Foodie 生活雜誌

(咖啡店隱藏在橫巷樓梯中間，門口都有坐位，就似行到半路的歇腳處)

初初以為係一本心靈雞湯書，見到出名就去借。原來內容係作者以哲學家與年輕人的對話解釋思想家阿德勒的個體心理學。宣傳話睇完本書會令你人生為之一變，咁梗係無咁誇張。但睇完後起碼有多一個思想角度，對於阿德勒的心理學，當然無可能睇一本書就識，何況本書係由日本作者岸見一郎消化其理論後再寫，點都隔左重，作為閱讀消遣的我亦不作深究，書本內容簡單易明有意思，睇睇下自己都代入左年輕人角色去質疑論點，但又會立即見到答案，好有趣。而書中提及某些論點係我認同及覺得有趣的。

-「人並非受制於過去的原因而行動，而是朝向自己決定好的目的而行動」

我一向認知的過去經歷會影響現在行為的睇法，呢個「目的論」真係好有新意，亦好正面。

-「普遍來說，人生沒有意義。人生的意義，由你自己給予」。

曾幾何時，我覺得活著係無意義，做人唔知為乜，我無遇到任何不如意，亦無想過自殺，只不過係將人生當作一個課題去諗，結果我都係得到同一結論 ：人生就係無意義，不過又無理由無端端走去自殺，反正總會有死的一日，唯有自行為生活添色彩，努力生活，盡量過一個自己滿意的人生。

-「要認真地活在當下，不要為人生畫下一條不存在的線」

以前好多時會想日後要點點點，好多計劃，但漸漸發覺計劃趕不上變化，有時就算朝住計劃下，行下行下都會唔知自己做緊乜。如今唔係話無計劃無目標，不過只有個大概，寧願踏實地活好每一天，由美好的每一天累積更好的將來。

-「分辨可以改變和不能改變的」

從前我會轉牛角尖，會因天氣唔好而發脾氣，好無謂，後來開始在遇上苦惱時就諗下件事能否改變，若未能改變就慳番唔諗。亦漸漸地學會放鬆 ......一點點 （會分辨係一回事，但控制唔到自己唔諗）

-「不評價他人」

喺現今社會實在太多評論，好似每個人都有資格向其他人指指點點，每個人都係專家，搞到好煩。

-「要締結良好的人際關係，必須保持一定的距離，太過親密的話，無法正面溝通，但是太遠也不行。」

見到呢幾句簡直想拍手掌。正所小人相交甜如蜜，君子之交淡如水，無論幾好的朋友、幾親的人都唔係要所有事情分享，24小時對住至係好，凡事都要有點距離，有點空間至合適。

-「接受自己的平凡」

平凡唔係問題，點解每人一定要做律師醫生？個個做專業人士，邊個掃街洗厠所？只要認真做，愛自己的工作，平凡都可以有意思。

關於以對話講哲學，想起另一本「僧侶與哲學家」更精彩，有興趣不妨一看👇🏼

https://hearoom.pixnet.net/blog/post/297325316-僧侶與哲學家