Foodie 生活雜誌

因為隔天早機，所以選擇機場附近住宿。兩房Apartmemt 設備齊全，廚具洗衣設備樣樣齊，有小露台，比起之前的示範樓盤好得多。apartment 離機塲約10分鐘車程，酒店有免費shuttle bus 機場接送。我入住當日職員話shuttle bus坐位已滿，無法提供接送，好彩我地訂酒店時已再三確定shuttle bus 座位，於是攞出confirm email， 酒店至為我地安排的士往機場，費用由酒店負擔。所以建議入住前要同酒店確定座位。

由於明日晨早7點機，所以今日都可以當作行程的最後一日了。一早又跟住G神去揾食，今次佢帶我去新發展的中產小區，一間充滿悠閒氣氛的cafe。Cafe 充滿陽光氣息，味道又好，食得好愉快。之後往Perth 市中心shopping，由於全球一體化，都好難揾到特別的貨品，加上價錢比香港更貴，只有window shopping。行左一陣，大人無目標，細路無癮頭，決定早點去今晚機場附近的apartment hea下就算。晚餐揸車出去越南餐廳，諗住臨尾食番碗pho，點知去到係高級版越南餐廳，居然無pho食！勁失望。隔天半夜披星戴月地去機塲，少爺仔唔夠瞓，化身悪jack jack，係咁扭計，我火都嚟，結果同佢講 ： 去旅行就係要適應，無話事事順暢，若你做唔到就以後唔好再出來玩。話完佢，再入厠所玩下Dyson吹風機就成個醒哂，開開心心上飛機。

一起身又係天陰陰，不過好彩好天氣都放在旅程前半部，等我地可以好好欣賞大自然，回到城市就算落雨都無太大影響。返回城市，當然要去cafe 食早餐，近呢幾次旅行都係跟住G神揾食，開住架車，邊行邊search，見到高分又合眼緣的就食，暫時都無甩拖。今次呢間cafe去到至知係時興的life style store，集cafe，家品店同hair salon 於一身，仲有單車團。cafe食材係organic 同raw food，平時喺香港少食，因為唔好食，去到澳洲又覺得好味，因為食材實在新鮮。食完後去Fremantle market逛，一個有買有食的室內市集。今日落雨又大風，喺市集附近行就算，感受唔到Fremantle的美。原本打算喺Fremantle Fishing Boat Harbour食晚餐，但又唔多吸引，結果去左商場內的中菜館解決晚餐。 當晚風大雨大，先生喺落車時跌左電話，直到返回住宿至知，揸車再回去商場，居然比佢喺剛才的泊車位旁執番個電話，真係好彩到爆！

(我地入住的一間，地下係車房，客飯廳，洗衣房。另有一間睡房)

全個行程最無性格又最有親切感的住宿，因為實在似香港的獨立屋。分別係喺香港我係鬼崇於屋外𥄫或者扮上等參觀示範單位，喺澳洲我就可以租來住。全新屋苑，整體同附近住屋格格不入，似係比投資移民買的。全屋分兩層，四房三衛浴，車房後園有齊，一個套餐，三個衛浴全部用企缸，最緊要實際，毫無生氣無特色的airbnb單位，第一次見識。

朝早安樂醒，他他條條hea 到check out。午餐喺glamping 附屬的餐廳食飯，仲參觀埋園內的橄欖油工塲，由樹上的橄欖變成一樽樽橄欖油，原來真係要費好多心血同時間，睇完再買又覺得抵d。往Fremantle途中經過一個以牛為主題的小鎮，又去左行文具outlet，不過貨品邊及得上偉大的淘寶咁平靚正吖，之後就一路揸車去住宿，經過超市又行一輪，時間就咁過左，去到住宿已入夜，煮完晚飯又玩洗衫，無無聊聊又一天。

今日繼續遊Margaret river region。 呢度除左酒莊之外，仲有好多食品工場同手製護膚品、香氛工塲，全部都係行過經過，全無錯過。有時喺某些店鋪會見到其他店鋪的單張，合眼緣就去。兩位有購物狂的媽媽抑壓左多日的購物慾終於完全釋放，加上工塲的產品感覺實在，更加大買特買。途中經過一間酒莊，港傭對內裡的餐廳一見鍾情，一句 : 「我要喺呢度食飯！」大家立即坐低，一個問題都無，真係好僱主。食完再shopping 。之後到市鎮繼續逛，市鎮得一條街，從頭行到尾只需半小時左右。天氣又濕又冷，行左一陣己經無興趣，好彩見到間韓國菜，見到soup noodle 就走入去，結果有熱辣辣的豆腐湯同紫菜飯做晚餐，大人細路都好開心。

