Foodie 生活雜誌

11/2019光顧川流@灣仔

精緻新派川菜，宣傳話係以前雲陽閣的主廚陳師傅主理，想當年我無論財力及味蕾都未能夠欣賞雲陽閣，只食過一次，印象好好，但都無食辣，浪費了。到我喜歡川菜的今天，雲陽閣已經關門大吉，不過大廚陳師傅就過左來川流。睇過晚餐價錢唔平，走新派中菜路線，在我嚟講「新派中菜」有三大特色 ： 細細碟，擺盤靚，價錢貴，所以就算傳媒讚到天上有地下無，我都未有嘗試。見到最近有午市套餐，價錢較貼地，即管一試。選點心套餐，有湯、點心、小菜、油菜同白飯，一人前，啱哂我。套餐賣相精緻，但味道一般，未能吸引我晚上來光顧。不過好開心餐廳肯做呢種套餐，近來我週末食lunch都遇到唔少單頭食客，對於我呢類孤獨試食家來講係一個好好的選擇。

酥肉冬瓜燉鮮鮑湯 湯夠熱，味清甜。酥肉好腍，食落似魚肉。雖然係清湯，但加左少少花椒，帶出點點川菜感

點心拼盤 點心有五款 : 蝦餃、燒賣、素菜包、芋角同芽菜牛肉盒，全部係廣東點心，居然一款川味特色點心都無，有點失望。點心味道不俗，食材有水準，餃皮包皮都做得好。

題外話 : 飲完湯後，侍應居然上個水煮魚比我，我問佢唔係應該食點心先？佢話若我想食點心可以上點心先。搞到好似我有問題咁，邊有人食完正餐至食點心？基本次序都攪錯，廚房的問題。後來餐廳有比whats app問意見，我反影左呢點，店方話因為點心係即叫即蒸，為怕客人等得耐，所以至先上水煮魚，會再作檢討云云.......

水煮魚 套餐有十幾款小菜選擇，我選水煮魚，魚肉厚身肥美，雖然係愈食愈辣，但湯底味道只濃不香，無青瓜又無寛冬粉，只得蔥同芽菜，單調左d，係咪一人前的關係？水煮魚係川菜名菜之一，若連呢個都唔突出，好難令我對其他菜有期望。

套餐包白飯及油菜，夠哂飽肚

叫左碟辣醬，以為係川味辣醬，原來只係普通豆板醬，有點失望

午市餐牌

餐廳門面簡約，行過左都唔知，店名都好隱蔽

裝修西化，內設酒吧，以中式茶具作點綴

餐牌內相片好靚，排版用心，似catalog 。