞肝非常juicy,正!

山椒親子丼，山椒味有點似九層塔，幾香

呢間山本海苔店的紫菜同米餅超級香脆，今次買得太少，下次要大手入貨！

 

「FLOWERS by NAKED 2017 數碼花展」展覽係花藝與燈光設計的合作。幾個花藝設計師分別設計幾個作品，再配上NAKE 團隊製作燈光設計，製造出美麗的光影效果，會塲唔大，但展品好靚好夢幻。

花藝設計師的擺設

花仙子新娘？

睇完展覽去東京站買定JR pass，因為跟住就要去群馬浸温泉。買完pass就去近年大熱的小區清澄白河，原本想睇的清澄庭園快關門，所以無入去，附近係民居為主，店鋪疏疏落落，有d仲無開，加上天氣凍，又近黃昏，四週冷清清的，似乎白來了，其實清澄白河賣的係生活感，適合悠閒地四圍逛，在咖啡店呆坐感受，若一般跑景點的遊客就無謂來了。

清澄庭園 要買票入塲，唔貴，幾百yen，不過因為只剩十五分鐘就閉園，都無謂入去。朋友提我要影相寫foodie，真係窩心

路上間中會遇到小店賣小物，時裝

因為係平日，好多店休息，最後唯有去令清澄白河變成景點blue bottle潮聖，雜誌介紹話係咖啡界中的APPLE : 店子設計簡潔，獨立開在倉庫型的建築內，由裝修到餐具杯子都設計精簡，咖啡質素高。店內大部分地方做廠房，放咖啡豆，機器等，有點似製毒工場，自助形式，全店只得三張大枱，自行揾位，咖啡我唔識，飲唔出有咩特別。不過來到的人都係為左個「型」字，自拍打咭咁囉，我見同枱的女子叫佢男友起碼影左30張相都未收貨。若為左飲杯好咖啡就真係唔洗特別來。

店子在貨倉式的建築物內

裝修簡約

咖啡製作過程感覺專業

一塲來到，唔好失手勢。

我的齋啡