近年時興上等露營，出發前見報紙介紹呢度，立即要求太太安排入住，太太亦順應民意，訂左三晚。Glamping 在橄欖園內，有自家餐廳，地方舒適，環境relax，但當你同幾個小朋友來住時就唔同講法，所有寧靜感覺一掃而空，落差好大，加上入住其中兩晚刮大風，全個營劇烈搖晃，雖然最後證實係安全，但已經有得震無得瞓。 若果天氣好又無小朋友的話，係值得一住的。

今日安樂醒，起身後先食個健康有機早餐，再搞東搞西，到中午至出門，今日太太繼續應港傭要求，去酒莊食個午餐。Margaret river region 有好多大大小小酒莊，你可以事前做定功課，又或者好似我地咁，去到揾人介紹，或者經過見到喜歡就入去。今日先去Glamping 主人介紹的，連埋參觀酒莊，又消磨左幾個鐘，晚上回glamping 燒烤做晚餐，點知營地燒烤塲的燈壞左，食物已買，帳篷內無廚房，唯有頂硬上，營地主人無想過呢個天氣會有人BBQ (心諗你班友係咪有病？) 但都借左頭燈比我地，之後更幫忙用車頭燈照明，不過我地唔想麻煩人，拒絕左。由於環境黑暗又大風，我地一鑊過燒哂所有食物，之後再運回帳篷，情況狼狽，不幸中之大幸係燒好哂食物，剛送到帳幕至落雨，雖然呢咁hea，但相信又會笑埋下半世。晚上風更大，風聲嘈到瞓唔著，成個帳幕搖搖下，但見先生太太一家瞓得安穩，我唯有暗暗諗定避難地，後來都倦極而睡，好彩第二日仍喺原地。

一早出發，今日會去兩個景點 : The Pinnacles 奇石林及Lancelin白沙丘 滑沙，繼續大自然之旅。The Pinnacles 睇的係黃色沙丘上拔起的千年風化石，Lancelin係白沙丘，沙質極幼滑，又可以玩滑沙，大家玩到不亦樂乎。去完兩個景點後又係長途車往住宿，當先生聽到「只需」三小時左右的車程，聽到佢口中發出感恩的一句：「多謝太太！」晚上終於到達住宿，今晚玩玩Glamping ，試下上等人露營，點知就渡過左兩晚恐怖之夜......

Resort 在龍蝦鎮Carventes內，跟之前於Monkey Mia 入住的resort 為同一集團。規模較細，但房間好得多，因為今次租到三房單位，即係之前monkey mia resort 想租但租唔到的。地方新淨，設備齊全，不俗的住宿。

完成西澳北面景點，要走回頭路返回南部，由於車程太長，中途停留龍蝦鎮Carventes一晚。昨日走完Kalbarri 國家公園河谷部份，今日沿路可以參觀海岸部分。沿住海岸駕駛，望出去就係印度洋，一路上有不同的觀景台，邊走邊停，望住浩瀚的大海，沿岸盡是係經過千年海浪衝擊、自然風化侵蝕而形成的懸崖及奇石，處身其中，完全感受到大自然的神奇力量，我每次處身於呢類景色當中，就會有莫名的感動，心境亦會變得平靜感恩。午餐返回Geraldton ，去番前幾日去唔到的餐廳，享受美味午餐。餐後當然係行超市，因為今晚又可以煮飯，晚餐係澳洲風味BBQ，開心又一天。

來到Kalbarri，就係為左個Nature’s window。一早先去之前入住農莊的主人所介紹的cafe 食早餐，餐廳好有鬼佬茶記feel，員工友善食物好，環境relax，好舒服。飽餐後開車往Nature’s window。Nature’s window在Kalbarri國家公園，一個紅色岩石河谷內，其中一塊被風化成似一個窗框的石，成為地標，所以吸引好多人來。我地呢類基本遊客當然睇完影完相就走，但其實河谷好大，有好幾條遠足徑，非常值得一遊。不過事前當然要做足功課，而且夏天千萬唔好行，因為氣溫極高，若果唔係專業人士，同自殺無分別。我當日就算係冬季，仍然陽光猛烈，差不多三十度，真係估佢唔到。之後再往Z Bend 睇另一個河谷，叫做蜻蜓點水地睇過Kalberri national park 的河谷部份。返回小鎮，因為應𠄘左小朋友去公園玩，小鎮在海邊，當日又見洶湧大浪，大家又再被吸引觀浪。之後去公園放電，晚餐又係自己煮，唔好浪費咁大間屋。

