Foodie 生活雜誌

(別緻的小清新餐牌，部份插圖由女廚師繪畫)

6/2018光顧

喜歡的咖啡店，逢星期五、六有晚餐供應，當然要幫襯。晚市做套餐，頭盤、湯、主菜(三選一)、甜品、餐飲，價錢由二百多至四百多，視乎所選的主菜而定。喺觀塘區嚟講係有點進取，但又唔係過份，都係大趨勢。廚師對煮食有熱誠，花好多心思去設計菜色，成品未必好突出，但味道不俗。好欣賞佢盡力做好的態度，食材用料成本幾高，醬汁雪糕都係自己做，收呢個價錢，性價比算高。同廚師及咖啡師傾偈，知道佢地對自己有要求，balabala地分享，完全感受到佢地對食物的熱情，有心係好重要，團隊不斷嘗新試驗，係食客的福氣。

頭盤 烟肉煎薯餅配橄欖油碎蛋沙律 薯餅自家製，先煎後焗，充滿薯香，但唔多覺有煙肉，薯餅上加西洋菜苗感覺有點畫蛇添足。蛋沙律同薯餅唔多夾，廚師話係想兩樣食品獨立來食，咁佢講完我就明囉，因為習慣配埋一齊食。其實欖油碎蛋沙律加左少少鯷魚，若獨立配麵包食都應該好食。

蕃茄湯 用蕃茄蓉blend成，加左紅椒，帶點辣味，有點點墨西哥feel

主菜 海鮮茄汁意麵 手做意麵偏腍，海鮮有魚、魷魚及蟹肉，全部新鮮街市貨，蝦係印度冰鮮，仍能保持爽甜。茄汁加左泰國蝦膏，惹味有咸香，不過味道太搶，咸左d。

甜品 芒果乳酪配士多啤梨雪糕 乳酪先焗再燉，質地較結實，感覺實在。上面放上用冰滴咖啡加薄荷浸過過的西瓜粒，廚師話可以減輕乳酪的甜味，其實我又唔覺乳酪甜，反而西瓜唔覺有咖啡味，而且薄荷味太重。士多啤梨雪糕自家製，奶味唔重，啱我，如果可以食到果肉會更好

coffee time

餐飲當然要點咖啡 我比咖啡師作主 (當然因爲我唔識) ，佢比左杯危地馬拉豆的hand drip 我，我亦係當然地無感覺，對於我就係普通咖啡一杯，味道有點似茶。反而欣賞隻杯。

原來咖啡放在唔同杯又有唔同香味，咖啡師示範完我至知，總之咖啡就多學問，我智障，聽下無妨，要學就無心機了。之後咖啡師請我飲一小杯cold brew （無影相），係用咖啡櫻桃果肉製成，再低溫冷藏發酵七日。飲落有點似梅酒，酸酸地幾開胃，我覺得用呢款咖啡做結尾更好。咖啡師話佢原本係想用呢款，但咖啡太濃，怕我飲左瞓唔著，真細心。