2016東京遊餐廳篇 : 早餐@築地 @ Foodie 生活雜誌

近年去東京已經唔會去築地市場，因為人太多，食物又唔係特別，不過今次同行朋友未去過，又再重遊一遍。

先到鳥藤食親子丼，因為大部份人都係為海鮮而來，又可能時間尚早(9時左右)，到達時只需稍等五分鐘。我點左雞球飯，網上介紹係用雞尾(即係屁股肉)做，但我來到睇中文餐牌寫的係雞球，可能雞尾未必人人接受，所以改個叫發，其實根本就係雞尾。雞肉每件小小的連住雞皮，加上醬汁燒香後蓋在飯面上，再加上雞蛋，黃澄澄的蛋汁與雞飯混在一齊食，好香好好味。不過我個人口味偏淡，稍嫌醬汁太濃。朋友點的親子丼即點即製，雞嫩蛋香，雞有雞味，蛋有蛋味，唔錯。

雞球飯

親子丼

喺塲外市場四處逛逛以後再到うに虎喰食海膽飯，虎杖在築地有好多分店，有壽司店、海鮮丼店等，呢間專門食海膽飯，可能價位高，唔太多人光顧。坐底點左個特上日本海膽丼，連稅要差不多6500yen，一上枱，跟相片的份量唔同，相片上係海膽鋪滿飯面，但現實則只有約四份三，有點失望，海膽鮮甜美味，但呢個價錢呢個份量就唔值得了。