(觀景台上的景色)
今日由鹿兒島移動到宮崎，途中只有兩個景點 : 鬼之洗濯板同日南水產。因為係臨時決定去，所以無特別揾資料，原來正確的位置係在青島神社附近，但我對神社興趣不大，何況鬼之洗濯板其實係沿海的一大片波浪型岩石，經海浪長年累月的推湧擠壓及侵蝕，型成一層叠一層如同洗衣板紋理的岩石，對我來講睇到就得，所以我去的一部份係在道の駅 フェニックス 「波状岩と美しい海」對面。從樓梯下山走到海邊，在層層叠的岩石上走出海，一路行一路怕潮漲，來來回回走幾轉，影下相，見識過個地貌，又爬番條長樓梯上去，烈日當空，行完就算你毛孔塞左都變得識出汗。上到去拿拿林去對面道之駅補給冷氣，團友們當然又自動開購物mode。買完一輪就出發去日南水產食午餐。呢度有段小插曲，話說團友唔小心遺留左個錢包在道之駅，去到日南水產至發現（來回約半小時），立即回去揾，點知一去到收銀處稍加形容就可以攞番個銀包，去日本就係會放心d。唔係話日本無賊，但路不拾遺的比例同其他地方比真係高好多。
有時真係不得不配服日本人的諗頭，一個普通的豚肉鍋可以比佢攪得咁有趣。首先係地方有趣 : 餐廳在酒店二樓，沿用酒店房做餐廳，全無改裝，你會覺得自己在房間打邊爐，(若果喺大陸就會話人簡陋，到日本就話有趣，太大細超了！)。我地人多，所以比左間大房，飯枱放喺tatami上，通常tatami上係茶几，而家配上大枱，大水煲，大鍋，似去左大人國。全程有尊人幫你煮，無需動手，整得靚靚。豚肉薄薄的唔太油，有好多蔬菜，最後加個麵，好飽。我地有點飲品，約5000yen 一位。唔算平，但幾有趣。記得訂位，因為前一晚walk in 無位呢。
(黑沙沙灘)
到左指宿已差不多四點，直接去公眾黑砂浴場砂樂，可能遊客多，指示非常清晰，基本上一句話都唔洗講就可以完成整個過程。第一次試呢個嚮往已久的沙浴，非常有 趣，去到沙灘已有人為你服務，埋在沙內暖烘烘，吹住海風聽住海浪聲，難怪墳地要選背山面海，長眠喎，點可以求其？享受完沙浴返回更衣室，在沖洗區脫去鋪滿 沙的浴衣，再入內浸温泉，舒舒服服換番乾淨衫，出到去有免費水機，倒杯綠茶對住海景嘆一陣，千幾yen真係好值得。
去日本旅行，打書釘係節目之一，主要喺當地雜誌揾餐廳。呢間森林小屋餐廳就係喺便利店打書釘的收穫。餐廳位置偏僻，在霧島温泉鄉的山上，離「壺畑」情報館約一小時車程，感謝團友在食同住方面比我話哂事，揸成個鐘頭車去未知的地方都毫無怨言，好彩今次都無令大家失望。餐廳在山林中，靠餐廳電話同Google 都揾唔到入口，結果兜左幾個圈再問人至得，原本可以揸車去到餐廳門口，但路窄我地車大，所以泊在停車塲再行上去較穩陣。