終於回歸大屋。住宿在Kalbarri鎮內的住宅區，揸車至中心地帶只需幾分鐘，有間IGA，另有一間當地超市，又有肉店，不過後兩者食材質素麻麻，我地都係去IGA。住呢度主要係為左去nature window，距離二分鐘車程，好方便。大屋有前後花園，連泊車位，裝修簡單，地方整潔，有洗衣及乾衣機，提供基本用品，屋主回覆算快，不俗的住宿，但稍嫌太大，行到腳軟。(草根自白)

早上check out 離開resort後先往Danhem食早餐，其實醉翁之意不在早餐，係Bakery 出品的酥皮批，昨晚太太買回來，酥皮酥軟奶油滑，灑上糖霜，唔太甜，好好味，今日再來encore買上車做午餐。今晚住宿喺Kalbarri ，沿路會經過shell beach 同hamelin pool 兩個景點，兩者位於shark bay 世界遺產保護區內，講出來好似好勁咁，其實就算無呢個名譽，兩個咁美麗又特別的景點都好值得去。沿途行下停下，今日終於可以喺日落前到達住宿。今晚間屋好大，小朋友玩到癲。講開小朋友，又講下小故事 : 話說少爺仔同小老闆都要座car seat，今次兩個car seat set埋同一排，兩個都想坐中間，當然有爭拗，大人們主將自己的事自己解決，於是二人自行商量，幾日間從中間位每人坐一日，到每人坐半日，到每人坐一程，到最後決定每次猜拳決定，過程搞笑，見佢地爭拗，玩投票拉票，又商量，全個過程兩位都曾經向大人求助，但我地鼓勵兩人自行決定。最後事情雖然解決，但後患係每次上車前就算外面天打雷劈，都要猜拳先肯上車，吹漲！

先生係打霧水一族，晨早起身去影日出，港傭一於死跟。感謝好天氣，晨曦中的shark bay 有如油畫一樣靚。大家陸續起床，準時7:30參加resort的海豚導賞團。今日唔多幸運，只見到一條海豚來到，反而晏d在海邊散步遇到三條海豚。完成導賞團後其他團員去洗衫，係，洗衫絶對係節目之一，因為三位小朋友會因為不同事情弄污衣物，所以每到一個住宿都要洗衫，後期我覺得兩位靚媽已成病態，要出手阻止。作為港傭的我，當然要做更艱苦的工作 : 去餐廳揾位，望住個海嘆住咖啡等團友們回來。餐後喺海邊玩，不知不覺一個上午就過去了。

下午開車往鄰近海邊小鎮Denham食lunch閒逛，其實小鎮只得一條街，好彩有個兒童遊樂設施，港傭同小朋友又玩到癲，兩位購物無界限的靚媽當然又去超市shopping 。回程時行第二條路回resort，不經意發現沙洲美景，先生二話不説轉入小路，成團人在沙洲跑跑跳跳，忘記時間，可憐温柔媽買比我的Vienetta 雪糕就此報銷。之後 返回resort欣賞晚霞，再食個豐富晚餐，充實又開心的一天就過去。

山長水遠來到，就係為左呢間resort。resort 位於Shark Bay，特點係內裡的私人海灣每日都有海豚來訪，住喺resort的住客可以近距離接觸海豚。Resort 規模大，有幾款住宿選擇，我入住的平房設施簡單，對於以旅行住宿逃避香港窩居的我，見到不禁眉頭一皺，太太見到立即講:「靚房無哂，將就下啦」（係咪有點角色掉轉feel?) Resort內設施齊備，有兩間餐廳，味道不俗，我入住的房間無得煮食，要煮可以去公家廚房。海灣風景優美，亦可駕車到附近小鎮Deham散步，休閒地過日子。

