Foodie 生活雜誌

2016九州一圈遊 遊記篇 Day  14 & 15

最後兩餐。晚餐因為又撞正happy friday，大部份地方滿坐，就選左呢間經過左好多次的西餐廳。室內燈光昏暗，適合情侶約會多d，同少爺仔來就唔多啱，只得四人枱，我地五個人，坐得迫，而且出菜慢，(人地約會係慢慢食)，加上燈光昏黃，令大家都懨懨欲睡。食物味道全部都好食，可惜我地配合唔到氣氛，打左折扣。

最後一日的早餐居然揾到我最愛的班尼迪同法蘭西多，在寧靜的餐廳對住公園嘆早餐，為旅程畫下完美句號。

(區內以小街為主)

上次去福崗主要集中逛天神大名及赤坂，大部份係大型商場及連鎖店，雖然某些店面設計有型，但都唔係我杯茶，反而今次住的酒店背後今泉區就深得我心。今泉區以民居為主，區內夾雜住好多型格小店、咖啡店及餐廳等。之前介紹過的意大利餐廳及早餐小店都喺呢區，四周悠閒憇靜，四圍貢，食個pancake 試下朱古力就過左一個下午。

(餐廳在海中)

餐廳位於海中，設計特別，有如香港的珍寶海鮮舫。整間餐廳就在一艘大船內，用餐地點在下層，玻璃窗望出去見到魚兒游來游去，好有趣。不過食物質素一般，可能係視覺為先，味覺次之？

(呼子港)

甚少食鐵板燒，一直以來鐵板燒比我的印象係好貴，食物要撚好耐先有得食，而且細細件，食完唔夠飽，唔係比我呢d幹粗活的人食。但近年睇多左雜誌先至知道鐵板燒有套餐，好多嘢食，食得飽，加上去旅行會有豁出去的精神，所以今次跟雜誌介紹試下。

(餐廳在民居，細細間好低調)

今日無四圍去，全日留在福崗市行下食下。作為盡責的港傭，一早就落樓下揾早餐食。酒店背後的今泉區有好多小店，好正好好行，揾到間小cafe，見個凍櫃內的食物都寫住自家醃、有機等字眼，感覺良好。點幾個套餐，包飲品最貴個餐都係800yen，當我諗到呢個價錢只能夠在香港的上市茶記食個醃製類食物早餐時，真係好唏噓。唏噓完出發去行街市，呢個旅程我真係行左好多土產店、超市、市場，雖然我鍾意食，但都未鍾意到呢個地步，不過奶奶喜歡就當然奉陪，去到奶奶繼續佢嘅熱情，我就四圍岳，無所事事，突然比我發現呢間型仔咖啡店，喺傳統市場中相當突出，奶奶亦喺呢個時候加入試咖啡，大家試得不亦樂乎，我當然又四圍影，咖啡店有閣樓仔，一個長窗對住條河，靜到似圖書館，幾舒服。後來睇某網站至知呢間咖啡店係福崗五十大必去之地，雖然間店幾型，但都不至於係景點卦，唔通福崗真係無嘢做成咁？搞完一輪又去下一個目的地，無錯！又係食！去食左餐平靚正的烏冬。之後去博多站行新開的KITTE，講真，近年旅行主力食同觀光，購物慾已大減，而且日本的百貨公司都係千篇一律，大家都行得幾悶，但購物聖手奶奶就有能本事牽起高潮，帶領我地揀遮都揀成個鐘，結果一眨眼又到晚餐時。今晚食左全個行程最滿意又最貴的一餐鐵板燒，懷住滿足的心情回酒店大覺瞓。

早餐小店

拉麵！又係拉麵！我真係未試過一個日本之旅食咁多次拉麵！話說去完女生迪迪尼後已經天黑，一路上都揾唔到啱心水的食店（主要係我的問題），番到福崗都未有定案，我唔可能要少爺仔陪我再四圍行，唯有投降又食拉麵，點知有意外驚喜。拉麵店在小街商厦的巷仔內，一不留神就會行過，拉麵以辣湯出名，全部湯底都帶辣，你可以自己揀辣度，基本上1至5度都唔辣。我點沾麵，麵條夠粗夠彈牙，掛湯度一流。特別要提隻雞皮餃子，以雞皮代替餃子皮，炸得香口但唔覺肥膩，內裡係雞肉同香葱，好好味，可惜好快賣哂，想點多碟都無。一間幾好味的拉麵店，團友們點名要我寫，當然要做嘢。

小插曲 ： 原本我係無食呢餐，安頓團友後自己死心不息再去揾食，因為我接受唔到食第三餐拉麵！可惜結果都無心水，諗住番轉頭提下團友們食完點行番酒店先再繼續揾，點知佢地食完個個讚好食，喺攰到死的情況下再等埋我食完，所以話，有時要講食緣之外，更加要配合好團友。我兩樣都有，何其幸運。

食鰻魚飯最重要係鰻魚夠肥美彈牙，要用炭燒，醬汁要鹹甜濃度適中，飯要粒粒分明，集齊以上的就好味了。本吉屋的鰻魚飯有齊以上優點，雖然價錢唔平，但絕對值得，比又乾又瘦的蓬萊軒好多了。非常滿足的一餐。

(若遊柳川，一定要坐船仔遊河，否則好似無咩意思)

(酒店門口隱閉，認住Tully's Coffee 就得，入口在隔離)

