Foodie 生活雜誌

(新店在工厦樓上，都幾靜，出𨋢後轉左再轉右就見到呢張咁清新的壁畫)

5/2018 光顧

終於等到你回來！鰂魚涌的PREGIO係少數我會回頭的咖啡店，食物同咖啡均水準不俗，雖然我唔係成日幫襯，但對於我來講，已經係回頭最多的咖啡店。之前佢結束營業都有點不捨，一睇雜誌知道前PREGIO員工原班人馬，幾位有夢想又有實力的年輕人今次自己做老闆再開店，命名Nutmad，第二日立即仆去幫襯。今次終於有機會同「後生仔，傾下偈」，廚師有抱負，唔係甚麼藍帶、米芝蓮、酒店出身，但對於我，話之你掛到成身牌，最緊要好食。師傅仔對煮食有heart，一食就知，又喜歡鑽研菜色，所以成日有新搞作。咖啡師一向專業，但我水平有限，只知佢沖比我的奶啡香濃幼滑，好合心意。餐廳營業時間為12:00至7:00，逢星期五六會做晚市，營業至10:30，晚餐以套餐為主，下個post再寫。衷心希望餐廳能持續發展下去。

餐廳裝修簡單明亮，小清新風格，窗前一列坐位，感覺開揚，個人認為係餐廳亮點。當日一路坐，一路有舊客上門，真係儲落好多粉絲。

開放式廚房，設有吧枱，係咪為未來tasting menu 鋪路？客人少的時候問題不大，若滿座時，不停出餐，可能油煙會有點重

煙燻豬豬卡邦尼 幹粗活的我一開始以為有舊豬肉會好飽肚，但我諗多左，豬肉係三款不同的豬肉片 : 豬面肉、煙腩片同意大利煙肉，三款肉片，不同質感，廚師話一般會用煙腩片，取其油香，但佢認為太油太滯，所以配較瘦的煙肉及煎得脆香的豬面肉，雖然食落感覺不大，但有用心。其實我最欣賞個卡邦尼汁，捨棄忌廉，只用芝士及蛋汁，望落以為無汁，但食落就知每條意粉都有蛋汁包住，食得出的蛋味，但又唔heavy，意粉有咬口，若可以比多住我就好。

點左flat white，但咖啡師話開業初期只做黑啡同白啡，白啡用double shot，會比latte 少點奶，但味道又比flat white 厚些，我唔明佢講咩，只知出來的味道同以前一樣，香濃幼滑，合我心意。