Foodie 生活雜誌

cafe landmark 係名人聚腳點，諗住一定好高級好貴，原來又唔係喎，今次朋友仔用信用卡優惠更抵。我唔係好識點形容佢個餐牌，就似一班朋友喺其他餐廳食完覺得好食的，再叫自己相熟的廚師放喺餐牌上。食物足料煮得有心機，味道唔錯，早餐更加係一般cafe價，有機會都想試下。唯一唔好係收九點。

坐車成日經過呢間裝修到夢幻樂園咁款的餐廳，位置喺筲箕灣邊邊，可能我唔係食飯時間經過，見通常無乜人，估計都係好睇唔好食。某日見到睇開的專欄推介，即管試下。估唔到又唔錯喎，食物味道同賣相都幾好，招呼又殷勤，似去左樂園的主題餐廳，感覺幾得意。

5/2023光顧

英式酒吧，睇介紹牛骨髓批幾特別，又試下。食物大大碟，口味較重，但幾好味，平日做特價的生蠔好抵食，住附近的不妨一試。不過個市實在靜，做酒吧都要10:00就last call 了😞

4/2023 光顧

我間中都會食下漢堡，所以今次揀左以食漢堡為主的餐廳。餐廳主打以新鮮魚做魚柳漢堡，除此以外，仲有d創意菜式。食物出品認真，老板有禮貌又有誠意，漢堡包我就一般，下次有機會可再來食魚湯烏東。

4/2023 光顧

有日行過停低睇餐牌，主廚出來介紹，咭片上寫滿銜頭，咁有誠意，獨自經營細細間小店，要支持下。先來食午餐，食物味道唔錯，食得出係心機之作，但弊在我想食的都無，當日想點洋蔥湯、提拉米蘇都無，最過份連咖啡都話無，因為咖啡機壞左，攪到我好無癮。見餐廳門外貼左招聘廣告，由助廚到樓面到洗碗都請緊人，當日見大廚連外場都要做埋，要兼顧咁多嘢，點都會影響出品質素，悪性循環，正所謂獨力難支，心諗點捱落去？做生意真係唔容易。

4/2023 光顧

年輕時我係蒲吧一族，不過去的bar都係烏煙瘴氣，飲啤酒猜枚過一晚。如今年紀大怕嘈，想食下嘢飲兩杯同朋友吹水又唔想轉塲，呢類Gastropub就啱我。今次因為優惠而來，套餐有小食、串燒、爐端燒、飯或麵，再加一杯cocktail，出品不俗，氣氛唔錯，就算散點都唔貴，放工過來hea下，來個light dinner都幾好。

12/2022光顧 

完全係被餐廳外表吸引。之前喺對面食飯，見到呢間英式設計的餐廳喺街上好突出，見到介紹主廚例牌又係喺名酒店工作過，雖然明知無意義，但睇到點都有點加分👻於是擇日來幫襯。菜式設計幾有心思，食物味道唔錯，但烹調方法唔多啱心水，雖然知道百物騰貴，但都覺得食價比低。同行食友叫我記住提醒大家，若想食一塊完整的牛扒就唔好喺度點，因為呢度的扒係切開上的，佢好有怨言😆

10/2022 光顧

喺尖沙咀諗緊食乜之際，見到呢間漢堡店。對港式漢堡店的印象係舊式快餐店內，喺一塊大鐵板上煎好的油淋淋版，所以喺入店前都有點躊躇，不過目測其他人的食物唔錯，決定搏一搏（食個包啫，都唔明自己點解咁大心理交戰）😅為左穩陣，點個包就算，因為套餐只提供罐裝飲品，無興趣。漢堡水準不俗，值得支持的本地創作👍🏻餐廳係美式快餐店裝修，一洗港式漢堡的老土感

9/2022光顧

食開的蠔店關門大吉，要另覓新落腳點，去開飯網睇到呢間幾合眼緣，即管試下。生蠔選擇多，新鮮質素高，師傅開蠔手勢好，無乜蠔碎之餘仲起埋帶子，一叉就食得，好方便，侍應mark哥服務細心，價錢比之前食開的一間貴少少，但都好滿意，大家決定擇日再食。上網一睇，原來餐廳有好多分店，可能因為係咁，所以能夠貨如輪轉，入多幾款貨都得。不過熟食出品就好一般了。

