Foodie 生活雜誌

(餐廳在袛園町屋內，年輕時只係經過，好奇內𥚃係點，但絕對唔捨得食。到如今熟齡，興趣由放上身變放入肚，當然要付出點代價(無論金錢同體重)。)

之前在東京試過牛料理，好有驚喜，見今次京都有，而且好出名，梗係要試。有時一餐飯除左味道以外，菜式的設計，廚師的技巧都好值得欣賞，就似呢餐，

被安排坐counter，一路睇住師傅表演一樣的準備食物，真係色香味俱全。雖然未至於一試難忘，但總算係一個見識，一敞不俗的飲食經驗。可惜我敵不過肥美鰻魚配和牛的組合，又一次食滯。對上一次喺名古屋下午食鰻魚飯，晚上食飛驒牛，結果又係滯左。

（註 ： 相內菜式的名字都係我自己改，因為師傅只能用簡單英文介紹，牛肉大部份生食，若未能接受就唔好去了）

にくの匠 三芳

地址 : 京都府京都市東山區祇園町南

側570-15

Tel : 075-561-2508

地方小小，只有十多個座位。

被安排坐吧枱，近距離睇廚師表演。隔離兩位客人同師傅有講有笑，我地兩個自說自話，欠缺交流係我每次在日本食飯最氣餒的。

套餐形式，價錢分別在不同等級的和牛選擇，其餘食物係一樣，我選左近江牛。

蓴菜牛肉凍清湯 時令的蓴菜外有一層啫喱般的物質包裹著，口感特別，凍湯頗有牛味，清清地，好適合夏天的湯。

蔥絲配燒牛肉 好普通，無牛味，以為呢碟就係近江牛，講真，連埋之前的凍湯，係有少少失望，覺得食物欠缺驚喜

茄子鮑魚湯  湯好鮮甜，鮑魚又軟又甜，晚餐到此開始有感覺

昆布牛舌 牛舌用昆布一層夾一層的醃過，簡單伴醬汁食，非常滑溜。晚餐到此開始有感覺。

牛肉河鰻飯 呢舊野生河鰻真係不得了，非常肥美，外皮烤得香脆，見住師傅切開時刷刷聲都吞哂口水，配合汁煮牛肉（聲稱係神户牛），好味，成碗飯都好滿意。

間場梅及香檳雪芭清味蕾

塊牛肉切成一條條做咩？

翠綠的玻璃碗上鋪上荷葉，搞咩大龍鳳？

原來係將剛才的牛肉條當成麵條，配上素麵及鵪鶉蛋，伴著果凍清湯，做成一份冷麵，無論視覺同味蕾都透心涼，讚！

shabu shabu  用高湯輕焯牛肉片，下墊住露芛絲。牛肉滑溜，露笋碧綠爽脆，高湯清甜。

烤近江牛 主角近江牛出場 初初見師傅預備時見細細舊，覺得唔坻，原來係自己眼濶肚窄。

牛肉的火喉perfect 微焦的外皮充滿炭香，入面肉質鮮嫩柔軟，睇落紅紅的但全無血水，油份重，食到滯左

梗係唔會喺隻大碟度一夾就隊落口，要遂舊放在碟上，有4款調味可選擇，優雅地慢慢品嘗

醬油蛋黃飯配燉牛肉 食到最後已經好飽，但都忍唔住食哂，個蛋黃溏心似果凍，醬油入味，簡單就是美，好好味。清湯燉牛肉香濃軟稔，唔會太heavy。 酸菜爽脆，只係呢度菜我都可以當一餐。

甜品 綠茶雪芭配紅豆，師傅話雪芭澆上威士忌，我唔識，只覺幾香。