(先圖後字)

IMG_0083.JPG

1/2017 光顧 明珠閣@沙田

好耐無飲過一餐咁差勁的茶,仲要係同長輩食,真係罪過。茶只有普洱可選,鮑汁鳳爪個汁係膠質豆粉茨,腐皮捲咬落以為食煎蝦餅,脆麻花係炸雲吞皮加糖霜,呢d新派點心真係唔啱我。得個叉燒刈包叫好食d,難怪當同場其他酒樓都book唔到位時佢會可以有位,有時市場係會話你知真相


IMG_0084.JPG


1/2017 光顧 譽宴。星海@尖沙咀

開在The one 高層的餐廳景觀都唔錯,呢間都係。酒樓以宴會菜為主,地方好大,但若係來飲茶,感覺就空洞左d。地方第一眼望落去好grand,但睇清楚就知細節嘢較粗糙,不過我來飲茶啫,唔好咁多事幹。點心款色多,味道唔錯,諗住價錢會係高級價,點知又可以接受,高級版富臨。


IMG_0085.JPG


1/2017光顧 龍璽@尖沙咀圓方

圓方餐廳選擇多,原本想去Tea WG食個早餐,點知過左時間,天龍軒又無位,見龍璽可以walk in,又試下。點心都係行精緻路線,配搭盡量新鮮,但味道又唔算特出,不過環境就真係唔錯,望尖沙咀中環,個view靚過波士廳。

點心分享(上至下,左至右)

豆苗餃、鴛鴦雙絲餃、海參腸粉、咸水角、宇治綠茶包、生拆海蝦貴妃泡飯、紅棗糕(送)

其中豆苗餃、咸水角同泡飯都好味,泡飯可以點半份,我地兩個人,每人兩碗,剛剛好。價錢係正價六折左右。


IMG_0087.JPG


12/2016 光顧 海天小館@元朗

無想過元朗會有一間咁骨子的酒樓,細細間,入口隱閉,在麻雀館樓上。點心味道唔錯,款式又多,朋友無介紹錯👍🏻

IMG_0086.JPG

12/2016光顧 龍皇@銅鑼灣
龍皇係我頗喜歡去飲茶的酒家,選擇多,味道唔錯,但間間質素都有出入,我最喜愛去銅鑼灣店,無論味道同環境都唔錯,一列落地大玻璃對住海景,夠哂開揚,食得舒暢。價錢中等,比得順氣。

IMG_0088.JPG

11/2016 光顧 翠亨邨@尖沙咀
酒店一樣的價錢我預左,但無預到個size縮哂水,碟鮑汁鳳爪直頭似用個碗仔裝比我咁,點心味道係唔錯,但我真係食唔起了。唔好睇價錢,個黃鱔煲仔飯又真係幾好食,黃鱔夠肥,個飯仲加左腊味,好香,不過豉油咸左d。

IMG_7159 

4/2016 光顧 翠玉軒@中環
好心地集團旗下。開在中環交易廣場,梗係走高級路線。服務好,環境舒適,但點心同一般好心地集團的食味無分別,係多左d花臣,不過價錢貴左但用料一般,唔使特別去。

 

IMG_7158

 IMG_7157

IMG_7156  

3/2016光顧 滿福樓@灣仔海景萬麗酒店
因為做promotion,部分點心買一送一至嚟。餐廳門口普通,但一穿過大走廊立即豁然開朗。餐廳樓底高,枱與枱之間有距離,裝修高貴得來低調,似在酒店大堂進餐,難得又唔嘈。有梳化雅座,餐桌setting 清雅,杯碟靚,張椅都坐得好舒服,配合埋落地玻璃大海景,環境一流。點心選擇多,味道好,份量足。不過價錢實在貴,唯有等下次特價再去。(promotion已完結)

IMG_7155  

2/2016光顧 上海綠楊邨酒家

廣東點心食得多,今次試下上海點心。餐廳地方舒適,世貿中心係地王,樓上食店大部份有海景,包括呢間。上海菜的飲茶同廣東菜唔同,上海菜的點心,對我來講係小食,鹽水鴨、馬蘭頭百頁卷、紅油抄手賣相靚味道好,嫩雞煨麵湯頭夠甜,燻蛋夠香。弄堂春卷份量大,素菜饀。至於海蜇頭、糖醋骨、白切肉粉皮就麻麻。老字號,味道無太大驚喜,但亦唔會失準,係安全之選,不過價錢唔平。