9/2022光顧

好少去旺角食飯，睇IG見到餐廳的生蠔好吸引，即管試下。朗豪坊商場頂樓的幾間半開放式酒吧喺打左藍燈的天幕下，氣氛又唔錯喎。當晚點左生蠔及兩款小食，食物質素一般，不過8:00前有happy hour，係鬧市中一個不俗的選擇。

9/2022光顧

去太子揾食，朋友提議呢間，見幾次行過都大排長龍，對面街仲要開埋分店，心諗應該可以一試。餐廳裝修不俗，坐位唔算迫夾，打開餐牌見到幾十蚊個意大利飯，已知唔好有高要求，但唔要求唔代表無要求，部份食材同烹調技術都唔得，食完後，我同朋友都好疑惑點解有咁多人排隊。

7/2022 光顧

將軍澳區內餐廳多如繁星，質素非常參差，以連鎖店居多，真係諗唔到食乜好。今次朋友介紹呢間，又唔錯喎，起碼食得出廚師有用心煮。餐廳環境不俗，不過位置喺商場後面，比較難揾。

6/2022光顧

3/2022光顧

餐廳無冷氣，要揀啱天氣至好來，好彩當日風和日麗，喺泳池旁嘆美酒美食，一樂也。食物碟頭幾大，食材高質，味道不俗，overall食物有水準，但又唔算突出，都叫對得住個價錢，當係snack bar 好了。

3/2022光顧

去過西貢 N次，估唔到呢度會有間餐廳，開車去時差點以為地址有錯。餐廳喺海灣内，穿過一群村屋去到盡頭，原來係西貢遊艇會的附屬餐廳。環境優美，非常清靜，附近的村屋群亦似世外桃源。餐廳的餐點選擇及食物味道都一般，不過環境搭夠，好適合來tea一tea。

2/2022 光顧

餐廳小巧，似法式小酒館，之前經過見到，感覺良好，食物簡單但美味，侍應親切，用餐經驗愉快。餐牌分三個類別 : small ，big，sweet，全部份量好細，small 的一個人一碟，big勉強可share，我一個人都食左五款，餐廳好受歡迎，午市用餐時間只有60分鐘，晚市90分鐘，呢度的食物咁細碟係夠時間食的，若食完想傾下偈就要轉場了。呢種用餐時間已經成為常態，睇怕要開始學韓國人一樣「續攤」了。

1/2022光顧

行過覺得門面幾吸引，加上之後有foodie友推介，又去試下。估唔到價錢唔貴，漢堡套餐連飲品及薯條只需$60，但質素一般，我唔係成日食漢堡，所以貴點都係喜歡shake shack或triple O多d

1/2022光顧

平日駕車入大尾篤，無咁多人，但亦有好多食店無開。原本想食的店原來只供外賣，帶住太后無謂四圍走，臨時揾到呢間。見到個大路餐牌都都無乜期望，點知味道及質量又唔錯喎，而且下午茶餐食價比高，當日又無乜人，坐得好舒服。

12/2021 光顧

科學園有多個住宅樓盤，隨住住宅入伙，變得非常熱鬧，同之前靜悄悄的環境簡直係天淵之別，假日來到差點無位泊車。一大班人有大有細，求其有位坐得落就得，結果揀左呢間高級快餐。食物唔難食但絕對稱不上好食，大大份填飽肚的類型。不過勝左地方夠大，室外環境舒適，對住個吐露港景，淋浴在温暖的陽光下，食物都變得次要。

12/2021光顧

朋友睇面書時彈左餐廳廣告出來，咁啱朋友喜歡食青口就去食，所以咪話喺面書落廣告無用。睇餐牌見樣樣食物都好heavy咁，點知又幾好食喎，成餐食完充滿罪惡感。假日仲有kids menu，只要於餐牌內點一個main course，9歲以下的兒童就可以喺kids menu 免費任點一款菜式，幾抵食。