Foodie 生活雜誌

(餐廳在民居，外表平實，開外有個大魚缸)

鰻魚飯係我日本行餐單上必有餐點，而且一定要去專門店。今次選的店在岡山，餐廳在民居中，晚上靜靜的，只有我地同另一枱新加坡遊客，可能大家都睇左網路上的文章而來。今次最特別係點左野生鰻魚，價錢以重量計，似喺香港食海鮮，幾有趣。店主友善，家庭式經營，味道不俗，可惜用電爐，無炭燒香，食味有點缺失。

資訊 : 

うじょう亭 

地址 : 岡山県岡山市北区内山下1-8-18

電話: 086-234-1139

家庭式小店，好有温暖感

多款下酒小菜

點我至愛的八爪魚，醬油浸，頗柔軟

鰻魚有分天然鰻同養殖鰻，價錢不同。天然鰻要全條買，每100g 2800yen，我地4個人，店主建議我地點500g，報價後大家同意再落單。見價錢ok就落單，另外點左養殖鰻作比較。結果係太飽，其實只點一條天然鰻已夠食。

鰻魚即撈即劏

天然鰻與養殖鰻的分別

可惜用電爐，同炭燒的風味差好遠

鰻魚汁，入面係滿滿的鰻魚骨

天然鰻魚肉質彈牙，但無養殖鰻咁肥美，講真，若無比較，只係食天然鰻，我未必會食得出個分別。若人數少又唔係好講究，未必需要花錢點天然鰻，我都係貪得意試下。不過若係人數多，點一條天然鰻已夠食，計起來同每人點一個養殖鰻套餐價錢差不多。魚肝清湯好味，店主送兩個白飯，忘記影相。

養殖鰻，肥美肉厚，鰻魚汁味道香濃，唔太甜，飯粒豐滿，日本食鰻魚的好處係無泥味。

老闆送的蒸蠔