IMG_6271.JPG

 

今日係移動日,因為車程長,食完早餐就出發。港傭今次純粹跟團,所有行程由太太計劃,港傭只提出幾個要求就無再參予,雖然太太貼心地於出發前比左行程資料我,但我無想過要帶腦,所以無睇。只知道今日車程好甘,景點只有粉紅湖。路上一直天陰陰,開車一小時左右到達粉紅湖,顧名思義,湖水呈粉紅色,陽光普照時更鮮豔,好靚好神奇。大家當然係瘋狂影相,上天眷顧,短短大半小時內,大風、大雨、天晴、天陰的粉紅湖景色都比我地睇哂,心滿意足下離開。之後就係漫長的車程,太太對於車程的報告係有點另類,話說大家坐到呆呆地時,太太突然殺出一句 :「仲有1Km就到!」大家立即醒神,好興奮的同駕駛中的先生加油,但加油期間我有點疑惑,只見四周荒涼,聽講今晚住的係渡假村,可以睇海豚,感嘆西澳真係一個神奇的地方,咁荒涼的地方居然可以有渡假村,地貌仲特別到咁近海都唔覺 (之後都覺得自己天真得可怕),眼見GPS1KM快將行完,太太興奮地講:「終於行完呢條公路,下一條公路係100Km!大家聽到都好驚嚇,不過都唔及揸車嗰個,我喺定驚後先送個「謀殺親夫」的牌匾比太太,再輕拍司機坐的先生膊頭,講句 :「對你的遭遇深表同情」之後,決定瞓陣。過左一千年之後終於到達渡假村,天色已黑,匆匆check in 安頓好,食埋晚餐就瞓覺了。可憐的先生今日揸左六小時車。

Hearoom 發表在 痞客邦 留言(0) 人氣()