今日係移動日，因為車程長，食完早餐就出發。港傭今次純粹跟團，所有行程由太太計劃，港傭只提出幾個要求就無再參予，雖然太太貼心地於出發前比左行程資料我，但我無想過要帶腦，所以無睇。只知道今日車程好甘，景點只有粉紅湖。路上一直天陰陰，開車一小時左右到達粉紅湖，顧名思義，湖水呈粉紅色，陽光普照時更鮮豔，好靚好神奇。大家當然係瘋狂影相，上天眷顧，短短大半小時內，大風、大雨、天晴、天陰的粉紅湖景色都比我地睇哂，心滿意足下離開。之後就係漫長的車程，太太對於車程的報告係有點另類，話說大家坐到呆呆地時，太太突然殺出一句 :「仲有1Km就到！」大家立即醒神，好興奮的同駕駛中的先生加油，但加油期間我有點疑惑，只見四周荒涼，聽講今晚住的係渡假村，可以睇海豚，感嘆西澳真係一個神奇的地方，咁荒涼的地方居然可以有渡假村，地貌仲特別到咁近海都唔覺 （之後都覺得自己天真得可怕），眼見GPS的1KM快將行完，太太興奮地講：「終於行完呢條公路，下一條公路係100Km!」大家聽到都好驚嚇，不過都唔及揸車嗰個，我喺定驚後先送個「謀殺親夫」的牌匾比太太，再輕拍司機坐的先生膊頭，講句 ：「對你的遭遇深表同情」之後，決定瞓陣。過左一千年之後終於到達渡假村，天色已黑，匆匆check in 安頓好，食埋晚餐就瞓覺了。可憐的先生今日揸左六小時車。

晨早起床，已經見到好客友善的狗狗lucy來了，小朋友同lucy 瞬速建立友誼，玩得不亦樂乎，我就趁先生太太煮早餐時(港傭負責玩😜），趁機在農莊四圍參觀。屋主過來打招呼，話喺農莊附近可以見到野生動物如袋鼠、鴕鳥等，咁大家食完早餐就出發，Lucy都跟住來。點知行極都唔見有動物，雖然我都明白野生動物唔係企喺度等你，但屋主介紹得，應該係農塲之類（後來至知原來屋主介紹的係Greenough Wildlife and bird park)，愈行愈唔對路，諗住放棄，但見lucy好似想帶我地去某地方，成班人就跟佢行。行行重行行，真係純粹跟住lucy，見路就行，感覺自在。原來lucy帶我地去海邊睇浪！後來屋主話個海灘就叫lucy’s beach ! 洶湧的海浪配合藍天白雲，一幅美麗的動畫，大家都忍唔住停下來靜心欣賞，Lucy亦急不及待跳落水玩。到離開時，lucy帶路行先，佢見先生影相影到唔捨得走，居然回頭吠住叫先生離開，非常懂性的狗狗。之後駕車出市區午餐。餐後去公園玩下就回農莊煮晚飯，簡單一天。

因為先生一句 : 「想住下農莊」，太太立即做嘢，結果亦係全個旅程最喜歡的住宿。Farm house 有點歷史，最初由上一代建成，近年翻新，不過可能家中成員相繼離巢，屋主於農莊另一面起左一間細少少的屋自住，呢間用來租。全屋有4間房，另有徧廳。只得一個衛浴，其中一間房同衛浴的門口喺露台，幾奇怪。廚房設備齊全，大屋有前後花園，仲有友善好客的狗狗Lucy，連一向怕狗的小朋友都同佢玩得不亦樂乎，好一個安樂窩

晨早五點幾到perth 機場，先過關，要知道澳洲海關較嚴，我地雖然唔使開喼查，但排左兩轉隊都用左大半個鐘。攞車時又因為攪錯型號，要再安排，結果出到市區已經8點幾，剛好係早餐時間。澳洲的cafe文化我一向甚為欣賞，除左咖啡好之外，食物亦可口，皆因食材新鮮，雖然來來去去都係芝士麵包雞蛋牛油果蘑菇，但唔知點解都好多變化，食得好開心。食完早餐後，自駕遊正式開始。開車往今晚住宿的Geraldton鎮，沿途見到啡色的景點牌就入，亂點揀左個’Two Rock’的景點，行完都唔知景點係咩，結果去到商場門口見到張相就明哂。中途喺超級旅客餐廳Lobster Shack 食龍蝦做午餐，估唔龍蝦鮮甜彈牙，幾好食。飯後再上路，去完超市入貨已天黑，先生太太在飛機上無覺好瞓，先生要揸左成日車，太太又要下廚，辛苦哂。