Foodie 生活雜誌

離開栗林公園已經過左午餐時間，之前求其在車站攞左張單張，介紹車站職員會去的烏冬店，咁啱呢間上原屋本店喺栗林公園對面，仲要收4點，趕得切（好多烏冬店收3點）。烏冬非常彈牙煙靱，好好味，湯頭清甜唔口渇，天婦羅香口，太后讚不絕口，沿路不斷提住。

資訊

上原屋本店

地址 : 香川県高松市栗林町1丁目18-8

電話 : 087-831-6779 

烏冬店在公園對面內街，有停車位，街坊生意，裝修簡單

全自助，有茶水供應

即炸天婦羅，流量大，差不多即炸即食，好香

天婦羅炸漿薄，食物juicy

仲有關東煮

主角烏冬，廚部即制

最有趣係你攞好哂所有食物，比錢後，要自己去熱水糟度淥下個烏冬，之後喺大水煲按熱水制加湯，我排隊時已經睇住人點做，加上之前睇「孤獨美食家」時，主角食過類似的店鋪，睇的時侯仲覺得好有趣，心想若可以試下就好，估唔到比我遇到。所以我可以好似好熟行情咁照版煮碗。

喜歡的加埋蔥花炸脆，整好兩碗烏冬就開餐。

太后食湯烏冬，讚木魚花湯頭清甜唔口渴，烏冬非常煙靭有咬口，太后極欣賞。另外點左甜腐皮、牛腩同雞蛋做配菜，不過全部不合聖意。

手打烏冬我通常食冷烏冬，貪佢嚼勁更好，果然，麵條圓潤，咬落煙靱彈牙，好烏冬當之無愧。鰹魚汁味道適中，茄子天婦羅好juicy又唔油膩，美味

有包裝烏冬可以買走，太后居然話要買，稀有情況尤如觀音開庫，可惜被佢發現要過冷河，立即九秒九放低 「咁麻煩，煮咁耐，咪搞！」15分鐘都嫌多，真係心急人上。

烏冬有証書加許，錦上添花，