Testu@銅鑼灣(CLOSED) @ Foodie 生活雜誌

11/2015 光顧

新來港的拉麵店，標榜沾麵著名，又試下。沾麵似廣東的撈麵，一碗麵加一碗湯汁，湯汁入面有叉燒、筍、葱等配料。沾麵的麵條比拉麵粗，呢度的都係肥嘟嘟，但唔夠彈牙。湯汁唔夠濃，唔得掛麵，配料少得可憐，(可以加錢加配料)叉燒鞋口，好在湯汁食完唔太口渴。麵的份量可選普通或大，大碗不需另外加錢。圖中的係普通份量。麵的温度都有得選，分普通同熱，我覺得好奇怪，又唔係寫冷麵，咩為之普通？問下小姐，佢話係暖同熱的分別。咁麵就梗係熱食，就點熱。點之來到時麵係被熱水浸住，係熱水，唔係湯，可能我大鄉里，真係無見過，感覺怪怪的，又唔可以換，唯有叫小姐幫我倒左d水。坐我隔離的食客應該有同樣疑問，（I'm not alone !) 聽佢問完至知原來選普通即係麵條會過冷河，所以會無咁熱，又學多樣嘢。呢度仲有樣特別 : 就係當你嫌碗湯唔夠熱時，可以order舊熱石加入湯，整番熱碗湯，我就覺得係gimmic嘢，食碗麵唔通食一個鐘咩，不過見到鄰坐的姐姐仔點左又玩左，因為佢絕對有此需要，影相的時間耐過食，食得來湯都凍哂了。

另外點左個水餃子，一句講哂，拉麵應該配煎餃。