2016九州一圈遊遊記篇: Day 3 長崎 - 有田 - 伊万里- 長崎 @ Foodie 生活雜誌

一早打算到長崎港的朝市食堂食早餐，點知原來11:30至開（又話朝市.....）無所謂，就在長崎港四圍行下影相。美麗的長崎港，可能配上藍天白雲好天氣，特別漂亮，不過太陽伯伯就兇狠左d。長崎港隔離係長崎美術館，一個現代化的建築物，外型設計簡潔俐落，好吸引，雙腳不由自主行左過去，可惜是日閉館，只好圍住四周睇睇，之後先知原來係建築師畏研吾的作品，又讚下自己識貨先。

長崎港

長崎県美術館

行左一輪終於等到食店開門，講真初初見到個門面，諗住係似food court 般的食店，無期望。例牌點個推介套餐，二千零yen，點知上枱時就嚇親，一個餐有三條魚加一盤魚生，份量十足，食完去耕田都得了。套餐的魚湯用飛魚煮湯，在日本未食過成條魚滾的湯，頗鮮甜。朋友們點的魚生飯同燒魚套餐同樣份量十足。魚生鮮甜，燒魚肥美啖啖肉，抵食又好食。另外見其他食客點左不同套餐，全部大大份。餐廳另設露天座位，有BBQ套餐，有興趣的朋友可以一試。

燒魚套餐

魚生飯，插左二支天付羅好攪笑

耕田套餐

餐後出發到有田，有田係陶瓷鄉，最出名係「有田燒」，以為一定好熱鬧，點知去到見到街的兩旁確實係有好多售賣陶瓷工藝品的商店，但好靜，因為未揾到位泊低車，所以一路行，路上見到四圍都有大大個「丸兄」的廣告牌，就決定揸車去看過究竟。去到至知原來係一間好大的零售店加工房，朋友一家參加左見學班，玩陶器彩繪。原本仲可以玩陶瓷制作，但時間唔夠，加上係日文授課，所以無參加。佢地畫畫畫，我就四處參觀。由於著色後要再焗，所以完成品會郵寄去你屋企。呢度都用左好多時間，所以畫完就離開有田了。

地圖畫在瓷磚上

丸兄商社，好大間

另一入口

有零售, 可選擇喜歡的帶回家

成個厠所的用品都係瓷器做，件件有價，有現貨發售

亦有體驗工房，彩繪體驗價目表

先選擇你喜歡的器皿

開始

塗鴉製成品。其實有好多圖案比你蓋上去照畫，但我覺得自己隨心畫更好，可以留住當時回憶

整完要留底焗，填好form，個多月後就收到

小朋友好開心地完成作品後，我地再往另一目的地：伊万里。由有田出發車程半小時以內。去到又係靜悄悄的，店鋪賣的都係陶瓷，好多都擁有自家燒窯，沿路小街的店鋪外都掛上風鈴，微風吹過，風鈴叮叮的響，氣氛閒適。行到攰就去食下午茶，（注意cafe不定休，而且大多5點關門，last order 係4點或4點半) 之後再行下鍋島藩窯公園，介紹話係古跡，但我唔識睇，公園內處處有瓷磚裝飾，經過歲月的洗禮，更有味道。伊万里純粹係即興去，事前完全無睇過資料，旅遊書亦只得一頁介紹。原來此地有「秘窯之鄉」之稱，好貼切，好有驚喜的一個地方。

地方不大，要參觀的只係一條街加一個公園