Boutique hotel , 細細間，因為要型，所以四圍都幾暗。酒店位置超級方便，就在天神南口站行最多五分鐘，身處最繁盛的區域，shopping 食飯選擇多，行到攰可半場返去休息。酒店有多款房間類型，我住的豪華雙床間面積正常，開到喼，洗手間夠大，房間清潔。

(鉄輪温泉公園)

喺酒店嘆到最後一分鐘至離開。先遊別府地獄，原來每個地獄都要入場費，見個樣似荔園遊樂場feel，興趣不大，只去左鉄輪地獄泡個免費滿清十大酷刑feel足浴就離開。在離開別府往湯布院之際突然發現公園兒童遊樂場，我同少爺仔即時歡喜若狂，畢竟嚟左咁多日，一個像樣的公園都無遇過。冒著中暑的危險，大家都玩到不亦樂乎，現今香港的滑梯仲邊有咁高？我自己都玩左好多次！曬個半死之後再上路。點知一上高速就遇上豪華SA站，又逗留左大半個鐘，去到湯布院已經下午，匆匆地食個lunch就行湯之坪，我上年來過，已經無哂新鮮感，只陪朋友行下就算，後來諗番應該去大分県立美術館(OPMA)更好。行到黃昏，店鋪都關門了，就向福崗進發。check in後求其揾間意大利小館食晚餐，之後就休息了。

(創作料理BAN-YA餐廳門面)

酒店好舒服，對晚餐當然有期望，可惜係反高潮，甚至係我咁耐以來温泉酒店中最差的一餐。今次選BAN-YA餐廳的創作料理，諗住來左日本咁多日，餐餐日本餐，不如試點新意思，點知好失望。除左舊和牛好食之外，其他都好普通，餐具亦唔靚，以訂房的價錢計，絶對失望。若大家有興趣入住，晚餐記住選 えいたろう餐廳的傳統日本料理，因為第二朝的早餐好好食，心理平衡番少少。

對別府的印像係傳統温泉街，無想過係海邊渡假feel，以為自己去錯地方。今次入住的係中型酒店，上網揀的時候被酒店簡約時尚空間大的房間吸引，又未試過望住個海浸温泉，最後卜錘。房間超大，最多可以住8人，面向別府灣，好寧靜，可以睇日出日落。房間有私人風呂，聽住海浪聲，再播上自己喜歡的音樂(習慣帶小型speaker去旅行)，美好的一夜。

喺旅館舒舒服服嘆完個早餐先出發。先去坐小火車，若果唔係有少爺仔我相信我係絕對唔會有呢個念頭，因為睇介紹，呢d只係無聊荔園玩意。點知我錯了，居然覺得幾好玩！(我係咪有問題？)觀光小火車好簡單，有兩卡，可坐18人，無遮無掩，在已停用的高千穗火車站出發，經過民居，穿過山洞，去到高千穗峽，亦即係鐵路的盡頭，因為前路已封閉，小火車會往回走，全程約半小時。坐小火車同揸車唔同，有穿過山嶺的感覺，更接近大自然。營運機構又會搞下花臣，在山洞內放幻彩射燈，到左鐵路盡頭又會放番皂泡泡，雖然有點小學雞feel，但我又幾欣賞個心思，為平淡的鐵路旅程加添趣味，最重要係少爺仔都好開心。不過天氣勁熱，差點中暑，但天氣唔好亦唔開，呢個唔係重點節目，若果悠悠閒閒遊高千穗又遇啱天氣好的話，都可以來玩下。

已經停用的車站

(酒藏幾豐富)

晚餐於獨立房食，其實另有大廳，可能因為我地有小朋友，所以比間房，怕嘈到人。晚餐精緻，食材唔係矜貴但味道唔錯，餐具精美(我好喜愛欣賞餐具)，食得好滿意。

(旅館入口)

一向鍾情小旅館，今次又揀左間只有8個房的温泉旅館，經booking.com 訂。旅館位於高千穗峽附近，安排住一晚唔洗咁趕。旅館房間在一間間小屋內，私隱度十足，每個房間內部設計都唔同，價錢亦有分別，預訂時睇清楚。旅館不設大浴塲，每間房都有私人風呂，對住庭園，無景睇，感覺似平時浸浴缸，不過面積大好多。我喜歡大浴場，但朋友就好喜歡呢個私人風呂。除此之外，一切都好滿意，服務一流，早晚餐都唔錯。

一早在酒店樓下的coffee shop 買早餐上車食，麵包好好味。我通常book酒店唔包早餐，喜歡去coffee shop 食，或者去到睇下食物質素再即塲比錢食，價錢同預先訂差不多。

酒店樓下的SAKURA Cafe

JR Kyushu Blossom 集團酒店，上次在福崗住過，好滿意，今次入住集團旗下宮崎酒店。酒店正正在JR站隔離，一條直路行去商店街約15分鐘，沿路係商業區，道路整潔闊大，好好行。房間寬敞，有書枱小梳化小茶几，裝修簡潔光猛，兩隻大窗外望宮崎市景色，被褥舒適，最欣賞個洗手間，夠大之餘仲分開坐厠、沐浴同洗面三部份，沐浴區再分淋浴同浸浴，非常滿意的一間酒店。

(可愛小屋，只有4個車位，繁忙時間人同車都要等位)

宮崎好似無咩做，結果去左食甜品。在一間童話小屋般的餐廳內食芭菲。餐廳one man band，食客都好有耐性等候，芭菲用蛋糕、雪糕、生菓等砌出來，用料夠新鮮就得。小店仲有精品同油畫賣，餐廳位處民居，應該又係一間店主的夢想小店。