Foodie 生活雜誌

9/2019 光顧

過去十幾年，第三次幫襯Eddy，三個不同地方，幾有緣。今次去中環店，位置非常吊腳，要行一條大斜路，餐廳細細，最多可以容納三至四十人，全店分三個區域，有房有花園仲有走廊位，彷似秘密花園。食物味道不俗，食材講究，可惜擺碟簡單欠心思，整體平淡，未能令我有食私房菜的驚喜。雖然當晚見到eddy，但晚餐唔係由佢煮，只見佢行出行入招呼客人，想要試佢的手藝，就要選指定由eddy 煮的套餐，又或者碰運氣吧。

題外話 :

Chef Eddy 喺香港飲食界多年，曾經開設私房菜Posion Ivy，屬於香港最早做私房菜的一位廚師之一。但我第一次跟Eddy相遇係十幾年前，沙士之後，喺美麗華酒店的Yamm食自助餐。記得當年由Eddy 主理，將自助餐食材全面upgrade，最深刻印象係parma ham 唔配melon配無花果，大鄉里的我初嘗鮮無花果的美味，由於係餐廳soft opening，當時Eddy在場中收集食客意見，佢仲帶我行左buffet 枱一個圈介紹，態度十分友善。之後知道Eddy離開酒店，在黃竹坑開設私房菜館Chef Studio by Eddy，又再幫襯，印象良好。今次Eddy又轉地方，開店在中環，再來捧塲，可惜感覺比之前遜色，食物無突破，座位安排欠佳，雖然Eddy親自作出補救，但已壞了興致。

(講左咁多，大家可能以為我識得Eddy，實則係我識佢，佢唔識我，不過佢非常識做，交際手腕一流，難怪可以做足咁多年長開長有)

因為安排上出左小小問題，經理請飲香檳消消氣。

另外善長又請飲酒，感謝 (free corkage)

秋天菜單

自家焗製麵包，外脆內軟，好香。配黑醋橄欖油同蒜蓉醬，醬汁份量少，小家左d

帶子carpaccio 配魚子及魚子醬 味道鮮甜，但作為前菜就行貨左d

法蘭西海皇湯bouillabaisse 海鮮味濃，可能唔係主菜，份量同我想像的差好遠，似餐湯多d，完全無左風味，再加上同佢網頁的相差好遠，完全不乎合商品說明條例

配湯食的rouille醬及多士

蟹肉海膽 材料鮮甜，但咸左少少

basil sorbet 清下味蕾，迎接主菜

慢燉和牛面頰及炭燒西冷扒 兩種煮法的牛肉，一次過滿足兩個願望。 慢燉味濃，炭燒香口，兩塊都係上乘牛肉，不俗

甜品又係行貨，macaroon,流心朱古力蛋糕、海鹽雪糕，全無心思的甜品

餐廳在大斜坡上，藝穗會再上，好吊腳

在掘頭巷，G神帶路都要揾，門口車位又唔多，若唔想似我唔行，建議坐的士

低調的門面

走廊都放埋枱，若唔想嚟到至知坐門口咁煞風景 (堅係門口，開門關門都感受到熱風)，訂位時記得講明

室內開放式廚房，無油煙，讚