IMG_7154  

2/2016 光顧 鴻星@旺角MOKO

水準比以前差了,(以前係指尖沙咀店開店時的以前),但價錢就一直進步中。老實說,呢間的點心唔值呢個價,不過等位快,就算得一個人到都可以入,唔似得對面綠屋,要一半以上人到左至入得,以往一條友坐低慢慢等人齊支歌仔無得唱了。温馨提示 :全塲最易揾位的係百樂潮州酒家。

IMG_7153  

2/2016 光顧 國金軒@尖沙咀

喜歡光顧的飲茶地方之一。裝修用桃木襯托翡翠綠,加上琉璃裝飾,一室高雅。點心足料味道好,配搭有心思,價錢當然有番咁上下,所以唔會常來,但難得水準保持得好,每次食完都滿意,唔錯。

 

IMG_9963

 2/2016 光顧 龍皇@觀塘
龍皇集團的點心一向唔錯,款式多,今次食覺得份量正常左(之前實在有點迷理)。觀塘分店較易揾位,不過座位較迫,價錢與環境不成正比。

IMG_9962

1/2016 光顧 九龍廳@尖沙咀圓方
林先生開的店,價錢當然有番咁上下,否則點會商場內四間酒樓滿座,唯獨呢間walk in都有位?蝦餃細細粒,灌湯餃雖然係素食,但湯清甜饀料豐富,其他點心食物都唔錯,尋回以往點心的精緻感,店子裝修清雅,環境食物服務都唔錯,最錯係我咁窮唔應該來

IMG_9961  

12/2015 光顧 翠亨邨@尖沙咀

多年前光顧,覺得裝修殘舊,點心麻麻,無再回頭。近日有朋友提過叉燒唔錯,心思思又試下,原來已搬左上5樓,裝修清雅,天花有玻璃藝術品裝飾,不落俗套。點心都唔錯,幾有心思,鴛鴦叉燒(黑豚肉及普通),肥瘦適中,兩者皆好味,但比較之下,黑豚肉鬆軟,普通的較鞋口,仲有喜愛的蜜糖豆。不過價錢絕對唔係大眾化。

 

IMG_9960   

 11/2015光顧 太湖海鮮酒家@銅鑼灣

試過食晚飯不俗,又試下早茶。星期六日十點幾已全滿,迫迫夾,枱與枱空間少,但侍應勤快有禮貌又親切,可能熟客多。點心選擇多,炸物炸得香脆乾身,其他點心味道ok,價錢又唔貴,銅鑼灣的一個不錯選擇。

 IMG_9959  

11/2015 光顧  翰騰閣@又一城

去又一城通常選翰騰閣唔去八月花,因為好心地集團周圍有。點心唔差,係一般水準,但值得一提的係比較大碟,蝦餃燒賣大大粒。不過室內樓底矮,侍應唔夠,沖水都要叫三次。

 

 12/2015 光顧 星宴@W hotel

update 下大家,水準依舊,食物不俗,價錢不變,任點任食,選擇不算多但若每樣一碟都應該會飽到反肚。今次新增鰻魚酥,黑松露炒飯。仍舊係每位$195另加一,只限週末9:30至11:30。

 

 9/2015光顧 365東海@尖沙咀K11

可能主打晚飯食蟹,張張枱都好大。點心認真麻麻(睇相都知),以尖沙咀嚟計,地方唔算整潔,比較之下The One 的分店好d。

 9/2015光顧 桃花園@圓方Elements

桃花園小廚有兩間,一間在中環,一間在圓方。幾年前在中環店食過晚飯,檔次同價錢高的中菜,試過就算。今次試下分店的點心,點心當然係即叫即蒸,大路選擇,賣相唔錯,味道都係唔錯,唔會有特別驚喜。唯一有點特別的係個冰鎮鵝肉凍卷,在晚飯時係前菜的選擇,落到點心紙上就係小食。腐皮包住一條條凍鵝肉再烟燻,咬落啖啖肉,不過凍左少少,不妨於上桌後等一陣至食,唔好學我似放出來咁搶住食。
 

8/2015 光顧 

百樂潮州酒樓@新世紀

味道不俗,點心賣相頗精緻,不過選擇少,要再點小食或飯麵至得,價錢稍貴,所以不及同一商場內的幾間好心地集團旗下酒家咁受歡迎,較易揾位。)
arrow
arrow
    全站熱搜

    Hearoom 發表在 痞客邦 留言(0) 人氣()