一早就出發去參觀釀醋工塲'坂元のくろず「壺畑」情報館'。大家咪以為我成日寫食後感post一定好識食，去醋場咁招積，實則上係奶奶的意思，佢好鍾意買調味料 ，至於我，比枝一滴香我都分唔出。情報館(即係展覽館) 所在地背山面海，對住櫻島火山，好山好水做好醋。除左展覽館，仲有餐廳同工塲，到達後先在附近周圍兜，四圍影，唔覺意去左化驗室外，師傅出來友善地提出並非參觀地，要我地返回展覽館參觀，又問我地喺邊度來。可能佢見我地咁有興趣，我地泊好車後居然見佢從實驗室跑過來大樓親自招呼我地，其實大樓本身已有職員介紹，但佢似乎好想我地知道呢個地方，雖然語言不通，都好努力地介紹醋的釀造過程我地知，仲親自帶我地四圍參觀，完全感受到職人對自己專業的專重同自豪，佢對工作的熱誠，實在令我敬佩。情報館內除左有介紹釀造醋的短片，仲有商店，團友都買唔少，買完仲可以宅急便去福崗酒店，唔洗攞住周圍走，夠哂方便。不過餐廳係食中餐，無興趣，影左幾張相就算。
今早在附近咖啡店食個簡單早餐後，就向雲仙温泉出發，中途之之坐坐又用左d時間，結果途中又肚餓，路過見到呢間庄屋門口泊滿車，當然唔蝕底又食埋一份。其實係一間類似香港大户屋的食店，但d嘢又幾好味。我點的冷麵好有咬口，伴蔬菜加點肉碎，好清新。團友點的燒魚肥美，燒牛肉都唔錯，一句到尾，食材有水準。小朋友貪得意點左個兒童餐，炸物香口嘢，細路實鍾意。日本食店好照顧小朋友，大部份食店都備有小朋友餐具，呢間更有小玩具任揀，真開心。餐後唔好彩遇到奶奶的迪士尼(即係shopping mall) 根據奶奶講呢間birthday 專賣童裝，平靚正，我唔知係咪，但只知店鋪就在庄屋前少少的對面 (真係只前少少)。各位媽媽有興趣可以睇下。
請注意，奶奶的平靚正可能同平常人有出入
一早打算到長崎港的朝市食堂食早餐，點知原來11:30至開（又話朝市.....）無所謂，就在長崎港四圍行下影相。美麗的長崎港，可能配上藍天白雲好天氣，特別漂亮，不過太陽伯伯就兇狠左d。長崎港隔離係長崎美術館 ，一個現代化的建築物，外型設計簡潔俐落，好吸引，雙腳不由自主行左過去，可惜是日閉館，只好圍住四周睇睇，之後先知原來係建築師畏研吾的作品，又讚下自己識貨先。
長崎港
好方便的一間酒店，地點在市中心思案橋，對面係購物街，旁邊係思案橋橫丁，唔荒揾唔到食。酒店外型現代化，同旁邊的舊街市容有點格格不入。大堂設計高雅，職員友善，房間舒適，價錢適中，Richmond Hotel 集團應該會係我以後日本旅館的頭三位選擇。
先睇豪華雙床間，洗手間同玄關與房間隔開，使用衛浴時可減少騷擾到同房
又一次選擇乘坐HK Express， 今次朋友加錢選坐第一行，我當然走去八卦下，真係伸到腳，幾舒服呀，下次若有長輩同行都要加錢坐呢行。航機到達福崗已經係傍晚，為左唔想浪費租車錢同一晚泊車費，所以坐的士去天神區的酒店。㗎由於上錯黑色豪華的士，所以車費要3000yen。
幾舒服呀
{前言}今次旅程共十五日，自駕遊在九州粗略遊一圈。因為有小朋友同行，要輕輕鬆鬆唔想趕，沿途食下玩下就算，所以行程每日只有一至兩個景點，其餘就隨遇而安。今次一班為食貓用左好多時間採購食物，所以去的景點唔太多，若打算跟住我個行程走的話，或者可以考慮多加景點或減少日數。
{行程大概} : 福崗入，停一晚後第二日取車開始自駕。沿途遊佐賀、長崎、鹿兒島、宮崎、大分。最後返回福崗，再遊福崗周邊地方。(熱門的熊本阿蘇因為之前地震關係所以無去)
香港食食食 (25) 遊世界 (0) 漫步香港 (3) 小書架 (1) 私影院 (1)
