Foodie 生活雜誌

3/2020光顧

睇雜誌至知，店名TIRPSE 係英文esprit的調轉寫，背後意思係乜就唔理了，但咁樣會易記d。餐廳在陳豪咖啡店隔離個鋪，行過幾次都唔多覺眼，直至光顧的時侯，原來餐廳入面別有洞天，一列維港景令人心曠神怡。午餐分Exclusive 及Luxury 兩款，我今次食Luxury 套餐，菜式係我近年喜愛的法日料理，質素高的日本食材配合複雜的法式烹調，完美組合。菜式設計有心思，味道好，環境舒適，但侍應水準稍嫌稚嫩，未能配合餐廳質素，可能尚要時間培訓。呢餐幾滿意，轉餐牌後再來😁

Amuse Bouche 可能因為老花，上枱時只見一盤雜草，要再聚焦至見到主角。米片上係洋蔥及銀魚，再放上黑松露茸，好細舊，雖然三樣食材都重味，但最後只食到同聞到清甜的洋蔥清味。

starter 龍蝦/菜花/海草. 龍蝦鮮嫩，菜花purées 帶草青味，但食味清新，海草帶酸，醒胃，配龍蝦食加添層次感 (侍應介紹碟上的醬汁用一pat pat來形容，嚇得我)

麵包配上加入酸忌廉及cheese 打成的牛油，好滑，但食味又無乜特別

芹菜根湯加豆帶子湯 泡沫湯好滑，有濃濃的芹菜味，帶子嫩，細細碗，好濃縮的食味

主菜選三文魚 除左煙三文魚以外，一向對其他煮法的三文魚無興趣。主菜有魚、鴨、牛選擇，其中鴨同牛要另加錢。為左唔使加錢，都係點三文魚。翠綠的菠菜葉下蓋住鮮甜的海膽及香菇，三文魚用慢煮，魚肉保持嫩滑，配上蜆肉海膽熬的湯，好鮮甜的一口湯。旁邊的黑芝麻千層酥條，又香又酥脆，有驚喜的主菜

mini dessert 牛蒡雪糕上係雲尼拿油及芝麻。雪糕有牛蒡的甘味，雲呢拿油及芝麻拹助加點點香甜，有新意。

甜品 酒粕飯粒布甸 法式米布甸加入酒粕、柚子肉及沙律用的wasabi菜，米粒煮成糊狀，咬落煙靱，加入甘甜味的酒粕及清新的柚子肉，雖然賣相欠佳，但組合好有新鮮感又好食，有驚喜 

另一款甜品 白色似小籠包果子其實係蛋白包住berry sauce，打開係流心果醬。伴ginger ice cream 。朋友話好味。

咖啡及petit four一般

經過餐廳，以為係普通酒吧加cafe，reception 佈置modern 有型

入到餐廳，豁然開朗，一列維港景係亮點

食完飯可以出露台嘆咖啡

兩間VIP 房，可以搞小party，但都係食set，呢間有海景睇

另一間外表似火車卡，不過介紹話係珠寶盒

珠寶盒房面積較大